រាល់ថ្ងៃ ប្រជាពលរដ្ឋជាច្រើន កំពុងធ្វើការដោយមិនខ្លាចនឿយហត់ ក្នុងការការពារសិទ្ធិ និងសេរីភាពរបស់មនុស្សគ្រប់រូប ។ ពួកគេប្រឈមនឹងការធ្វើទុក្ខបុកម្នេញឥតឈប់ឈរ ដែលជារឿយៗកើតឡើងពីសំណាក់អាជ្ញាធរ ។
អ្នកការពារសិទ្ធិមនុស្សទាំងនេះ រួមមានកសិករ បុគ្គលិកក្រុមហ៊ុនឯកជន និងយុវជន ដែលរួមចំណែកតស៊ូសម្រាប់សហគមន៍របស់ពួកគេ ។ ការខិតខំប្រឹងប្រែងរបស់ពួកគេ មិនសូវទទួលបានការទទួលស្គាល់ដែលពួកគេគួរតែទទួលបាននោះទេ ប៉ុន្តែមានតម្លៃខ្ពស់ក្នុងការធ្វើឱ្យប្រសើរឡើងនៅថ្ងៃអនាគត ។
អំឡុងពេល៦ខែដំបូងនៃឆ្នាំ២០២៣ អង្គការលីកាដូ បានសម្ភាសអ្នកការពារសិទ្ធិមនុស្សចំនួន៦រូប ។ អ្នកទាំងនេះ នៅតែបន្តការតស៊ូដើម្បីសិទ្ធិរបស់ប្រជាពលរដ្ឋគ្រប់រូប ទោះបីជាជួបប្រឈមនូវបញ្ហាលំបាកខ្លាំងយ៉ាងណា ។ បទពិសោធន៍របស់ពួកគេត្រូវបានចែករំលែកនៅខាងក្រោមនេះ ។
