សកម្មជនដីធ្លីខេត្តកោះកុងជាច្រើននាក់ ត្រូវបានតុលាការឃុំខ្លួន និងចោទប្រកាន់
ចេញផ្សាយ ថ្ងៃទី៣០ ខែមិថុនា ឆ្នាំ២០២៣
យ៉ាងតិចណាស់មានសកម្មជនដីធ្លីចំនួន ៩ នាក់ មកពីសហគមន៍ចំនួន ៤ នៅក្នុងខេត្តកោះកុង ត្រូវបានអាជ្ញាធរចាប់ខ្លួនកាលពីថ្ងៃទី ២៩ ខែមិថុនា ឆ្នាំ២០២៣ ហើយត្រូវបានតុលាការចោទប្រកាន់ពីបទញុះញង់ឲ្យប្រព្រឹត្តិបទឧក្រិដ្ឋជាអាទិ៍ យោងតាមមាត្រា ៤៩៤ និង ៤៩៥ នៃក្រមព្រហ្មទណ្ឌ ដោយគ្រាន់តែអ្នកទាំងនោះព្យាយាមដាក់ញត្តិទៅកាន់ក្រសួងយុត្តិធម៌ ។
នៅថ្ងៃទី២៩ ខែមិថុនា ឆ្នាំ២០២៣ អាជ្ញាធរបានរារាំងសមាជិកសហគមន៍ជាច្រើននាក់ ដែលមកពីស្រុកស្រែអំបិល ដើម្បីកុំឲ្យសហគមន៍ទាំងនោះធ្វើដំណើរទៅកាន់រាជធានីភ្នំពេញ ដើម្បីដាក់ញត្តិ ។ អ្នកតំណាងសហគមន៍ជាច្រើននាក់ ដែលមកពីសហគមន៍ចំនួន ៤ ត្រូវបានឃាត់ខ្លួន និងសាកសួរ ។ ក្រោយមក សកម្មជនដីធ្លីចំនួន ១១ នាក់ ត្រូវបានឃាត់ខ្លួន រួចបញ្ជូនខ្លួនទៅកាន់ស្នងការដ្ឋាននគរបាលខេត្តកោះកុង នៅក្រុងខេមរភូមិន្ទ ។ សកម្មជនដីធ្លីទាំងនោះត្រូវបានឃាត់ខ្លួនអស់មួយយប់ ជាមួយនឹងក្មេងតូចអាយុ ៦ ឆ្នាំម្នាក់ និង១ខួបកន្លះម្នាក់ របស់សកម្មជនពីរនាក់ ។ ក្មេងទាំងពីរនាក់ បានស្នាក់នៅក្នុងស្នងការដ្ឋានអស់មួយយប់ជាមួយម្តាយរបស់ពួកគេ ។ ឪពុករបស់កុមារអាយុ៦ឆ្នាំ ត្រូវបានហៅឲ្យមកទទួលយកកូន កាលពីព្រឹកមិញ ខណៈដែលសកម្មជនទាំង ១១នាក់ ត្រូវបានបញ្ជូនខ្លួន ទៅសាលាដំបូងខេត្តកោះកុង ។ អ្នកទាំងនោះត្រូវបានតុលាការឃុំខ្លួនបណ្តោះអាសន្នរង់ចាំសវនាការនៅក្នុងពន្ធនាគារខេត្តកោះកុង ។ សមាជិកសហគមន៍ផ្សេងទៀតត្រូវបានអាជ្ញាធររារាំងពីការប្រមូលផ្តុំនៅខាងក្រៅតុលាការ ដើម្បីគាំទ្រដល់អ្នកតំណាងរបស់ពួកគេ ។
សមាជិកសហគមន៍ជាង ១០០នាក់ មកពីសហគមន៍ទាំង ៥ គ្រោងធ្វើដំណើរមកកាន់រាជធានីភ្នំពេញ កាលពីម្សិលមិញ ដើម្បីដាក់ញត្តិ ស្នើសុំដល់រដ្ឋមន្រ្តីក្រសួង យុត្តិធម៌ លោក កើត រិទ្ធ អន្តរាគមន៍ទម្លាក់ចោលបទចោទប្រកាន់មកលើសកម្មជនដីធ្លី ចំនួន ៣០ នាក់ ដែលមកពីសហគមន៍ចំនួន ៤ ។ នគរបាល បានរារាំងរថយន្តក្រុងដឹកសកម្មជនដីធ្លី ចំនួន ៤គ្រឿង កាលពីព្រឹកមិញនេះ ដោយមានតែរថយន្តមួយគ្រឿងប៉ុណ្ណោះអាចបន្តដំណើរមកកាន់រាជធានីភ្នំពេញ។
នគរបាលបានគំរាមចាប់ខ្លួនសមាជិកសហគមន៍ចំនួនប្រមាណជាង ២០នាក់ ដែលប្រមូលផ្តុំគ្នានៅមុខស្នងការដ្ឋាននគរបាលខេត្ត ដែលមកគាំទ្រដល់តំណាងរបស់ពួកគេកាលពីព្រឹកមិញ ។ កម្លាំងនគរបាលក៏ត្រូវបានដាក់ពង្រាយផងដែរនៅចាប់ពីភូមិតានី ដល់ភូមិ ព្រែកជីក ជាភូមិដែលសមាជិកសហគមន៍ទាំងនោះរស់នៅ ។ សមាជិកសហគមន៍ផ្សេងទៀត បានរាយការណ៍ពីការលំបាកក្នុងការធ្វើដំណើរមកកាន់ខេត្តកោះកុង ។ មូលហេតុនៃការសាកសួរចំពោះសកម្មជនដីធ្លី គឺមិនទាន់ត្រូវបានដឹងនោះឡើយ។
- ចំណងជើង & មូលបទ
- សិទ្ធិកុមារ តុលាការ និងនីតិរដ្ឋ សិទិ្ធបញ្ចេញមតិ និងចូលរួម
