████████ ██████ ██ ███████ ████ █████ ██ ████ ████ █████ ████████ ███ █████████████
ចេញផ្សាយ ថ្ងៃទី៣ ខែមករា ឆ្នាំ២០២៣
កាលពីថ្ងៃទី៩ ខែមករា ឆ្នាំ២០២៣ មន្ត្រីនគរបាលនៃស្នងការដ្ឋាននគរបាលរាជធានីភ្នំពេញ បានជម្រាបមកនាយកទទួលបន្ទុកកិច្ចការទូទៅនៃអង្គការលីកាដូ អំឡុងពេលសាកសួរថា ប្រសិនបើអង្គការ លីកាដូ មិនយល់ព្រមលុបវីដេអូចម្រៀងដែលមានចំណងជើងថា “ឈាមបាតុករ” ពីបណ្តាញសង្គម និងគេហទំព័ររបស់អង្គការនោះទេ នោះអាជ្ញាធរនឹងមានវិធានការផ្លូវច្បាប់បន្ត ។
ដើម្បីជៀសវាងពីការទទួលរងនូវវិធានការផ្លូវច្បាប់បន្ត អង្គការ លីកាដូ សម្រេចចិត្តលុបវីដេអូចម្រៀងចេញពីបណ្តាញសង្គមរបស់អង្គការកាលពីយប់មិញ និងចេញពីគេហទំព័រនៅព្រឹកនេះ ។
អង្គការ លីកាដូ នៅតែជឿជាក់យ៉ាងមុតមាំថា វីដេអូចម្រៀងនេះ មិនមែនជាបទល្មើសញុះញង់នោះទេ ហើយផ្ទុយទៅវិញការចេញផ្សាយវីដេអូ គឺជាសេរីភាពក្នុងការបញ្ចេញមតិដែលត្រូវបានការពារដោយច្បាប់រដ្ឋធម្មនុញ្ញ ។ យើងមានការសោកស្តាយយ៉ាងខ្លាំង ចំពោះការរឹតត្បិតសេរីភាពក្នុងការបញ្ចេញមតិនេះ ។ វាគឺជាលើកទីមួយហើយក្នុងរយៈពេល ៣០ឆ្នាំ នៃការធ្វើការងារសិទិ្ធមនុស្សរបស់ អង្គការ លីកាដូ ដែលអាជ្ញាធររដ្ឋបានចាត់វិធានការផ្លូវច្បាប់តាមសំណើសុំរបស់ក្រសួងវប្បធម៌ និងវិចិត្រសិល្បៈ ទាក់ទងនឹងការបង្ហោះរបស់អង្គការ លីកាដូ លើគេហទំព័រ និងបណ្តាញសង្គមរបស់ស្ថាប័ន ។
វីដេអូចម្រៀងនេះ គឺជាការប្រារព្ធខួប ៩ ឆ្នាំ នៃអំពើហិង្សានៅលើផ្លូវវេងស្រេង ដែលបណ្តាលឱ្យមនុស្សចំនួន ៤នាក់ បានស្លាប់ រងរបួសចំនួន ៣៨នាក់ (ដែល ២៥នាក់ រងរបួសដោយសារគ្រាប់កាំភ្លើង) និងកុមារាម្នាក់អាយុ ១៥ ឆ្នាំនៅពេលនោះ បានបាត់ខ្លួន ។ វីដេអូនេះ គឺជាកម្រងរីដេអូខ្លីៗជាប្រវត្តិសាស្ត្រ ដែលត្រូវបានថតបាននៅក្នុងព្រឹត្តិការណ៍នៅលើផ្លូវ និងនៅជុំវិញតំបន់នោះ កាលពីឆ្នាំ ២០១៤ នៅពេលដែលកម្មករជាកូដករបានប៉ះទង្គិចគ្នាជាមួយកងកម្លាំងប្រដាប់អាវុធយ៉ាងច្រើនសន្ធឹកសន្ធាប់ ។
ការស៊ើបអង្កេតមួយរបស់នគរបាលលើការបង្ហោះវីដេអូនេះ ត្រូវបានធ្វើដោយតាមរយៈលិខិតស្នើសុំមួយច្បាប់របស់ក្រសួងវប្បធម៌ និងវិចិត្រសិល្បៈ ។
អង្គការ លីកាដូ នៅតែបន្តឈរជាសាមគ្គីភាពជាមួយជនរងគ្រោះពីព្រឹត្តិការណ៍ហិង្សាលើផ្លូវវេងស្រេង ។ មកដល់ថ្ងៃនេះ អាជ្ញាធរមិនទាន់រកឃើញជនណាម្នាក់ ដែលជាអ្នកទទួលខុសត្រូវលើការស្លាប់របស់កម្មករចំនួន ៤នាក់ គឺ លោក គឹម ផាលាប លោក សាម រ៉ាវី លោក យាន រឹទ្ធី និងលោកផេង កុសល និងការបាត់ខ្លួនរបស់កុមារ ខឹម សាផាត នៅឡើយ ។
អង្គការ លីកាដូ នឹងបន្តអំពាវនាវដល់អាជ្ញាធរ សូមឱ្យមាននូវការស៊ើបអង្កេតដោយឯករាជ្យទៅលើអំពើហិង្សា ការស្លាប់ និងការបាត់ខ្លួន ដែលបានកើតឡើងកាលពីថ្ងៃទី៣ ខែមករា ឆ្នាំ២០១៤ ទប់ស្កាត់កុំឱ្យកើតមាននូវអំពើហិង្សាដ៏អាក្រក់ដូចនេះបន្តទៀត និងបន្តប្រារព្ធខួបនៃអំពើហិង្សានៅលើផ្លូវវេងស្រេងនៅឆ្នាំក្រោយៗទៀត ។
អង្គការ លីកាដូ ក៏នឹងបន្តអំពាវនាវដល់អាជ្ញាធររដ្ឋ សូមគោរពនូវសេរីភាពក្នុងការបញ្ចេញមតិរបស់ប្រជាពលរដ្ឋ ដែលរួមទាំងសកម្មជន សិល្បករ សិល្បការិនី និងបុគ្គលិកអង្គការ សង្គមស៊ីវិលទាំងឡាយ ។
--
នៅថ្ងៃនេះ គឺជាគម្រប់ខួប ៩ ឆ្នាំ ក្រោយពីកងកម្លាំងចម្រុះបានបាញ់រះទៅលើកម្មករដែលកំពុងតវ៉ានៅមហាវិថីវេងស្រេងកាលពីដើមឆ្នាំ ២០១៤ ដោយបានសម្លាប់មនុស្សយ៉ាងតិចណាស់ ៤នាក់ និងបណ្តាលឱ្យមនុស្សយ៉ាងតិចណាស់ ៣៨ នាក់ផ្សេងទៀតរងរបួស ។ ក្មេងប្រុសម្នាក់ឈ្មោះ ខឹម សាផាត ដែលកាលនោះមានអាយុ ១៥ឆ្នាំ បានបាត់ខ្លួនមកទល់សព្វថ្ងៃ ដោយកុមារានោះត្រូវបានគេឃើញចុងក្រោយ ដោយមានអាការៈហូរឈាមដោយសារត្រូវគ្រាប់កាំភ្លើង ។
រហូតមកដល់ពេលនេះ នៅមិនទាន់មានការចាត់វិធានការលើជនល្មើស ដែលបានបាញ់សម្លាប់ លោក គឹម ផាលាប លោក សាម រ៉ាវី លោក យាន រឹទ្ធី និងលោកផេង កុសល និងការធ្វើឱ្យកុមារា ខឹម សាផាត បាត់ខ្លួននោះទេ ។ ផ្ទុយទៅវិញ កម្មករ និងអ្នកការពារសិទិ្ធមនុស្ស ចំនួន ២៣ នាក់ បែរជាត្រូវបានអាជ្ញាធរចាប់ខ្លួន ចោទប្រកាន់ និងផ្តន្ទាទោសដោយមិនត្រឹមត្រូវពីបទល្មើសមួយចំនួនទាក់ទងនឹងការធ្វើបាតុកម្មទៅវិញ ។ ក្រោយមកកម្ទេចឆ្អឹង និងសំណល់សាកសពមួយចំនួន ដែលនៅសេសសល់ក្រោយពីការដុតដោយកៅស៊ូកង់ឡាន ត្រូវបានរកឃើញនៅក្នុងមូលដ្ឋានកងពលតូចលេខ ៧០ ក្នុងខេត្តកំពង់ស្ពឺ កាលពីខែឧសភា ឆ្នាំ ២០១៤ ប៉ុន្តែអាជ្ញាធររដ្ឋបានបដិសេធ ដោយបានលើកឡើងថាសំណល់សាកសពនោះ មិនមែនជារបស់ខឹម សាផាត នោះទេ ។ គួរឱ្យសោកស្តាយ អាជ្ញាធរ មិនបានស៊ើបអង្កេតឱ្យបានម៉ត់ចត់ និងប្រកបដោយតម្លាភាព ទៅលើករណីនេះទេ ។
នៅថ្ងៃនេះ សូមសាធារណជនស្តាប់ និងទស្សនា នូវបទចម្រៀងរ៉េបរបស់ លោក គា សុគន្ធ ដែលមានចំណងជើងថា “ឈាមបាតុករ” ដែលចេញផ្សាយដោយសម្ព័ន្ធខ្មែរជំរឿន និងការពារសិទិ្ធមនុស្ស លីកាដូ និង អង្គការមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) ។ បន្ទាប់ពី ៩ ឆ្នាំ ទទួលរងភាពឈឺចាប់ និងស្រពិចស្រពិលអំពីស្ថានភាពកូនរបស់ខ្លួន ក្រុមគ្រួសារកុមារា ខឹម សាផាត ត្រូវតែទទួលបាននូវចម្លើយ សន្តិភាពផ្លូវចិត្ត និងយុត្តិធម៌ ពីការស៊ើបអង្កេតដោយឯករាជ្យ និងឆាប់រហ័សទៅលើការបាត់ខ្លួនរបស់សាផាត ។ យើងខ្ញុំក៏នៅបន្តអំពាវនាវឱ្យមានយុត្តិធម៌សម្រាប់អ្នកដែលបានរងរបួស ស្លាប់ និងអ្នកដែលត្រូវបានអាជ្ញាធរចាប់ឃុំខ្លួន ចោទប្រកាន់ និងផ្តន្ទាទោសដោយមិនត្រឹមត្រូវ ក៏ដូចជាកុមារា ខឹម សាផាត ដែលបានបាត់ខ្លួន ៕
- ឯកសារទាក់ទង
- ចំណងជើង & មូលបទ
- តុលាការ និងនីតិរដ្ឋ សិទិ្ធបញ្ចេញមតិ និងចូលរួម បញ្ហាពន្ធនាគារ អំពើហិង្សាវ៉េង ស្រេង
