អនុប្រធានគណបក្សភ្លើងទៀន ត្រូវបានផ្ដន្ទាទោសពីបទញុះញង់
ចេញផ្សាយ ថ្ងៃទី១៨ ខែតុលា ឆ្នាំ២០២៣
នាថ្ងៃនេះ សាលាដំបូងរាជធានីភ្នំពេញ បានប្រកាសសាលក្រម ដោយសម្រេចផ្ដន្ទាទោស លោក ថាច់ សេដ្ឋា អនុប្រធានគណបក្សជំទាស់គឺគណបក្សភ្លើងទៀន ពីបទញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម និងបទញុះញង់ឱ្យមានការរើសអើង ។ លោក សេដ្ឋា ត្រូវបានផ្ដន្ទាទោស ពាក់ព័ន្ធនឹងការបញ្ចេញមតិរបស់លោក ទៅកាន់អ្នកគាំទ្រ អតីតគណបក្សសង្គ្រោះជាតិ កាលពីដើមឆ្នាំនេះ ។
តុលាការ បានរកឃើញពិរុទ្ធភាពរបស់លោក សេដ្ឋា តាមបញ្ញត្តិមាត្រា៤៩៤ មាត្រា៤៩៥ និងមាត្រា៤៩៦ នៃក្រមព្រហ្មទណ្ឌ ដោយបង្គាប់ឱ្យលោក ជាប់ពន្ធនាគារ ៣ឆ្នាំ ព្រមទាំងពិន័យជាប្រាក់ចំនួន ៤លានរៀល (ប្រមាណជា ១.០០០ដុល្លារ) ។
បទចោទទាំងនេះ គឺពាក់ព័ន្ធនឹងសម្ដីរបស់លោក ដែលបានលើកឡើងកាលពីថ្ងៃទី០៨ ខែមករា ឆ្នាំ២០២៣ អំឡុងពេលធ្វើទស្សនកិច្ចមួយទៅកាន់ប្រទេសកូរ៉េខាងត្បូង ។ សម្ដីរបស់លោក បានរិះគន់ ការប្រារព្ធទិវា៧មករា ដែលជាថ្ងៃឈប់សម្រាកបុណ្យជាតិ ដើម្បីរំលឹកពីការផ្ដួលរំលំរបបប៉ុលពត និងជាអ្វីដែលគណបក្សជំទាស់តែងតែរិះគន់ នៅពេលដែលនិយាយអំពីវត្តមានរដ្ឋាភិបាលប្រទេសវៀតណាមនៅក្នុងប្រទេសកម្ពុជាក្នុងអំឡុងទសវត្សរ៍ឆ្នាំ១៩៨០ ។ លោក សេដ្ឋា ក៏បានលើកឡើងពីភាពជាប់ពាក់ព័ន្ធគ្នារវាងគណបក្សកាន់អំណាចគឺ គណបក្សប្រជាជនកម្ពុជា និងខ្មែរក្រហមផងដែរ ។ សម្ដីរបស់លោក សេដ្ឋា ត្រូវបានដកស្រង់ជាវីដេអូ និងបានបង្ហោះនៅក្នុងយូធ្យូប ដោយប្រភពមិនស្គាល់មួយ ។ ក្រោយមក លោក សេដ្ឋា ត្រូវបានបញ្ជូនទៅឃុំខ្លួនបណ្ដោះអាសន្នរង់ចាំសវនាការ ។
លោក សេដ្ឋា ត្រូវបានឃុំខ្លួនបណ្ដោះអាសន្ន ចាប់តាំងពីខែមករា ឆ្នាំ២០២៣ ក្រោយពេលមានការចាប់ខ្លួនលោក ទាក់ទិននឹងការចោទប្រកាន់ពីបទមិនបំពេញកាតព្វកិច្ចចំពោះឧបករណ៍ដែលអាចជួញដូរបាន នៅក្នុងសំណុំរឿងដាច់ដោយឡែកមួយទៀត ។ លោក សេដ្ឋា ត្រូវបានផ្ដន្ទាទោសនៅក្នុងសំណុំរឿងនោះ ក្នុងខែកញ្ញា ឆ្នាំ២០២៣ និងត្រូវបានកាត់ទោសឱ្យជាប់ពន្ធនាគារ ១៨ខែ ក៏ដូចជាពិន័យជាប្រាក់ និងសំណងជំងឺចិត្ត ផងដែរ ៕
- ចំណងជើង & មូលបទ
- សិទិ្ធបញ្ចេញមតិ និងចូលរួម
