តុលាការកំពូលសម្រេចឱ្យសកម្មជនបឹងកក់ពីររូបរួចផុតពីបទចោទ
ចេញផ្សាយ ថ្ងៃទី២៦ ខែកុម្ភៈ ឆ្នាំ២០២៤
តុលាការកំពូលនៅព្រឹកនេះបានសម្រេចឱ្យសកម្មជនដីធ្លីពីររូបមកពីសហគមន៍បឹងកក់ រួចផុតពីបទចោទ ។ សកម្មជនទាំងពីរ មានលោកយាយ ង៉ែត ឃុន អាយុ៨៣ឆ្នាំ (ហៅយាយម៉ាមី) និងអ្នកស្រី ឆេង លាភ អាយុ៥៨ឆ្នាំ ត្រូវបានសាលាដំបូង និងសាលាឧទ្ធរណ៍ផ្តន្ទាទោសពីបទគំរាមកំហែងថានឹងសម្លាប់ក្នុងខែមីនា ឆ្នាំ២០១២ ។
សមាជិកសហគមន៍បឹងកក់នៅរាជធានីភ្នំពេញ បានប្រឈមនឹងជម្លោះដីធ្លីដ៏រាំរ៉ៃ បន្ទាប់ពីរាជរដ្ឋាភិបាលបានជួលបឹងកក់ ទៅឱ្យក្រុមហ៊ុនឯកជនក្នុងឆ្នាំ ២០០៧ ។ សមាជិកសហគមន៍ជាច្រើននាក់ ធ្លាប់ត្រូវបានតុលាការផ្តន្ទាទោសឱ្យជាប់ពន្ធនាគារជាបន្តបន្ទាប់ និងត្រូវបានកាត់ទោសពីបទល្មើសទាក់ទងនឹងការការពារផ្ទះរបស់ពួកគេ និងហ៊ាននិយាយតវ៉ាទៅនឹងការបណ្ដេញចេញដោយបង្ខំ ។
ការចោទប្រកាន់នេះ គឺពាក់ព័ន្ធនឹងហេតុការណ៍ដែលមានក្រដាសសរសេរជាច្រើនសន្លឹក គំរាមថានឹងសម្លាប់អតីតសមាជិកសហគមន៍ម្នាក់ឈ្មោះ លី មុំ ដែលត្រូវបានរកឃើញនៅរាយប៉ាយនៅខាងមុខផ្ទះរបស់នាង។ អ្នកស្រី លី មុំ បានដាក់ពាក្យបណ្ដឹងទៅលើសមាជិកសហគមន៍បឹងកក់ប្រាំមួយនាក់ ដែលក្នុងនោះរួមទាំង លោកយាយ ង៉ែត ឃុន និងអ្នកស្រី ឆេង លាភផងដែរ ។ ស្រ្ដីទាំងប្រាំមួយនាក់នោះបានអះអាងថា ពួកគេមិនទទួលខុសត្រូវចំពោះការគំរាមកំហែងនោះទេ ។
ទោះបីជា អ្នកស្រី មុំ បានដកពាក្យបណ្ដឹងនៅក្នុងឆ្នាំ ២០១៦ ក៏ដោយ ក៏សមាកជិកសហគមន៍ប្រាំមួយនាក់ នៅតែត្រូវបានសាលាដំបូងរាជធានីភ្នំពេញសម្រេចផ្ដន្ទាទោស យោងតាមមាត្រា ២៣៣ នៃក្រមព្រហ្មទណ្ឌ កាលពីថ្ងៃទី២៤ ខែសីហា ឆ្នាំ២០១៨ ប៉ុន្តែទោសពន្ធនាគារចំនួន ៦ ខែត្រូវបានព្យួរ ។ សកម្មជនដីធ្លី ៤នាក់ ដែលរួមទំាង លោកយាយ ង៉ែត ឃុន និងអ្នកស្រី ឆេង លាភ បានប្ដឹងឧទ្ធរណ៍ទៅសាលាឧទ្ធរណ៍ភ្នំពេញ ហើយនៅថ្ងៃទី៧ ខែកញ្ញា ឆ្នាំ២០២៣ សាលាឧទ្ធរណ៍បានសម្រេចតម្កល់សាលក្រមរបស់សាលាដំបូងទុកជាបានការដដែល ។
លោកយាយ ង៉ែត ឃុន និងអ្នកស្រី ឆេង លាភ គឺជាជនជាប់ចោទតែពីរនាក់ប៉ុណ្ណោះ ដែលប្ដឹងសាទុក្ខទៅ កាន់តុលាការកំពូល ។ នៅថ្ងៃនេះតុលាការកំពូលបានសម្រេចទម្លាក់ចោលការចោទប្រកាន់ខាងលើនេះ គឺអស់រយៈពេលជិត ១២ឆ្នាំ បន្ទាប់ពីព្រឹត្តិការណ៍ដែលកើតមាននៅក្នុងការចោទប្រកាន់បានកើតឡើង ៕
- ឯកសារទាក់ទង
- ចំណងជើង & មូលបទ
- សិទ្ធិដីធ្លី
