តុលាការកំពូលតម្កល់ការផ្តន្ទាទោសមេដឹកនាំសហជីព និងសកម្មជនអតីតគណបក្សជំទាស់
ចេញផ្សាយ ថ្ងៃទី២៩ ខែកក្កដា ឆ្នាំ២០២២
នាថ្ងៃនេះ តុលាការកំពូលបានតម្កល់ការផ្តន្ទាទោសពីបទញុះញង់ លើមេដឹកនាំសហជីព លោក រ៉ុង ឈុន និងសកម្មជនអតីតគណបក្សជំទាស់ កញ្ញា ស កន្និកា និងលោក តុន និមល ដែលកំពុងស្ថិតក្រោមវិធានការត្រួតពិនិត្យដ៏តឹងរ៉ឹង ។
លោក រ៉ុង ឈុន ដែលធ្លាប់បានជាប់ពន្ធនាគារជាច្រើនឆ្នាំ ដោយសកម្មភាពការពារសិទិ្ធការងាររបស់លោក ត្រូវបានចាប់ខ្លួន ក្រោយពេលដែលលោកបានផ្តល់អត្ថាធិប្បាយរបស់លោកទាក់ទងនឹងបញ្ហាព្រំដែនប្រទេសកម្ពុជា-វៀតណាម កាលពីខែកក្កដា ឆ្នាំ២០២០ ។ ការចាប់ខ្លួនមេដឹកនាំសហជីពចាស់វស្សារូបនេះ គឺជាការចាប់ផ្តើមការចាប់ខ្លួនអ្នករិះគន់អាជ្ញាធររដ្ឋទ្រុងទ្រាយធំមួយនៅក្នុងប្រទេស ។ កន្និកា និងនិមល ត្រូវបានចាប់ខ្លួនក្រោយពេលដែលអ្នកទាំងពីរបានចូលរួមក្នុងការតវ៉ាអហិង្សាមួយ ដែលកន្និកាបានចូលរួមតវ៉ានៅក្នុងខែសីហា ហើយនិមលបានចូលរួមនៅក្នុងខែតុលា ឆ្នាំ២០២០ ។ អ្នកទាំងបី ត្រូវបានដោះលែងកាលពីខែវិច្ឆិកា ដោយការព្យួរទោសសាកល្បងរយៈពេល ៣ឆ្នាំ និងតម្រូវឱ្យអ្នកទាំងបី គោរពនូវវិធានការដ៏តឹងរ៉ឹងជាច្រើន ដែលនេះជាការរឹតត្បិតសេរីភាពរបស់ពួកគេ ។
សាលាដំបូងរាជធានីភ្នំពេញ បានផ្តន្ទាទោសអ្នកទាំងបីពីបទ ញុះញង់ យោងតាមមាត្រា ៤៩៤ និង ៤៩៥ នៃក្រមព្រហ្មទណ្ឌ កាលពីខែសីហា ឆ្នាំ២០២១ ។ សាលាឧទ្ធរណ៍រាជធានីភ្នំពេញ បានព្យួរទោសផ្នែកខ្លះ កាលពីខែវិច្ឆិកា ឆ្នាំ២០២១ ដោយបង្គាប់ឱ្យអ្នកទាំងបីជាប់ពន្ធនាគារចាប់ពី ១៤ ខែ ដល់ ១៥ ខែ និងបង់ប្រាក់ពិន័យក្នុងម្នាក់ចំនួន ២លានរៀល (៥០០ ដុល្លារអាមេរិក) និងបង់សំណងការខូចខាតរួមចំនួន ៤០០លានរៀល (១០០.០០០ ដុល្លារអាមេរិក) ។
តុលាការកំពូល បានតម្កល់សេចក្តីសម្រេចខាងលើនៃសាលាឧទ្ធរណ៍កាលពីព្រឹកមិញនេះ ។ លោក រ៉ុង ឈុន កញ្ញា ស កន្និកា និងលោក តុន និមល មិនមានវត្តមានក្នុងបន្ទប់សវនាការនោះទេ នៅពេលតុលាការប្រកាសសាលក្រម ។
នៅក្នុងករណីមួយផ្សេងទៀត តុលាការកំពូលនាព្រឹកនេះ ក៏បានតម្កល់ការផ្តន្ទាទោសពីបទ ញុះញង់ មកលើសកម្មជនអតីតគណបក្សសង្គ្រោះជាតិ លោក តុន និមល អ្នកស្រី លឹម សាន អ្នកស្រី យ៉យ មុំ អ្នកស្រី សាត ផា អ្នកស្រី ផៃ រ៉េន អ្នកស្រី សាន ច័ន្ទស្រីនាថ និងអ្នកស្រី ហុង អាន ផងដែរ ។ ការចោទប្រកាន់ខាងលើ ត្រូវបានធ្វើឡើង ក្រោយពេលអ្នកទាំងនោះចូលរួមក្នុងការតវ៉ាអហិង្សាមួយនៅមុខសា្ថនទូតចិនក្នុងរាជធានីភ្នំពេញ កាលពីខែតុលា ឆ្នាំ ២០២០ ។
- ឯកសារទាក់ទង
- ចំណងជើង & មូលបទ
- សិទិ្ធបញ្ចេញមតិ និងចូលរួម រ៉ុង ឈុន
