ក្រុមប្រឹក្សាភិបាលនៃសាជីវកម្មហិរញ្ញវត្ថុអន្តរជាតិ ពន្យារពេលត្រួតពិនិត្យសេចក្ដីសម្រេចរបស់យន្តការគណនេយ្យភាពឯករាជ្យក្នុងការស៊ើបអង្កេត
ចេញផ្សាយ ថ្ងៃទី១៨ ខែកក្កដា ឆ្នាំ២០២៣
ក្រុមប្រឹក្សាភិបាលនៃសាជីវកម្មហិរញ្ញវត្ថុអន្តរជាតិ (អាយអេហ្វស៊ី) ផ្តល់ពេលវេលាឱ្យខ្លួនឯងបន្ថែមទៀត ដើម្បីត្រួតពិនិត្យលើសេចក្ដីសម្រេច ដែលធ្វើឡើងដោយយន្តការគណនេយ្យភាពឯករាជ្យរបស់ខ្លួន ដើម្បីបើកការស៊ើបអង្កេត ចំពោះការវិនិយោគរបស់សាជីវកម្មហិរញ្ញវត្ថុអន្តរជាតិ នៅក្នុងវិស័យមីក្រូហិរញ្ញវត្ថុនៅកម្ពុជា ។ ក្រុមប្រឹក្សាភិបាល មានពេលរហូតដល់ថ្ងៃទី២៨ ខែកក្កដា ឆ្នាំ២០២៣ ដើម្បីតម្កល់ ឬបដិសេធចោលនូវការសម្រេចចិត្តក្នុងការស៊ើបអង្កេតមួយនេះ ។
សាជីវកម្មហិរញ្ញវត្ថុអន្តរជាតិ គឺជាសមាជិកនៃធនាគារពិភពលោក ដែលបានធ្វើការវិនិយោគគួរឱ្យកត់សម្គាល់ជាច្រើន នៅក្នុងវិស័យមីក្រូហិរញ្ញវត្ថុនៅកម្ពុជា ។ ក្រោយពីមានពាក្យបណ្ដឹងដាក់ទៅ ការិយាល័យភាពអនុលោម ទីប្រឹក្សា ដោះស្រាយវិវាទ (ស៊ីអេអូ) ដែលជាយន្តការគណនេយ្យភាពឯករាជ្យមួយនៃសាជីវកម្មហិរញ្ញវត្ថុអន្តរជាតិ ដោយបានបំពេញរួចរាល់ក្នុងចំណោមដំណាក់កាលផ្សេងទៀត ការិយាល័យនេះបានធ្វើការត្រួតពិនិត្យអស់រយៈពេល ៧ខែមកហើយ ព្រមទាំងបានសន្និដ្ឋានថា ការស៊ើបអង្កេតគឺសមហេតុផល នៅថ្ងៃទី១៣ ខែមិថុនា ឆ្នាំ២០២៣ ។ នៅថ្ងៃទី២៩ ខែមិថុនា ឆ្នាំ២០២៣ គណៈគ្រប់គ្រងនៃសាជីវកម្មហិរញ្ញវត្ថុអន្តរជាតិ បានស្នើក្រុមប្រឹក្សាភិបាលធ្វើការត្រួតពិនិត្យលើការសម្រេចចិត្តរបស់ការិយាល័យភាពអនុលោម ទីប្រឹក្សា ដោះស្រាយវិវាទ ដែលការប្រើប្រាស់វិសោធនកម្មគោលនយោបាយនៃការិយាល័យភាពអនុលោម ទីប្រឹក្សា ដោះស្រាយវិវាទ នៅឆ្នាំ២០២១នេះ មិនធ្លាប់កើតមានពីមុនមកនោះទេ ។
ភាគីពាក់ព័ន្ធចំនួន ២៤ស្ថាប័ន រួមទាំងអង្គការសម្ព័ន្ធខ្មែរជំរឿន និងការពារសិទ្ធិមនុស្ស (លីកាដូ) បានធ្វើលិខិតរួមមួយដាក់ជូនទៅកាន់ក្រុមប្រឹក្សាភិបាលនេះ នៅថ្ងៃទី១២ ខែកក្កដា ឆ្នាំ២០២៣ បង្ហាញពីការព្រួយបារម្ភអំពីសំណើរបស់គណៈគ្រប់គ្រងនៃសាជីវកម្មហិរញ្ញវត្ថុអន្តរជាតិ សម្រាប់ក្រុមប្រឹក្សាភិបាលធ្វើការត្រួតពិនិត្យ ។ លិខិតមួយនេះ បានរំលឹកទៅកាន់ក្រុមប្រឹក្សាភិបាលអំពីគោលនយោបាយរបស់ការិយាល័យភាពអនុលោម ទីប្រឹក្សា ដោះស្រាយវិវាទ កម្រិតព្រំដែនចំពោះការត្រួតពិនិត្យដែលមានលក្ខណៈវិនិច្ឆ័យបច្ចេកទេសតូចចង្អៀតរបស់ពួកគេ ហើយករណីនេះ ក្រុមប្រឹក្សាភិបាលត្រូវបានហាមឃាត់យ៉ាងជាក់លាក់ពីការធ្វើការវិនិច្ឆ័យលើភាពសមហេតុផល នៃពាក្យបណ្តឹង ។
អង្គការសម្ព័ន្ធខ្មែរជំរឿន និងការពារសិទ្ធិមនុស្ស (លីកាដូ) និងអង្គការសមធម៌កម្ពុជា (EC) តាងនាមឱ្យពលរដ្ឋកម្ពុជាជាអ្នកខ្ចីឥណទានខ្នាតតូចដែលរងគ្រោះ បានដាក់ពាក្យបណ្តឹងទៅការិយាល័យភាពអនុលោម ទីប្រឹក្សា ដោះស្រាយវិវាទ នៅក្នុងខែកុម្ភ: ឆ្នាំ ២០២២ ។ ពាក្យបណ្តឹងនេះ បានធ្វើការចោទប្រកាន់ក្នុងចំណោមបញ្ហានានា ដោយមាន ការបរាជ័យរបស់សាជីវកម្មហិរញ្ញវត្ថុអន្តរជាតិ ក្នុងដំណើរការត្រួតពិនិត្យដ៏ហ្មត់ចត់ត្រឹមត្រូវនៅមុនពេលដំណើរការគម្រោង និងការរំលោភបំពានទៅលើបទដ្ឋានអនុវត្តរបស់សាជីវកម្មហិរញ្ញវត្ថុអន្តរជាតិ បណ្តាលមកពីការអនុវត្តការផ្ដល់កម្ចីគ្មានក្រមសីលធម៌ និងកម្ចីបែបកេងប្រវ័ញ្ច ។
អង្គការ សម្ព័ន្ធខ្មែរជំរឿន និងការពារសិទ្ធិមនុស្ស (លីកាដូ) បានចេញផ្សាយរបាយការណ៍ចំនួន ៤ រួចមកហើយ ពាក់ព័ន្ធនឹងការរំលោភបំពានក្នុងវិស័យមីក្រូហិរញ្ញវត្ថុ តាំងពីឆ្នាំ ២០១៩ ។ របាយការណ៍ចុងក្រោយមានចំណងជើងថា “សិទ្ធិទទួលបានការអនុគ្រោះ” ត្រូវបានចេញផ្សាយរួមគ្នានៅក្នុងឆ្នាំ ២០២១ ជាមួយនឹងអង្គការសមធម៌កម្ពុជា ដែលបានសម្ភាសន៍អ្នកខ្ចីជាង ១៧០ នាក់នៅទូទាំង ១៤ សហគមន៍នៅកម្ពុជា ។ សូមអានព័ត៌មានលម្អិតអំពីប្រធានបទនេះនៅទីនេះ ៕
- ចំណងជើង & មូលបទ
- គ្រឹះស្ថានមីក្រូហិរញ្ញវត្ថុ និងបញ្ហាបំណុល
