សាលាឧទ្ធរណ៍តម្កល់ការផ្តន្ទាទោសរបស់សាលាដំបូង លើសកម្មជនអតីតគណបក្សសង្គ្រោះជាតិ
ចេញផ្សាយ ថ្ងៃទី១៣ ខែកញ្ញា ឆ្នាំ២០២២នាព្រឹកនេះ សាលាឧទ្ធរណ៍រាជធានីភ្នំពេញ បានតម្កល់ការសម្រេចផ្តន្ទាទោស និងដាក់ទោសពន្ធនាគារ របស់សាលាដំបូងកាលពីខែមីនា ឆ្នាំ២០២២ ទៅលើសមាជិកអតីតគណបក្សសង្គ្រោះជាតិ ចំនួន ១២រូប និងមន្រ្តីរាជការ ១រូប របស់ក្រសួងមហាផ្ទៃពីបទរួមគំនិតក្បត់ និងបទញុះញង់ ។
ការជំនុំជម្រះលើសំណុំរឿងមួយនេះ គឺជាការជំនុំជម្រះមួយក្នុងចំណោមការជំនុំជម្រះផ្សេងទៀត ដែលត្រូវបានធ្វើឡើងទៅលើអតីតអ្នកគាំទ្រ និងថ្នាក់មេដឹកនាំរបស់គណបក្សសង្គ្រោះជាតិ កាលពីខែវិច្ឆិកា ឆ្នាំ២០២០ ។ ការជំនុំជម្រះនេះ បានផ្តោតទៅលើការគាំទ្រលើ “ចលនាសង្គ្រោះជាតិ” នៅក្រៅប្រទេស និងការបញ្ចេញទស្សនៈទៅលើសកម្មភាពឆ្លើយតបរបស់រាជរដ្ឋាភិបាលអំឡុងពេលការរីករាលដាលនៃជំងឺ កូវីដ-១៩ តាមរយៈប្រព័ន្ធអនឡាញជាលក្ខណៈឯកជន និងការឆ្លើយឆ្លងតបសារ និងការសន្ទនានៅលើទូរស័ព្ទ ។
មនុស្សចំនួន ១៣នាក់ ដែលរួមមាន លោក ឆន ប៊ុនឆាត លោក ឡុង ផារី លោក ឃុត ច្រឹប លោក ងិន ភា លោក យឹម សារ៉េត លោក ឃឹម ភាណា លោក ថៃ គន្ធា លោក កែវ ថៃ លោក ញ៉ែម វាន លោក ជុំ ចាន់ លោក សុខ ចាន់ថា លោក ពៀត ម៉ាប់ និងលោក ស៊ន់ ធន់ ត្រូវបានផ្តន្ទាទោសនៅថ្ងៃទី១៧ ខែមីនា ឆ្នាំ២០២២ ដោយសាលាដំបូងរាជធានីភ្នំពេញ ដោយដាក់ឱ្យជាប់ពន្ធនាគារចំនួន ៥ឆ្នាំ ដែលមួយភាគនៃទោសរបស់ពួកគេត្រូវបានព្យួរ ។ មនុស្សទាំង ១៣នាក់នេះ ត្រូវបានឃុំខ្លួនបណ្តោះអាសន្ន អំឡុងពេលនៃការជំនុំជម្រះរបស់ពួកគេនៅសាលាដំបូង ហើយមួយចំនួនត្រូវបានឃុំខ្លួនលើសពី ២ឆ្នាំ ។ ពួកគេទាំងអស់កំពុងតែអនុវត្តទោសដែលនៅសល់ចំនួន ៣ឆ្នាំនឹង ៨ខែ ក្នុងពន្ធនាគារ ។ កាលពីខែមុន យ៉ាងហោចណាស់សកម្មជន ដែលត្រូវបានផ្តន្ទាទោស ១២រូប ត្រូវបានបញ្ជូនទៅឃុំខ្លួននៅពន្ធនាគារ ម៣ ដែលឆ្ងាយជិតព្រំដែនកម្ពុជា-វៀតណាម ក្នុងខេត្តត្បូងឃ្មុំ ។ ការបញ្ជូននេះ គឹជាការបញ្ជូនសមាជិកអតីតគណបក្សសង្គ្រោះជាតិធំមួយ ចេញពីភ្នំពេញទៅកាន់ពន្ធនាគារខេត្ត ។
ថ្នាក់ដឹកនាំអតីតគណបក្សសង្គ្រោះជាតិចំនួន ៧រូប ផ្សេងទៀត ដែលរួមមានឯកឧត្តម សម រង្ស៊ី អ្នកស្រី មួរ សុខហួរ និងលោក អេង ឆៃអៀង ក៏ជាចុងចោទនៅក្នុងសវនាការសាលាដំបូងរាជធានីភ្នំពេញ និងត្រូវបានតុលាការផ្តន្ទាទោសដោយកំបាំងមុខ ពីបទ ញុះញង់ រួមគំនិតក្បត់ និងញុះញង់កុំឱ្យយោធិនស្តាប់បង្គាប់ និងត្រូវបានដាក់ឱ្យជាប់ពន្ធនាគារសរុបចំនួន ១០ឆ្នាំ ។ អ្នកទាំង ៧រូប នោះ មិនបានប្តឹងឧទ្ធរណ៍នោះទេ ។
ចុងចោទជាច្រើននាក់ ត្រូវបានតុលាការសម្រេចហាមឃាត់ការធ្វើសកម្មភាពនយោបាយចំនួន ៥ឆ្នាំ កាលពីឆ្នាំ ២០១៧ ហើយបម្រាមនេះនឹងត្រូវផុតនៅខែវិច្ឆិកាខាងមុខនេះ ។ ការផ្តន្ទាទោសទៅលើអ្នកទាំងនោះ ក៏មានភ្ជាប់នូវបម្រាមដាច់ដោយឡែកផ្សេងទៀតផងដែរទៅលើសកម្មភាពនយោបាយជាក់លាក់មួយចំនួន ដូចជាកាន់តួនាទីជាថ្នាក់ដឹកនាំនៅក្នុងគណបក្សនយោបាយ ឬឈរឈ្មោះជាបេក្ខជនតំណាងរាស្ត្រនៅក្នុងសភាជាតិ ។
- ឯកសារទាក់ទង
- ចំណងជើង & មូលបទ
- តុលាការ និងនីតិរដ្ឋ សិទិ្ធបញ្ចេញមតិ និងចូលរួម