សាលាដំបូងខេត្តចំនួនពីរ បានផ្តន្ទាទោសសកម្មជនពីររូបដាក់ពន្ធនាគារ
ចេញផ្សាយ ថ្ងៃទី៧ ខែកុម្ភៈ ឆ្នាំ២០២៤ថ្ងៃទី ៧ ខែកុម្ភៈ ឆ្នាំ២០២៤ សាលាដំបូងខេត្តចំនួនពីរ បានសម្រេចផ្តន្ទាទោសសកម្មជនដ៏លេចធ្លោចំនួន ពីររូប នៅក្នុងសំណុំរឿងចំនួន ពីរ ដាច់ដោយឡែកពីគ្នា ។
សកម្មជនបរិស្ថាន លោក ឆន ផល្លា ត្រូវបានផ្តន្ទាទោសដាក់ពន្ធនាគារចំនួន ១ឆ្នាំ
សាលាដំបូងខេត្តរតនគិរី នាព្រឹកថ្ងៃនេះ បានប្រកាសសាលក្រម ដោយសម្រេចផ្តន្ទាទោសលោក ឆន ផល្លា ពីបទបរិហាកេរ្តិ៍ជាសាធារណៈ ប្រមាថ និងបទ ញុះញង់ឲ្យប្រព្រឹត្តបទឧក្រិដ្ឋជាអាទិ៍ ដោយយោងតាមមាត្រា ៣០៥ ៥០២ និង ៤៩៥ នៃក្រមព្រហ្មទណ្ឌ ។ តុលាការបានផ្តន្ទាទោសលោក ដោយដាក់ពន្ធនាគារកំណត់ចំនួន ១ ឆ្នាំ និងពិន័យជាប្រាក់ចំនួន ១០ លានរៀល (ប្រមាណ ២.៥០០ ដុល្លារអាមេរិក) ។
លោក ផល្លា គឺជាសកម្មជនបរិស្ថានដ៏សកម្មម្នាក់ ហើយលោកធ្លាប់ត្រូវបានតុលាការចោទប្រកាន់ពីបទល្មើសព្រហ្មទណ្ឌ ទាក់ទងនឹងការងារតស៊ូមតិរបស់លោកក្នុងកិច្ចការពារធនធានធម្មជាតិ និងឃ្លាំមើលការកាប់បំផ្លាញព្រៃឈើខុសច្បាប់ ។ លោក ផល្លា ត្រូវបានតុលាការផ្តន្ទាទោសដាក់ពន្ធនាគារកាលពីខែកញ្ញា ឆ្នាំ២០២១ ដោយសារសំណុំរឿងព្រហ្មទណ្ឌពីរផ្សេងទៀត ។ សំណុំរឿងពីរផ្សេងទៀត សុទ្ធតែពាក់ព័ន្ធនឹងភាពសកម្មនិយមរបស់លោក ។ លោក ផល្លា ក្រោយមកត្រូវបានដោះលែងពីពន្ធនាគារកាលពីខែតុលា ឆ្នាំ២០២៣ បន្ទាប់ពីសាលាឧទ្ធរណ៍ត្បូងឃ្មុំបានសម្រេចរួចឱ្យខ្លួនពីបទចោទក្នុងសំណុំរឿងពីរផ្សេងទៀតនោះ ។ ប៉ុន្តែលោក នៅសល់សំណុំរឿងមួយទៀតនៅទើបនឹងត្រូវបានសាលាដំបូងខេត្តរតនគិរីប្រកាសសាលក្រមនាថ្ងៃនេះ ។
មន្ត្រីគណបក្សជំទាស់ លោក ចៅ វាសនា ត្រូវបានតុលាការដាក់ពន្ធនាគារ ៣ ឆ្នាំ
សាលាដំបូងខេត្តបន្ទាយមានជ័យ នាថ្ងៃនេះក៏បានប្រកាសសាលក្រម ដោយបានផ្តន្ទាទោសលោក ចៅ វាសនា ពីបទញុះញង់ឱ្យប្រព្រឹត្តិបទឧក្រិដ្ឋជាអាទិ៍ និង ញុះញង់ឱ្យមានការរើសអើង ដោយយោងតាមមាត្រា ៤៩៤ ៤៩៥ និង ៤៩៦ នៃក្រមព្រហ្មទណ្ឌ ។ លើកនេះ វានៅតែមិនច្បាស់ថាបុគ្គលរូបណា ឬមនុស្សមួយក្រុមណា ដែលត្រូវបានគេរើសអើង ដោយសារសកម្មភាពរបស់លោក វាសនា ហើយដែលផ្ទុយទៅនឹងក្រមព្រហ្មទណ្ឌ ។
តុលាការបានផ្តន្ទាទោសលោក វាសនា ដោយដាក់ពន្ធនាគារកំណត់ចំនួន ៣ ឆ្នាំ ពិន័យជាប្រាក់ចំនួន ៦ លានរៀល (ប្រហែល ១.៥០០ដុល្លារអាមេរិក) និងបង្គាប់ឱ្យសងជំងឺចិត្តទៅដើមបណ្តឹងចំនួន ៨០ លានរៀល (ប្រមាណ ២០.០០០ ដុល្លារអាមេរិក) ។ តុលាការ ក៏បានដកហូតសិទិ្ធបោះឆ្នោត និងសិទិ្ធឈរឈ្មោះឱ្យគេបោះឆ្នោត រយៈពេល ៥ឆ្នាំ ។
លោក វាសនា ដែលជាសមាជិកគណៈកម្មាធិការអចិន្រ្តៃយ៍នៃគណបក្សភ្លើងទៀន និងជាប្រធានគណបក្សភ្លើងទៀនប្រចាំក្រុងប៉ោយប៉ែត ត្រូវបានចាប់ខ្លួនកាលពីខែកក្កដា ឆ្នាំ២០២៣ បន្ទាប់ពីរូបភាពនៃការគូសសន្លឹកឆ្នោតចោលរបស់លោកត្រូវបានបង្ហោះ ទៅក្នុងបណ្តាញសង្គមរបស់លោក ។ ការចាប់ខ្លួននេះ ត្រូវបានធ្វើឡើង ក្រោយពេលលោកទើបត្រូវបានដោះលែងពីពន្ធនាគារ ម ៣ (ពន្ធនាគារត្រពាំងផ្លុង) កាលពីខែកុម្ភៈ ឆ្នាំ២០២២ ក្រោយពេលលោកជាប់ពន្ធនាគារអស់ ៥ ឆ្នាំ ពីបទចោទមួយចំនួនពាក់ព័ន្ធនឹងការអនុវត្តសិទិ្ធនយោបាយរបស់លោក ។ លោក វាសនានាពេលនោះ គឺជាអតីតចៅសង្កាត់ជាប់ឆ្នោតរបស់គណបក្សសង្គ្រោះជាតិ ៕
- ឯកសារទាក់ទង
- ចំណងជើង & មូលបទ
- ការបោះឆ្នោត សិទិ្ធបញ្ចេញមតិ និងចូលរួម