សកម្មជនគណបក្សជំទាស់ពីររូបទៀតត្រូវបានចាប់ខ្លួន នៅមុនការបោះឆ្នោតព្រឹទ្ធសភា
ចេញផ្សាយ ថ្ងៃទី១ ខែកុម្ភៈ ឆ្នាំ២០២៤ការបង្រ្កាបទៅលើសមាជិកគណបក្សជំទាស់ គឺកាន់តែកើនឡើង ដោយកាលពីម្សិលមិញ សមាជិកគណបក្សជំទាស់ពីររូបបន្ថែមទៀតត្រូវបានចាប់ខ្លួន ។ អាជ្ញាធរបន្តចាប់ និងឃុំខ្លួនអ្នកដែលមាននិន្នាការនយោបាយជំទាស់ មុនឈានដល់ការបោះឆ្នោតព្រឹទ្ធសភាខាងមុខនេះ ។
លោក ម៉ា ចិន្តា ប្រធានក្រុមចលនាយុវជនគណបក្សភ្លើងទៀនប្រចាំខណ្ឌដូនពេញ រាជធានីភ្នំពេញ ត្រូវបានអាជ្ញាធរចាប់ខ្លួនកាលពីថ្ងៃទី ៣១ ខែមករា ឆ្នាំ២០២៤ ក្នុងអំឡុងពេលមានការប្រជុំគណបក្សភ្លើងទៀននៅក្នុងរាជធានីភ្នំពេញ ។ នៅថ្ងៃដដែល លោក ហាក់ កុសល ដែលជាសកម្មជនគណបក្សជំទាស់មួយរូបទៀតក៏ត្រូវបានអាជ្ញាធរចាប់ខ្លួនផងដែរ ។ ការចាប់ខ្លួនលោក កុសល ត្រូវបានធ្វើឡើងមួយថ្ងៃ ក្រោយពេលដែលលោកបានទៅដាក់បញ្ជីឈ្មោះអ្នកសង្កេតការណ៍សម្រាប់ការបោះឆ្នោតព្រឹទ្ធសភា តំណាងឱ្យគណបក្សឆន្ទៈខ្មែរ នៅគណៈកម្មាការរាជធានីខេត្ត រៀបចំការបោះឆ្នោត ។
អ្នកទាំងពីរត្រូវបានចោទពីបទ “ក្លែងបន្លំ” និង “ប្រើប្រាស់លិខិតក្លែង” ដែលប្រឈមនឹងជាប់ពន្ធនាគារពី ១ឆ្នាំ ទៅ ៣ឆ្នាំ ប្រសិនបើរកឃើញថាមានទោស ។
គណបក្សឆន្ទៈខ្មែរ និងគណបក្សពីរផ្សេងទៀតបានចងសម្ព័ន្ធជាមួយគណបក្សភ្លើងទៀនកាលពីចុងឆ្នាំមុននេះ បន្ទាប់ពីគណបក្សភ្លើងទៀនមិនត្រូវបានអនុញ្ញាតឱ្យចូលរួមការបោះឆ្នោតព្រឹទ្ធសភាដោយគណៈកម្មាធិការជាតិរៀបចំការបោះឆ្នោត ជុំវិញការកង្វះឯកសារច្បាប់ដើមសម្រាប់ចុះបញ្ជីគណបក្សនយោបាយ ។ ករណីនេះធ្លាប់កើតមានម្តងហើយកាលពីពេលបោះឆ្នោតថ្នាក់ជាតិ ឆ្នាំ២០២៣ ដែលគណបក្សភ្លើងទៀនមិនត្រូវបានអនុញ្ញាតឱ្យចូលរួមបោះឆ្នោត ដោយមូលហេតុដូចគ្នានេះ ។ ក្រុមគ្រួសាររបស់ពួកគេ បានរាយការណ៍មកថា អ្នកទាំងពីរត្រូវបានសាកសួរនៅឯសាលាដំបូងរាជធានីភ្នំពេញនាព្រឹកនេះ ។
ការចាប់ខ្លួនទាំងនេះត្រូវបានធ្វើឡើងបន្ថែមទៀត បន្ទាប់ពីការចាប់ខ្លួនសមាជិកគណបក្សជំទាស់កាលពីខែមុន ។ លោក ខឹម ចាន់វណ្ណៈ ប្រធានស្តីទីគណបក្សភ្លើងទៀនរាជធានីភ្នំពេញ និង អ្នកស្រី ឆាយ ចិន្តា ដែលជាប្រធានចលនាស្ត្រីគណបក្សភ្លើងទៀនខណ្ឌជ្រោយចង្វារ ដោយអ្នកទាំងពីរត្រូវបានចាប់ខ្លួនកាលពីថ្ងៃទី១៥ ខែមករា ឆ្នាំ២០២៤ ជុំវិញបទចោទ ក្លែងបន្លំ ។ លោក ចាន់វណ្ណៈប្រឈមមុខជាប់ពន្ធនាគារពី ១ឆ្នាំ ដល់ ៣ឆ្នាំ លើបទចោទ ប្រើប្រាស់លិខិតក្លែង ខណៈដែលអ្នកស្រី ចិន្តា ប្រឈមមុខជាប់ពន្ធនាគារពី ៥ឆ្នាំ ទៅ ១០ឆ្នាំ ជុំវិញបទចោទ ក្លែងបន្លំឯកសារសាធារណៈ ។ អ្នកទាំងពីរក៏ត្រូវបាននាំទៅឃុំខ្លួនជាបណ្តោះអាសន្នរង់ចាំសវនាការ ៕
អត្ថបទខ្លីនេះត្រូវបានធ្វើបច្ចុប្បន្នភាពលើបទចោទរបស់លោក ម៉ា ចិន្តា និងលោក ហាក់ កុសល
- ឯកសារទាក់ទង
- ចំណងជើង & មូលបទ
- ការបោះឆ្នោត