កញ្ញា ឈឹម ស៊ីថរ ប្រធានសហជីព ណាហ្គាវើលដ៍ ត្រូវបានបដិសេធការនៅក្រៅឃុំ
ចេញផ្សាយ ថ្ងៃទី១៩ ខែមករា ឆ្នាំ២០២៣
នាព្រឹកនេះ សាលាដំបូងរាជធានីភ្នំពេញ បានបដិសេធ កញ្ញា ឈឹម ស៊ីថរ ប្រធានសហជីពទ្រទ្រង់សិទ្ធិបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ ដោយបង្គាប់ឱ្យកញ្ញាស្ថិតនៅក្រោមការឃុំខ្លួនបណ្ដោះអាសន្នរង់ចាំសវនាការដដែល នៅមណ្ឌលអប់រំកែប្រែទី២ (ព្រៃស) ។ ពុំមានការផ្ដល់ហេតុផលក្នុងការបដិសេធការនៅក្រៅឃុំនេះទេ ។
ដំបូងឡើយ កញ្ញា ស៊ីថរ ត្រូវបានចាប់ខ្លួន ក្នុងខែមករា ឆ្នាំ២០២២ និងបានចំណាយពេល២ខែ ក្នុងការឃុំខ្លួនបណ្ដោះអាសន្ន ក្រោយពីត្រូវបានចោទប្រកាន់ពីបទញុះញង់ រួមជាមួយសមាជិកដទៃទៀតនៃសហជីពកញ្ញា ។ កញ្ញា ស៊ីថរ ត្រូវបានដោះលែងឱ្យនៅក្រៅឃុំ កាលពីខែមីនា ឆ្នាំ២០២២ ប៉ុន្តែត្រូវបានចាប់ខ្លួនម្ដងទៀត ក្នុងខែវិច្ឆិកា ឆ្នាំ២០២២ ដោយនគរបាលអន្តោប្រវេសន៍ នៅក្នុងអាកាសយាន្តដ្ឋានអន្តរជាតិភ្នំពេញ ខណៈដែលកញ្ញា ទើបត្រឡប់មកពីចូលរួមសន្និសីទសិទ្ធិការងារមួយ នៅប្រទេសអូស្ត្រាលី ។
អាជ្ញាធរ បានចោទប្រកាន់កញ្ញា ស៊ីថរ ពីការបំពានលើលក្ខខណ្ឌនៅក្រៅឃុំ ដោយការចាកចេញពីប្រទេស ទោះបីជាទាំងស៊ីថរ និងមេធាវីការពារសិទ្ធិឱ្យកញ្ញា មិនធ្លាប់ត្រូវបានជូនដំណឹងអំពីលក្ខខណ្ឌទាំងនេះក៏ដោយ ។ កញ្ញា កំពុងស្ថិតក្រោមការឃុំខ្លួន នៅមណ្ឌលអប់រំកែប្រែទី២ តាំងពីថ្ងៃទី២៦ ខែវិច្ឆិកា ឆ្នាំ២០២២ ។
សមាជិកណាហ្គាវើលដ៍ បានបន្តធ្វើកូដកម្ម ចាប់តាំងពីខែធ្នូ ឆ្នាំ២០២១ ក្រោយពីមានការបញ្ឈប់បុគ្គលិកទ្រង់ទ្រាយធំនៅក្រុមហ៊ុនកាស៊ីណូណាហ្គាវើលដ៍ ដែលរួមមានថ្នាក់ដឹកនាំសហជីពទាំងស្រុង និងសមាជិកជាច្រើនទៀតផងដែរ ។
កញ្ញា ស៊ីថរ ក៏ដូចជាថ្នាក់ដឹកនាំ និងសមាជិកសហជីពណាហ្គាវើលដ៍ ចំនួន៨នាក់ទៀត កំពុងប្រឈមនឹងការជាប់ពន្ធនាគារ២ឆ្នាំ ប្រសិនបើត្រូវបានផ្ដន្ទាទោសពីបទញុះញង់នេះ ។ សមាជិកសហជីព៦នាក់ទៀត ត្រូវបានចោទប្រកាន់ក្នុងខែកុម្ភៈ ឆ្នាំ២០២២ តាមច្បាប់កូវីដ-១៩ ។ នៅខែតុលា ឆ្នាំ២០២២ សមាជិកសហជីពយ៉ាងតិច ១៨នាក់ ទៀត ត្រូវបានជាប់ពាក់ព័ន្ធនឹងបទរំលោភលើលំនៅឋាន ធ្វើឱ្យខូចខាតដោយចេតនាមានស្ថានទម្ងន់ទោស និងចាប់ឃុំឃាំងនិងបង្ខាំងដោយខុសច្បាប់ នៅក្នុងសំណុំរឿងព្រហ្មទណ្ឌមួយ ដែលមាន ”សមាជិកសហជីព” ជាង ១០០នាក់ ផ្សេងទៀត ដែលមិនទាន់ត្រូវបានស្គាល់ឈ្មោះ ៕ (វីដេអូពី LRSU)
- ឯកសារទាក់ទង
- ចំណងជើង & មូលបទ
- សិទិ្ធបញ្ចេញមតិ និងចូលរួម សិទ្ធិការងារ
