អង្គការ លីកាដូ លុបចោលកម្មវិធីទិវាសិទិ្ធនារីអន្តរជាតិនៅក្នុងពន្ធនាគារ ដោយសារការរឹតត្បិតរបស់រាជរដ្ឋាភិបាល
ចេញផ្សាយ ថ្ងៃទី៥ ខែមីនា ឆ្នាំ២០១៥នេះជាការសោកស្តាយយ៉ាងខ្លាំង ដែលអង្គការ លីកាដូ បានប្រកាសថានឹងមិនប្រារព្ធកម្មវិធីប្រចាំឆ្នាំរបស់ខ្លួននៅក្នុងពន្ធនាគារកម្ពុជានាឆ្នាំនេះនោះទេ ក្នុងឱកាសទិវាសិទិ្ធនារីអន្តរជាតិ ដែលជារៀងរាល់ឆ្នាំតែងតែប្រារព្ធធ្វើឡើងនៅថ្ងៃទី៨ ខែមិនា។
អស់រយៈពេល ១៥ឆ្នាំមកហើយ ដែលអង្គការ លីកាដូ បានប្រារព្ធកម្មវីធីនៅក្នុងពន្ធនាគារកម្ពុជា នាថ្ងៃទិវាសិទិ្ធនារីអន្តរជាតិ (IWRD) ដើម្បីផ្តល់នូវកញ្ចប់សម្ភារៈចាំបាច់បន្ថែមទៅអ្នកជាប់ពន្ធនាគារជាស្ត្រី ឆ្មាំពន្ធនាគារជាស្ត្រី និងកុមារជាច្រើន ដែលរស់នៅជាមួយម្តាយក្នុងពន្ធនាគារ។ នៅក្នុងរយៈពេល ១០ឆ្នាំ ចុងក្រោយនេះ អង្គការ លីកាដូ បានរៀបចំកម្មវិធីសប្បាយៗពិសេសនៅក្នុងពន្ធនាគារ រួមមានការថ្លែងសុន្ទរកថា ល្បែងកំសាន្ត ការរាំរបាំប្រពៃណី និងការសំដែងរបស់អ្នកជាប់ពន្ធនាគារផងដែរ។ សកម្មភាពទាំងនេះ ត្រូវបានទទួលស្វាគមន៍យ៉ាងល្អដោយអ្នកជាប់ពន្ធនាគារជាច្រើន និងធ្លាប់ត្រូវបានគាំទ្រដោយអាជ្ញាធរពន្ធនាគារផងដែរ។
ក៏ប៉ុន្តែ ការរឹតត្បិតលើសកម្មភាពអបអរសាទរទិវាសិទិ្ធនារីអន្តរជាតិនៅក្នុងពន្ធនាគារ បានចាប់ផ្តើមកើតមានឡើងកាលពីឆ្នាំមុន ហើយការរឹតត្បិតចុងក្រោយបានរារាំង អង្គការ លីកាដូ ពីការប្រារព្ធទិវាសិទិ្ធនារីអន្តរជាតិនៅក្នុងពន្ធនាគារ។ ការរឹតត្បិតនាឆ្នាំនេះ បានហាមឃាត់គ្រប់ទម្រង់នៃការកំសាន្ត ឬព្រឹត្តិការណ៍កំសាន្តទាំងឡាយ ដោយអនុញ្ញាតឲ្យអង្គការ លីកាដូ ត្រឹមតែផ្តល់នូវកញ្ចប់សម្ភារៈចាំបាច់ប៉ុណ្ណោះ។ ដោយមានការរឹតត្បិតនាពេលបច្ចុប្បន្ននេះ គឺមិនមានការធានាទេថាស្ត្រីទាំងនោះនឹងអាចទទួលបាននូវកញ្ចប់សម្ភារៈទាំងនោះពេញលេញ ឬទទួលបានពេលវេលាចេញក្រៅបន្ទប់បន្ថែមនាថ្ងៃនោះ។
ដោយការកំណត់នូវលក្ខខណ្ឌទាំងនេះ រាជរដ្ឋាភិបាល កំពុងដកហូតសិទិ្ធក្នុងការចូលរួមប្រារព្ធទិវាសិទិ្ធនារីអន្តរជាតិរបស់អ្នកជាប់ពន្ធនាគារជាស្ត្រី។
កាលពីឆ្នាំកន្លងទៅ អង្គការ លីកាដូ ក៏បានមានឱកាសសំនេះសំណាលជាមួយស្ត្រីទាំងនោះអំពីអត្ថន័យនៃទិវាសិទិ្ធនារីអន្តរជាតិ និងសិទិ្ធរបស់អ្នកទាំងនោះដែលជាស្ត្រីផង និងជាអ្នកជាប់ពន្ធនាគារផង។ អាជ្ញាធរជាច្រើន បានប្រាប់អង្គការ លីកាដូ ថាសកម្មភាពទាំងនេះ នឹងមិនអាចធ្វើបានតទៅទៀតទេនាឆ្នាំនេះ។
អ្នកនាង នូ សមអន អ្នកគ្រប់គ្រងគម្រោងពន្ធនាគារនៃអង្គការសម្ព័ន្ធខ្មែរជំរឿន និងការពារសិទិ្ធមនុស្ស “លីកាដូ” បានមានប្រសាសន៍ថា៖ “ដោយការកំណត់នូវលក្ខខណ្ឌទាំងនេះ រាជរដ្ឋាភិបាល កំពុងដកហូតសិទិ្ធក្នុងការចូលរួមប្រារព្ធទិវាសិទិ្ធនារីអន្តរជាតិរបស់អ្នកជាប់ពន្ធនាគារជាស្ត្រី។” អ្នកនាងបានបន្តទៀតថា៖ “ការដកចេញកម្មវិធីនេះ គឺត្រឹមតែធ្វើឲ្យភាគច្រើននៃស្ត្រីជាប់ពន្ធនាគារទាំងនោះដែលតែងតែនៅឯកោ និងដាច់ឆ្ងាយរាល់ថ្ងៃ កាន់នៅឯកោ និងដាច់ឆ្ងាយថែមទៀត។”
ទិវាសិទិ្ធនារីអន្តរជាតិ ត្រូវបានប្រារព្ធធ្វើឡើងទូទាំងពិភពលោកសម្រាប់សិទិ្ធសង្គម សេដ្ឋកិច្ច សិទិ្ធពលរដ្ឋ និងនយោបាយរបស់ស្ត្រី ក៏ដូចជាដើម្បីពិភាក្សាអំពីបញ្ហាប្រឈមដែលកំពុងបន្តកើតមានឡើងទៅលើស្ត្រី។ នៅក្នុងប្រទេសកម្ពុជា ស្ត្រីដែលជាប់ពន្ធនាគារ នៅតែងាយរងគ្រោះខ្លាំង និងមិនត្រូវបានគេអើពើ ហើយអង្គការ លីកាដូ បានរៀបចំកម្មវិធីនេះឡើង ដើម្បីអបអរសាទរទិវានេះ និងធានាថាអ្នកជាប់ពន្ធនាគារជាស្ត្រី មិនស្ថិតនៅឯកោ ឬត្រូវបានគេបំភ្លេចចោលនោះទេ។
កាលពីឆ្នាំកន្លងទៀត ការកើនឡើងនៃការរឹតត្បិត ត្រូវបានដាក់មកលើសកម្មភាពប្រចាំឆ្នាំរបស់អង្គការ លីកាដូ ក្នុងការប្រារព្ធទិវាសិទិ្ធកុមារអន្តរជាតិ និងទិវាសិទិ្ធមនុស្សអន្តរជាតិ។ អង្គការ លីកាដូ មានការព្រួយបារម្ភជាខ្លាំង ថាសកម្មភាពនេះក៏អាចនឹងធ្វើឲ្យមានការលុបចោលសកម្មភាពនាពេលខាងមុខនាថ្ងៃដ៏សំខាន់ទាំងនេះផងដែរ។
លោកស្រី វេជ្ជបណ្ឌិត ពុង ឈីវ កេក ប្រធានអង្គការ លីកាដូ បានមានប្រសាសន៍ថា៖ “យើងខ្ញុំសង្ឃឹមថា ការរឹតត្បិតទាំងនេះ នឹងមិនក្លាយជាបទដ្ឋាន ហើយនាពេលអនាគតយើងខ្ញុំនឹងអាចបន្តធ្វើសកម្មភាពដ៏មានអត្ថន័យទាំងនេះនាថ្ងៃពិសេសៗនៅក្នុងពន្ធនាគារកម្ពុជាបានតទៅទៀត”។ “ជូនចំពោះស្ត្រីទាំងឡាយដែលកំពុងជាប់ក្នុងពន្ធនាគារ និងស្ត្រីទាំងឡាយដែលកំពុងធ្វើការក្នុងពន្ធនាគារ អ្នកនៅតែស្ថិតនៅក្នុងបេះដូង និងចិត្តរបស់យើងខ្ញុំជានិច្ច។”
សម្រាប់ព័ត៌មានបន្ថែម សូមទាក់ទង៖
▪ លោកស្រី វេជ្ជបណ្ឌិត ពុង ឈីវកេក, ប្រធានអង្គការ លីកាដូ, ទូរស័ព្ទលេខ៖ ០១២ ៨០២ ៥០៦ (ភាសាខ្មែរ អង់គ្លេស បារាំង)
▪ អ្នកនាង នូ សមអន, អ្នកគ្រប់គ្រងគម្រោងពន្ធនាគារនៃអង្គការ លីកាដូ, ទូរស័ព្ទលេខ៖ ០១២ ៤៩៣ ២៨៧ (ភាសាខ្មែរ)
PDF៖ ទាញយកសេចក្តីថ្លែងការណ៍ជាភាសាអង់គ្លេស - ទាញយកសេចក្តីថ្លែងការណ៍ជាភាសាខ្មែរ
MP3៖ ស្តាប់សំឡេងជាភាសាខ្មែរ
- ឯកសារទាក់ទង
- ចំណងជើង & មូលបទ
- ទិវាសិទ្ធិមនុស្សអន្តរជាតិ បញ្ហាពន្ធនាគារ សិទ្ធិស្ត្រី