ស្ត្រីរួមគ្នាដើម្បីសិទិ្ធការងារ ៖ រឿងរ៉ាវនៃការតស៊ូចំនួន ៦
ចេញផ្សាយ ខែវិច្ឆិកា ឆ្នាំ២០២២ ទាញយករបាយការណ៍សង្ខេបជាភាសាខ្មែរ (PDF, 1.47 MBs) | |
ទាញយករបាយការណ៍សង្ខេបជាភាសាអង់គ្លេស (PDF, 1.35 MBs) | |
ស្តាប់សំឡេងជាភាសាខ្មែរ |
ក្នុងឱកាសនៃយុទ្ធនាការ ១៦ថ្ងៃនៃភាពសកម្មនិយមប្រឆាំងនឹងអំពើហិង្សាផ្អែកលើយេនឌ័រ អង្គការ លីកាដូ សូមធ្វើការកោតសរសើរយ៉ាងខ្លាំងក្លាដល់ស្ត្រីទាំងឡាយ ដែលក្លាហានក្នុងការក្រោកឈរដើម្បីសិទិ្ធការងារ និងតស៊ូទាមទារឱ្យបញ្ឈប់អំពើហិង្សាផ្អែកលើយេនឌ័រនៅកន្លែងធ្វើការងារ ។ នៅក្នុងរបាយការណ៍សង្ខេបដែលមានចំណងជើងថា “ស្ត្រីរួមគ្នាដើម្បីសិទិ្ធការងារនៅកម្ពុជា” អង្គការ លីកាដូ នឹងធ្វើការលើកឡើងនូវរឿងរ៉ាវតស៊ូ និងការផ្តល់យោបល់មួយចំនួនរបស់សកម្មជនជាស្ត្រីចំនួន ៦ រូប ដែលបានតស៊ូក្នុងនាមជាអ្នកដឹកនាំ និងសមាជិកសហជីព សមាគម និងសហព័ន្ធសហជីព ។
អ្នកទាំងនោះ ជាអ្នកតំណាងឱ្យកម្មកររោងចក្រ អ្នកប្រកបរបរផ្លូវភេទ សេវាកំសាន្ត បុគ្គលិកកាស៊ីណូ គ្រូបង្រៀន អ្នកបើករ៉ឺម៉កកង់បី (តុតុ) អ្នកធ្វើការងារតាមផ្ទះជាច្រើននាក់ និងកម្មករក្នុងវិស័យផ្សេងៗទៀត ។ ពួកគេអំពាវនាវឱ្យមានការបញ្ឈប់អំពើហិង្សា និងការរំលោភបំពានផ្លូវភេទ ដែលសមាជិករបស់អ្នកទាំងនោះតែងតែទទួលរងនៅកន្លែងធ្វើការងារ ។
អ្នកនាង ណាលី ពីឡូក នាយិកាទទួលបន្ទុកកិច្ចការក្រៅតំបន់នៃអង្គការលីកាដូ បានមានប្រសាសន៍ថា៖ “ស្ត្រីកាន់តែច្រើនកំពុងឈរនៅជួរមុខនៅក្នុងចលនាតស៊ូដើម្បីសិទិ្ធការងារនៅកម្ពុជា” ។ អ្នកនាងបានបន្តទៀតថា៖ “ស្ត្រីទាំងនោះកំពុងតស៊ូដើម្បីសិទិ្ធរបស់កម្មករ ដែលកំពុងប្រឈមមុខនឹងគ្រប់ទម្រង់នៃការកេងប្រវ័ញ្ច” ។
សកម្មជនទាំងនេះ ត្រូវបានគេបញ្ឈប់ពីការងារ ចាប់ដាក់ពន្ធនាគារ វាយដំលើរូបរាងកាយ គម្រាមកំហែង និងរងការរិះគន់អំពីការពារសិទិ្ធនិងផលប្រយោជន៍កម្មករ ។
អ្នកទាំងនោះ ត្រូវបានគេប្រាប់ថាដោយសារពួកគេជាស្រ្តី ដូចនេះពួកគេមិនអាចធ្វើជាអ្នកដឹកនាំសហជីព សហគមន៍ និងគ្រួសារបានទេ ។
លោក អំ សំអាត នាយកទទួលបន្ទុកកិច្ចការទូទៅនៃអង្គការលីកាដូ មានប្រសាសន៍ថា៖ “សកម្មជនសិទិ្ធការងារជាស្ត្រីជាច្រើន កំពុងប្រឈមនឹងការរំលោភបំពានពីនិយោជក និងអាជ្ញាធរមួយចំនួន ក៏ដូចជារងការរិះគន់ពីសង្គម នៅពេលអ្នកទាំងនោះកាន់តួនាទីជាអ្នកដឹកនាំ” ។ លោក បានបន្ថែមថា៖ “ការងាររបស់អ្នកទាំងនោះ ត្រូវតែត្រូវបានគេទទួលស្គាល់ និងទទួលបានការគាំទ្រ”។
ទោះជាប្រឈមមុខនឹងបញ្ហាប្រឈមជាច្រើនយ៉ាងណាក៏ដោយ ក៏សកម្មជនសិទិ្ធការងារទាំងនេះនៅតែបន្តឈរយ៉ាងរឹងមាំ និងមានការតាំងចិត្តខ្ពស់ក្នុងការលើកឡើងជាសាធារណៈពីបញ្ហាសិទិ្ធការងារ និងធានាថាមនុស្សគ្រប់គ្នាអាចធ្វើការងារនៅក្នុងលក្ខខណ្ឌមួយដែលមានសុវត្ថិភាព យុត្តិធម៌ និងមិនមានអំពើហិង្សាដោយផ្អែកលើយេនឌ័រ ។
នៅក្នុងរយៈពេល ១៦ ថ្ងៃ នៃយុទ្ធនាការ ដែលគិតចាប់ពីថ្ងៃទី២៥ ខែវិច្ឆិកា ដល់ថ្ងៃទី១០ ខែធ្នូ អង្គការ លីកាដូ នឹងធ្វើការចេញផ្សាយនូវវីដេអូខ្លីៗ អំពីសកម្មជនជាស្ត្រីទាំងនោះនិយាយអំពីភាពក្លាហានក្នុងការបញ្ចេញមតិ និងរឿងរ៉ាវតស៊ូចេញពីការគាបសង្កត់នានា ។
សម្រាប់ព័ត៌មានបន្ថែម សូមទាក់ទង៖
▪ លោក អំ សំអាត, នាយកទទួលបន្ទុកកិច្ចការទូទៅនៃអង្គការលីកាដូ, លេខទូរស័ព្ទ ៖ (+៨៥៥) ១០ ៣២៧ ៧៧០ (ភាសាខ្មែរ)
▪ អ្នកនាង ណាលី ពីឡូក, នាយិកាទទួលបន្ទុកកិច្ចការក្រៅតំបន់នៃអង្គការលីកាដូ, លេខទូរស័ព្ទ ៖ (+៨៥៥) ១២ ២១៤ ៤៥៤ (ភាសាអង់គ្លេស)
▪ អ្នកស្រី ឃ្លាំង សុបិន្ត, អគ្គលេខាធិការនៃសហជីពទ្រទ្រង់សិទិ្ធការងារ បុគ្គលិក កម្មករខ្មែរនៃក្រុមហ៊ុនណាហ្គាវើលដ៏ (LRSU), លេខទូរស័ព្ទ៖ (+៨៥៥) ៨១ ៥២៥ ៤៦១
▪ អ្នកស្រី អ៊ុក ឆាយ៉ាវី, ប្រធានសមាគមគ្រូបង្រៀនកម្ពុជាឯករាជ្យ (CITA), លេខទូរស័ព្ទ៖ (+៨៥៥) ១៦ ៥២៥ ២៩៣
▪ សារិន សុវណ្ណនី, មន្ត្រីចងក្រងក្នុងខេត្តកំពង់ស្ពឺ នៃសហព័ន្ធសហជីពកម្ពុជា (CATU), លេខទូរស័ព្ទ៖ (+៨៥៥) ៨១ ២៤៦ ៥០៥
▪ សុខ ស្រីលាភ, បុគ្គលិកយុទ្ធនាការនៃអង្គការបណ្ដាញការងារស្ត្រីរួបរួមគ្នា (WNU), លេខទូរស័ព្ទ៖ (+៨៥៥) ៩៩ ៣២៣ ៨៩២
▪ សុវណ្ណ វ៉ារី, ប្រធានគណៈកម្មការស្ត្រីនៃសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA), លេខទូរស័ព្ទ៖ (+៨៥៥) ៩៦២ ៦៨៧ ៩៤៧
- ឯកសារទាក់ទង
- ចំណងជើង & មូលបទ
- សិទិ្ធបញ្ចេញមតិ និងចូលរួម សិទ្ធិការងារ សិទ្ធិស្ត្រី