សង្គមស៊ីវិលទទូចឱ្យជួយស្វែងរកយុត្តិធម៌ជូនប្រធានសហជីពដែលត្រូវបានឃាតករបាញ់សម្លាប់
ចេញផ្សាយ ថ្ងៃទី២២ ខែមករា ឆ្នាំ២០១៨
នាព្រឹកនេះ សកម្មជនសហជីព និងសង្គមស៊ីវិល បានជួបជុំគ្នា នៅក្នុងរាជធានីភ្នំពេញ ដើម្បីប្រារព្ធពិធីរំលឹកខួប១៤ឆ្នាំនៃអំពើឃាតកម្មលើអតីតប្រធានសហជីព លោក ជា វិជ្ជា។
ការប្រារព្ធពិធីនេះធ្វើឡើងដើម្បីគោរពវិញ្ញាណក្ខន្ធ អតីតប្រធានសហជីពសេរីកម្មករនៃព្រះរាជាណាចក្រកម្ពុជា (FTUWKC) ដែលត្រូវបានឃាតករបាញ់សម្លាញ់ទាំងកណ្ដាលថ្ងៃ កាលពីថ្ងៃទី២២ ខែមករា ឆ្នាំ២០០៤។ បុរសគ្មានកំហុសពីរនាក់គឺ លោក ប៊ន សំណាង និងលោក សុខ សំអឿន ត្រូវបានផ្ដន្ទាទោសដោយមិនត្រឹមត្រូវនៅក្នុងអំពើឃាតកម្មនេះ ហើយអ្នកទាំងពីរត្រូវបានឃុំខ្លួនក្នុងពន្ធនាគារអស់រយៈពេល៥ឆ្នាំ មុនពេលការផ្ដន្ទាទោសនេះត្រូវបានតុលាការកំពូលបដិសេធចោលវិញ។
អ្នកចូលរួមក្នុងពិធីរំលឹកខួបនេះបានទទូចឱ្យអាជ្ញាធរជួយស្វែងរកឃាតករពិតប្រាកដ និងផ្ដល់យុត្តិធម៌ជូន លោក ជា វិជ្ជា ក្រុមគ្រួសារនិងមិត្តភក្ដិរបស់លោក។ ប្អូនប្រុសរបស់លោកគឺ លោក ជា មុន្នី ដែលជាអតីតប្រធានសហជីពសេរីកម្មករនៃព្រះរាជាណាចក្រកម្ពុជាផងដែរនោះ មិនបានបង្ហាញវត្តមាននៅក្នុងពិធីនេះទេ។ លោកត្រូវបានតុលាការកោះហៅឱ្យចូលឆ្លើយបំភ្លឺពាក់ព័ន្ធនឹងបណ្ដឹង ដែលបានប្ដឹងដោយសហជីពមួយទៀត។
- ឯកសារទាក់ទង
- ចំណងជើង & មូលបទ
- តុលាការ និងនីតិរដ្ឋ ឃាតកម្ម ជា វិជ្ជា
