អ្នកតវ៉ារឿងជម្លោះដីធ្លីមកពីខេត្តកោះកុង បន្តស្វែងរកដំណោះស្រាយនៅក្រសួងរៀបចំដែនដី
ចេញផ្សាយ ថ្ងៃទី៥ ខែមិថុនា ឆ្នាំ២០១៨
ទោះបីជាមានការរារាំងអំឡុងពេលធ្វើដំណើរមកកាន់រាជធានីភ្នំពេញក៏ដោយ ប្រជាពលរដ្ឋជាង២០០នាក់ ដែលកំពុងស្វែងរកដំណោះស្រាយនិងសំណងសមរម្យ ពីការបាត់បង់ដីធ្លីជាច្រើនឆ្នាំមកហើយនោះ បានមកជួបជុំគ្នានៅខាងមុខក្រសួងរៀបចំដែនដី នគររូបនីយកម្ម និងសំណង់ នាព្រឹកថ្ងៃអង្គារនេះ។
អភិបាលរងខេត្តកោះកុង ឯកឧត្ដម អន ភារៈ បានមកជួបជាមួយពួកគាត់ និងបានស្នើឱ្យពួកគាត់ត្រឡប់ទៅផ្ទះវិញ ដើម្បីពិភាក្សារកដំណោះស្រាយ។ អ្នកតវ៉ាទាំងនោះក៏បានជួបជាមួយមន្ត្រីរបស់ក្រសួងរៀបចំដែនដីផងដែរ។
នៅទីតាំងមួយចំនួន អ្នកទាំងនោះ ត្រូវបង្ខំចិត្តដើរថ្មើរជើងមកភ្នំពេញ ដោយសារ អាជ្ញាធរបានបញ្ឈប់រថយន្តរបស់ពួកគាត់ដែលកំពុងធ្វើដំណើរ កាលពីព្រឹកព្រលឹមថ្ងៃច័ន្ទ ហើយបានមកដល់ភ្នំពេញពេលយប់ជ្រៅថ្ងៃដដែល។ ដោយសារខ្លាចមានការរំខានពីសំណាក់អាជ្ញាធរម្ដងទៀត ពួកគាត់បានជួបជុំគ្នា តាំងពីវេលាទៀបភ្លឺថ្ងៃអង្គារនេះ ដើម្បីស្វែងរកអន្តរាគមន៍ពីក្រសួងរៀបចំដែនដី។
កាលពីខែមុន ប្រជាពលរដ្ឋទាំងនេះក៏ត្រូវបានប្រឈមនឹងបញ្ហាបិទផ្លូវនេះផងដែរ ហើយត្រូវបានប៉ះទង្គិចគ្នា និងរុញច្រានពីសំណាក់កងសន្តិសុខភ្នំពេញ ខណៈពេលពួកគាត់ព្យាយាមដើរហែរក្បួនចេញពីវត្ត ដែលពួកគាត់បានស្នាក់នៅមួយយប់ ឆ្ពោះទៅក្រសួងរៀបចំដែនដី នគររូបនីយកម្ម និងសំណង់។
អស់រយៈពេលច្រើនឆ្នាំមកហើយ ប្រជាពលរដ្ឋដែលមកពី ឃុំជីខលើ ឃុំជីខក្រោម ឃុំដងពែង និងឃុំកណ្ដោល ទាំងនេះ បានដាក់ញាត្តិជូនទៅអាជ្ញាធរខេត្តនិងក្រសួងពាក់ព័ន្ធ ដើម្បីស្វែងរកដំណោះស្រាយ និងសំណងសមរម្យ ដោយសារការបាត់បង់ដីធ្លី ជុំវិញការផ្ដល់ដីសម្បទានសេដ្ឋកិច្ចចំនួនពីរ ពាក់ព័ន្ធនឹងក្រុមហ៊ុនស្ករអំពៅថៃ KSL ក៏ដូចជាសមាជិកព្រឹទ្ធសភានៃគណបក្សកាន់អំណាចគឺ លោកឧកញ៉ា លី យ៉ុងផាត់។
ប្រជាពលរដ្ឋមួយចំនួននៃសហគមន៍ទាំងនេះ បានទទួលសំណង កាលពីខែមីនា កន្លងទៅថ្មីៗនេះ ប៉ុន្តែនៅមានប្រជាពលរដ្ឋជាច្រើនគ្រួសារទៀតដែលពុំទាន់ទទួលបានសំណងសមរម្យ និងបន្តធ្វើដំណើរមករាជធានីភ្នំពេញម្ដងហើយម្ដងទៀត ដើម្បីស្នើសុំអន្តរាគមន៍ពីសំណាក់រាជរដ្ឋាភិបាល។
- ឯកសារទាក់ទង
- ចំណងជើង & មូលបទ
- សិទិ្ធបញ្ចេញមតិ និងចូលរួម សិទ្ធិដីធ្លី
