ការស្នើឱ្យរាជរដ្ឋាភិបាលកម្ពុជា លុបចោលអាជ្ញាប័ណ្ណនាំចេញឈើទៅបរទេស របស់ក្រុមហ៊ុនអង្គរផ្លាយវូត ខូ អិលធីឌី
ចេញផ្សាយ ថ្ងៃទី១០ ខែតុលា ឆ្នាំ២០២៣; ក្រុមសង្គមស៊ីវិលសមាគម អង្គការមិនមែនរដ្ឋាភិបាល សហជីព សហគមន៍មូលដ្ឋាន និងក្រុមយុវជន មានសេចក្តីព្រួយបារម្ភយ៉ាងខ្លាំងក្រោយទទួលបានព័ត៌មានពីការស្នើសុំពន្យាពេលនាំឈើចេញរយៈពេល ៥ឆ្នាំបន្ថែមទៀតរបស់ក្រុមហ៊ុន អង្គរផ្លាយវូត ខូ អិលធីឌី ចាប់ពីឆ្នាំ២០២២ ដល់ឆ្នាំ២០២៦។ យោងតាមការចុះផ្សាយរបស់វិទ្យុអាស៊ីសេរី កាលពីថ្ងៃទី៧ ខែកក្កដា ឆ្នាំ២០២៣ ក្រោមចំណងជើង "ក្រុមហ៊ុនអង្គរផ្លាយវូតនៅតែបន្តនាំចេញឈើកម្រទៅលក់នៅក្រៅប្រទេស " ដែលបានចុះផ្សាយពីការអនុញ្ញាតរបស់ទីស្តីការគណៈរដ្ឋមន្ត្រីសម្រេចពន្យាពេលនៃការនាំឈើចេញ រហូតដល់ដំណាច់ឆ្នាំ២០២៣ តបតាមការស្នើសុំរបស់ក្រុមហ៊ុន នេះ ដែលបានស្នើសុំពន្យាពេលនាំឈើចេញរយៈពេល៥ឆ្នាំបន្ថែម។
យោងតាមសេចក្តីសម្រេចលេខ ៧៣៩ ស.ជ.ណ ចុះថ្ងៃទី១៥ ខែធ្នូ ឆ្នាំ២០២១ រាជរដ្ឋាភិបាលបានអនុញ្ញាតឱ្យក្រុមហ៊ុនអង្គរផ្លាយវូត ខូ អិលធីឌី ទទួលបានការពន្យាពេលនាំចេញផលិតផលឈើកែច្នៃចំនួន ១០៣.៧៦៣,១៥ម៉ែត្រគូប ដែលនៅសល់ពីការអនុញ្ញាតកាលពីឆ្នាំ២០១៦ ឱ្យបន្តការនាំចេញរហូតដល់ថ្ងៃទី៣១ ខែធ្នូ ឆ្នាំ២០២៣។ ការអនុញ្ញាតរបស់រាជរដ្ឋាភិបាលខាងលើនេះ បានឱ្យនាំចេញតែប្រភេទឈើកែច្នៃ ដូចជា ក្តារបន្ទះ ក្តារកម្រាលការ៉ូ និងផលិតផលកែច្នៃផ្សេងៗទៀតដែលផលិតពីឈើកិន (Core Veneer) តែផ្ទុយទៅវិញក្រុមហ៊ុនបាននាំចេញឈើកម្រជាច្រើនប្រភេទដូចជា ស្រឡៅ កកោះ ផ្ចឹក សុក្រមជាដើម ចំនួន ២,២៣៥,៨៤០គីឡូក្រាម ទៅកាន់ប្រទេសវៀតណាម បើយោងតាមបញ្ជីនាំចេញឈើរបស់ក្រុមហ៊ុន ដែលបានចុះផ្សាយថ្ងៃទី១៩ ខែមីនា ឆ្នាំ២០២៣។
ផ្អែកតាមទិន្នន័យនាំឈើចេញខាងលើ ដែលផ្ទុយពីការអនុញ្ញាតរបស់រាជរដ្ឋាភិបាលកម្ពុជា ខណៈអង្គការជាតិ-អន្តរជាតិ និងសហគមន៍មូលដ្ឋាន ធ្លាប់រកឃើញបន្តបន្ទាប់ពីការកាប់បំផ្លាញព្រៃឈើនៅក្នុងតំបន់ការពារធម្មជាតិ និងតំបន់អភិរក្ស។ ដើម្បីរក្សាបាននូវនិរន្តរភាពធនធានធម្មជាតិនៅកម្ពុជា ព្រមទាំង តបនឹងសេចក្តីព្រួយបារម្ភខាងលើ យើងខ្ញុំទាំងអស់គ្នាដែលជាសមាគម អង្គការមិនមែនរដ្ឋាភិបាល សហជីព សហគមន៍មូលដ្ឋាន និងក្រុមយុវជន ស្នើសុំដល់រាជរដ្ឋាភិបាលកម្ពុជាលុបអាជ្ញាប័ណ្ណអនុញ្ញាតការនាំឈើចេញ របស់ក្រុមហ៊ុនអង្គរ ផ្លាយវូត ខូ អិលធីឌី និងធ្វើការស៊ើបអង្កេតអំពីការនាំចេញប្រភេទឈើកម្រដែលផ្ទុយពីច្បាប់នៃព្រះរាជាណាចក្រកម្ពុជាទៅបរទេស៕
សេចក្តីថ្លែងការណ៍នេះគាំទ្រដោយ៖
១. សមាគមបណ្តាញយុវជនកម្ពុជា (CYN)
២. សមាគមសម្ពន្ធនិស្សិតបញ្ញវន្តខ្មែរ (KSILA)
៣. អង្គការសម្ព័ន្ធដើម្បីសុចរិតភាព និងគណនេយ្យភាពសង្គម (CISA)
៤. សមាគមការពារសិទ្ធិមនុស្ស និងអភិវឌ្ឍន៍នៅកម្ពុជា (ADHOC)
៥. មជ្ឈមណ្ឌលសម្ព័ន្ធភាពការងារ និង សិទ្ធិមនុស្ស (CENTRAL)
៦. សហព័ន្ធសហជីព កម្មករចំណីអាហារ និងសេវាកម្ម កម្ពុជា (CFSWF)
៧. គណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា (COMFREL )
៨. សហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនការស៊ីណូណាហ្គាវើលដ៍ (LRSU)
៩. សហព័ន្ធសហជីពកម្មករនយោជិតវិស័យទេសចរណ៍កម្ពុជា (CTWUF)
១០. សហព័ន្ធសហជីពឯករាជ្យ (INTUFE)
១១. មជ្ឈមណ្ឌលប្រជាពលរដ្ឋដើម្បីអភិវឌ្ឍន៍និងសន្តិភាព (PDP-Center)
១២. សមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA)
១៣. អង្គការអភិវឌ្ឍន៍ធនធានយុវជន (YRDP)
១៤. វិទ្យាស្ថានប្រជាធិបតេយ្យកម្ពុជា (CID)
១៥. សម្ព័ន្ធខ្មែរជំរឿននិងការពារសិទ្ធិមនុស្ស (LICADHO)
១៦. ក្រុមយុវជនចលនាមាតាធម្មជាតិ (MNC)
១៧. បណ្តាញសហគមន៍ព្រៃឡង់ (PLCN)
១៨. ក្លឹបមិត្តអ្នកអានសៀវភៅ (រាជធានីភ្នំពេញ)
១៩. ក្រុមយុវជន The Forest Guad (រាជធានីភ្នំពេញ)
២០. សហគមន៍ជនជាតិដើមភាគតិចបាក្លែ (ខេត្តក្រចេះ)
២១. សហគមន៍ព្រៃឈើក្បាលខ្លា (ខេត្តកំពង់ធំ)
២២. សហគមន៍នេសាទបឹងធំ (ខេត្តកំពង់ធំ)
២៣. សហគមន៍ព្រៃមេត្តាធម្មជាតិ (ខេត្តកំពង់ស្ពឺ)
២៤. សហគមន៍រងគ្រោះដីធ្លីតានូន (ខេត្តកោះកុង)
សម្រាប់ព័ត៌មានបន្ថែម សូមទាក់ទង៖
▪ លោក ហេង គឹមហុង ប្រធានផ្នែកកម្មវិធីស្រាវជ្រាវ និងតស៊ូមតិនៃសមាគមបណ្តាញយុវជនកម្ពុជា តាមរយៈលេខទូរស័ព្ទ 0967888368 / 092667599
▪ លោក កើត សារ៉ាយ ប្រធានសមាគមសម្ពន្ធនិស្សិតបញ្ញវន្តខ្មែរ តាមរយៈលេខទូរស័ព្ទ 096 242 4393
PDF៖ ទាញយកសេចក្តីថ្លែងការណ៍ជាភាសាអង់គ្លេស - ទាញយកសេចក្តីថ្លែងការណ៍ជាភាសាខ្មែរ
MP3៖ ស្តាប់សំឡេងជាភាសាខ្មែរ
- ចំណងជើង & មូលបទ
- បញ្ហាបរិស្ថាន សិទិ្ធបញ្ចេញមតិ និងចូលរួម