ការអំពាវនាវរកយុត្តិធម៌ចំពោះឃាតកម្មលើលោក ជា វិជ្ជា៖ ២០ឆ្នាំដែលគ្មានការវិវត្តន៍
ចេញផ្សាយ ថ្ងៃទី២២ ខែមករា ឆ្នាំ២០២៤
មនុស្សប្រហែលជាង ១០០ នាក់បានជួបជុំគ្នានៅលើសួនច្បារមុខវត្តលង្កាក្នុងរាជធានីភ្នំពេញព្រឹកនេះ ដើម្បីធ្វើការទាមទាររកយុត្តិធម៌ចំពោះឃាតកម្មលើប្រធានសហជីព លោក ជា វិជ្ជា ។ លោក ជា វិជ្ជា ដែលជាប្រធានសហជីពសេរីកម្មករនៃព្រះរាជាណាចក្រកម្ពុជា (FTUWKC) ត្រូវបានគេបាញ់សម្លាប់ នៅឯតូបលក់កាសែតមួយខាងក្រៅជាប់របងវត្តលង្កា កាលពីថ្ងៃទី ២២ ខែ មករា ឆ្នាំ ២០០៤ ។
នាថ្ងៃនេះ ដែលជាគម្រប់ខួប២០ឆ្នាំ មានអ្នកចូលរួមមកពី ក្រុមសកម្មជន យុវជន និងតំណាងសង្គមស៊ីវិលជាច្រើនរូបបានជួបជុំគ្នា ដើម្បីអំពាវនាវរកនូវយុត្តិធម៌ចំពោះករណីឃាតកម្មនេះ ។ លោក ជា មុនី ដែលជាប្អូនប្រុសរបស់លោក ជា វិជ្ជា និងបច្ចុប្បន្នជាអនុប្រធានគណបក្ស កម្លាំងជាតិ រួមទាំងតំណាងរបស់សម្ព័ន្ធសហជីពសេរីកម្មករជាច្រើនរូបទៀត បានថ្លែងសារ និងអាននូវសេចក្តីថ្លែងការណ៍ស្តីពីករណីឃាតកម្មលើសហជីពនេះ ។ បន្ទាប់មកអ្នកចូលរួមក៏ដាក់ញត្តិជូនទៅខុទ្ធកាល័យសម្តេចនាយករដ្ឋមន្ត្រី ហ៊ុន ម៉ាណែត ដើម្បីអំពាវនាវរកយុត្តិធម៌ជូនចំពោះលោក ជា វិជ្ជា ក៏ដូចជាសកម្មជនផ្សេងទៀតដែលត្រូវបានគេសម្លាប់ផងដែរ ។
កម្មវិធីនេះក៏ត្រូវបានឃ្លាំមើល ដោយមានការថតរូប វីដេអូ ពីសំណាក់អាជ្ញាធរ នគរបាល កងសន្តិសុខដែលស្លៀកពាក់ឯកសណ្ឋាននគរបាល និងសំលៀកបំពាក់ស៊ីវិលប្រហែលជា ១៥ នាក់ ។ សាលារាជធានីភ្នំពេញបានអនុញ្ញាតឱ្យប្រារព្ធនូវកម្មវិធីរំលឹកខួបនេះ ប៉ុន្តែតម្រូវឱ្យគ្មានវត្តមានជនជាតិបរទេសចូលរួមក្នុងកម្មវិធីនេះជាដាច់ខាត ។
បុរសពីរនាក់ផ្សេងទៀតដែលគ្មានទោស គឺលោក ប៊ន សំណាង និងលោក សុខ សំអឿន ត្រូវបានកាត់ទោសដោយមិនត្រឹមត្រូវពាក់ព័ន្ធនឹងករណីឃាតកម្មលោក ជា វិជ្ជា ហើយត្រូវបានជាប់ពន្ធនាគារអស់រយៈពេល ៥ ឆ្នាំ មុនពេលអ្នកទាំងពីរត្រូវបានតុលាការរកឃើញថាគ្មានទោសក្នុងឆ្នាំ ២០១៣ ។ អ្នកចូលរួមនាព្រឹកនេះ ក៏បានអំពាវនាវរកយុត្តិធម៌ចំពោះថ្នាក់ដឹកនំារបស់សហជីពសេរីកម្មករពីរនាក់ផ្សេងទៀត គឺ លោក រស់ សុវណ្ណរ៉េត និង លោក ហ៊ី វុទ្ធី ដែលត្រូវបានសម្លាប់កាលពី ឆ្នាំ ២០០៤ និង ២០០៧ ហើយនៅមិនទាន់បានរកឃើញឃាតករ ដើម្បីផ្តល់យុត្តិធម៌ជូនអ្នកទាំងពីរនៅឡើយ ៕
.jpeg)
- ចំណងជើង & មូលបទ
- សិទ្ធិការងារ ឃាតកម្ម ជា វិជ្ជា
