សកម្មជនព្រៃឈើប្រាំនាក់នៅខេត្តរតនគិរី ត្រូវបានផ្ដន្ទាទោស
ចេញផ្សាយ ថ្ងៃទី៨ ខែកក្កដា ឆ្នាំ២០២២
នាថ្ងៃនេះ សាលាដំបូងខេត្តរតនគិរី បានផ្ដន្ទាទោសសកម្មជនព្រៃឈើ៥នាក់ រួមមានអ្នកការពារបរិស្ថានជាយូរឆ្នាំគឺលោក ឆន ផល្លា ពីបទផ្ដើមគំនិតក្នុងការកាប់គាស់ រុករានដីព្រៃ ឆ្ការ ដុត និងឈូសឆាយដីព្រៃ ដើម្បីយកដីធ្វើជាកម្មសិទ្ធិ នៅលើភ្នំអាត ស្ថិតក្នុងភូមិសាមុត្រក្រោម ឃុំសេដា ស្រុកលំផាត់ ខេត្តរតនគិរី ។
លោក ផល្លា ត្រូវបានផ្ដន្ទាទោសដាក់ពន្ធនាគារ ៦ឆ្នាំ ។ លោក ស៊ីថាន់ ញ៉ាន់ លោក ខាំ ម៉ាសូក លោក ឡាត់ ប្រាញ់ និងលោក ថ្វែ ហុក ដែលជាជនជាតិដើមភាគតិចទំពួន ត្រូវបានផ្ដន្ទាទោសដាក់ពន្ធនាគារ ៥ឆ្នាំ ។ បទចោទទាំងនេះ ពាក់ព័ន្ធនឹងកិច្ចប្រជុំមួយដែលអ្នកទាំងប្រាំបានចូលរួមក្នុងឆ្នាំ២០១៧ ក្នុងគោលបំណងការពារដីធ្លី និងដីព្រៃរបស់ពួកគេ ក៏ដូចជាលើកកម្ពស់ការយល់ដឹងអំពីការកាប់បំផ្លាញព្រៃឈើ ។
អ្នកទាំងប្រាំ ត្រូវបានផ្ដន្ទាទោសតាមបញ្ញត្តិមាត្រា៥៦(៤) និងមាត្រា៦២(១) នៃច្បាប់ស្ដីពីតំបន់ការពារធម្មជាតិ និងមាត្រា២៨នៃក្រមព្រហ្មទណ្ឌ ។ ដំបូងឡើយ ពួកគេមិនត្រូវបានចោទប្រកាន់ពីបទផ្ដើមគំនិតទេ ខណៈដែលបទចោទនេះទើបត្រូវបានប្ដូរនៅក្នុងការប្រកាសសាលក្រម នាថ្ងៃនេះ ។ អំឡុងពេលសវនាការ ពុំមានភស្តុតាងដាក់បន្ទុកគ្រប់គ្រាន់ ត្រូវបានលើកយកមកបង្ហាញដើម្បីគាំទ្រទៅលើបទចោទទាំងនេះទេ ។
លោក ផល្លា កំពុងស្ថិតក្រោមការជាប់ឃុំក្នុងពន្ធនាគារខេត្តរតនគិរី ចាប់តាំងពីពេលចាប់ខ្លួនលោកក្នុងខែកញ្ញា ឆ្នាំ២០២១ ។ បច្ចុប្បន្ន លោកកំពុងអនុវត្តទោសជាប់ពន្ធនាគារ៥ឆ្នាំ នៅក្នុងសំណុំរឿងដាច់ដោយឡែកមួយទៀត ដែលលោក ត្រូវបានសាលាដំបូងខេត្តរតនគិរី ផ្ដន្ទាទោសដោយមិនមានភស្តុតាងគ្រប់គ្រាន់ កាលពីខែវិច្ឆិកា ឆ្នាំ២០២១ ពីបទកាប់រានដីព្រៃ ឈូសឆាយ និងហ៊ុមព័ទ្ធកាន់កាប់ដីព្រៃ ។ ចៅក្រម មិនបានបង្គាប់ឱ្យចាប់ខ្លួនមនុស្ស៤នាក់ផ្សេងទៀតទេ ហើយសកម្មជននីមួយៗអាចប្ដឹងឧទ្ធរណ៍ មុនពេលសាលក្រមចូលជាស្ថាពរ ។
លោក ឆន ផល្លា បានចំណាយពេលជាង ១០ឆ្នាំ ក្នុងកិច្ចការពារព្រៃឈើ និងឃ្លាំមើលការបំផ្លិចបំផ្លាញធនធានធម្មជាតិ ក្នុងខេត្តរតនគិរី ៕
- ចំណងជើង & មូលបទ
- តុលាការ និងនីតិរដ្ឋ សិទិ្ធបញ្ចេញមតិ និងចូលរួម សិទ្ធិដីធ្លី
