សកម្មជនដីធ្លីខេត្តកោះកុង៣នាក់ ដែលកំពុងជាប់ឃុំ ត្រូវបានផ្ដន្ទាទោស
ចេញផ្សាយ ថ្ងៃទី៤ ខែសីហា ឆ្នាំ២០២៣នៅក្នុងសប្តាហ៍នេះ សកម្មជនដីធ្លីនៅខេត្តកោះកុងចំនួន៣នាក់ ត្រូវបានរកឃើញថាមានទោសពីបទល្មើសព្រហ្មទណ្ឌមួយចំនួន ដូចជា បទបរិហារកេរិ៍្ត បទញុះញង់ឱ្យប្រព្រឹត្តបទឧក្រិដ្ឋ ជាអាទិ៍ និងបទប្តឹងបរិហារបង្កាច់កេរ្តិ៍ ដោយសារភាពសកម្មនិយមក្នុងការការពារដីធ្លីសហគមន៍របស់ពួកគេ ។
នៅថ្ងៃទី២ ខែសីហា ឆ្នាំ២០២៣ សាលាដំបូងខេត្តកោះកុង បានផ្ដន្ទាទោសសកម្មជនពីរនាក់ ពីបទបរិហារកេរ្តិ៍ និងបទញុះញង់ឱ្យមានភាពវឹកវរធ្ងន់ធ្ងរដល់សន្តិសុខសង្គម ។ អ្នកស្រី ផាវ ញ៉ើង និងអ្នកស្រី សេង លីន ត្រូវបានកាត់ទោសឱ្យជាប់ពន្ធនាគារម្នាក់ៗ ១ឆ្នាំ និងពិន័យជាប្រាក់ ៤០លាន រៀល (ប្រមាណជា៩,៦០០ដុល្លារ) ជាសំណងជំងឺចិត្តទៅដើមបណ្តឺង ។ អ្នកទាំងពីរ ត្រូវបានប្តឹងដោយអតីតតំណាងសហគមន៍ឈ្មោះ ឆាយ វី ដែលពួកគាត់បានចោទប្រកាន់ពីការរំលោភយកដីធ្លី នៅអំឡុងឆ្នាំ២០១៩ ។ បទចោទទាំងនេះ ត្រូវបានទម្លាក់ចោលសម្រាប់ស្ត្រីជាប់ចោទម្នាក់ទៀតឈ្មោះ ខន ផុន ដែលបានជាប់ពាក់ព័ន្ធផងដែរ ។
នាព្រឺកនេះ នៅក្នុងសំណុំរឿងដាច់ដោយឡែកមួយទៀត តុលាការកំពូល បានសម្រេចតម្កល់សាលដីការបស់សាលាឧទ្ធរណ៍ព្រះសីហនុ ប្រឆាំងនឹងសកម្មជនដីធ្លីខេត្តកោះកុងម្នាក់ទៀត គឺ អ្នកស្រី ដេត ហ៊ួ ។ អ្នកស្រី ដេត ហួរ ត្រូវបានផ្ដន្ទាទោសពីបទប្តឹងបរិហារបង្កាច់កេរ្តិ៍ និងបទបរិហារកេរ្តិ៍ តាមរយៈបណ្ដឹងមួយ ដែលធ្វើឡើងដោយ លោកឧកញ៉ា ហេង ហុយ ពាក់ព័ន្ធនឹងការបង្ហោះសារ ដែលអ្នកស្រីបានសរសេរនៅក្នុងបណ្តាញសង្គមហ្វេសប៊ុក កាលពីខែកញ្ញា ឆ្នាំ២០២១ ។ អ្នកស្រី ដេត ហ៊ួ ត្រូវបានផ្ដន្ទាទោសដាក់ពន្ធនាគារ ១ឆ្នាំ និងពិន័យជាប្រាក់ ២លាន រៀល (ប្រមាណជា៥០០ដុល្លារ) ប៉ុន្តែកាលពីខែតុលា ឆ្នាំ២០២២ អ្នកស្រីត្រូវបានសាលាឧទ្ធរណ៍ព្រះសីហនុ កាត់បន្ថយទោសឱ្យជាប់ពន្ធនាគារ ត្រឹម៦ខែ និងពិន័យជាប្រាក់ ១លាន រៀល ដោយទោស និងការពិន័យជាប្រាក់ ត្រូវបានព្យួរវិញ ។ សាលដីកាស្ថាពររបស់តុលាការកំពូលបានតម្ដល់សេចក្ដីសម្រេចនេះ ។
អ្នកស្រី ដេត ហ៊ួ និងអ្នកស្រី ផាវ ញ៉ើង ដែលមានកូនប្រុសអាយុ ១៨ខែ នៅជាមួយ កំពុងស្ថិតក្រោមការឃុំខ្លួនបណ្តោះអាសន្នរង់ចាំសវនាការ តាំងពីថ្ងៃទី២៩មិថុនា ឆ្នាំ២០២៣ បន្ទាប់ពីត្រូវបានចោទប្រកាន់ពីបទញុះញង់ ក្នុងករណីដាច់ដោយឡែកមួយ ជាមួយសមាជិកសហគមន៍ដីធ្លី៩នាក់ផ្សេងទៀត ។ បទចោទនេះ ធ្វើឡើង បន្ទាប់ពីពួកគាត់ព្យាយាមធ្វើដំណើរដោយសន្តិវិធីទៅរាជធានីភ្នំពេញ ដើម្បីដាក់ញត្តិទៅកាន់ក្រសួងយុត្តិធម៌ ៕
- ចំណងជើង & មូលបទ
- សិទិ្ធបញ្ចេញមតិ និងចូលរួម សិទ្ធិដីធ្លី