តុលាការកំពូលបដិសេធសំណើសុំនៅក្រៅឃុំរបស់លោក ថាច់ សេដ្ឋា អនុប្រធានគណបក្សភ្លើងទៀន
ចេញផ្សាយ ថ្ងៃទី១៩ ខែមិថុនា ឆ្នាំ២០២៣
នាព្រឹកនេះ តុលាការកំពូលបានតម្ដល់សាលក្រមរបស់ សាលាដំបូងរាជធានីភ្នំពេញ ក្នុងការបដិសេធមិនឱ្យលោក ថាច់ សេដ្ឋា ថ្នាក់ដឹកនាំនៃគណបក្សជំទាស់នៅក្រៅឃុំ ។
លោក សេដ្ឋា អនុប្រធានគណបក្សភ្លើងទៀន ត្រូវបានចោទប្រកាន់ពីបទញុះញង់ឱ្យប្រព្រឹត្តបទឧក្រិដ្ឋ ជាអាទិ៍ និងបទញុះញង់ឱ្យមានការរើសអើង តាមមាត្រា ៤៩៤ មាត្រា៤៩៥ និងមាត្រា៤៩៦ នៃក្រមព្រហ្មទណ្ឌ ក្នុងខែមេសា ឆ្នាំ២០២៣ ពាក់ព័ន្ធនឹងការអត្ថាធិប្បាយរបស់លោកជាមួយពលករខ្មែរនៅក្រៅប្រទេស និងត្រូវបានបង្គាប់ឱ្យស្ថិតក្រោមការឃុំខ្លួនបណ្តោះអាសន្នរង់ចាំសវនាការ ។
ថ្នាក់ដឹកនាំគណបក្សជំទាស់វ័យ ៧០ ឆ្នាំរូបនេះបានប្ដឹងឧទ្ធរណ៍ ដោយអះអាងថាលក្ខខណ្ឌនៃការដាក់រូបលោកឱ្យស្ថិតក្រោមការត្រួតពិនិត្យតាមផ្លូវតុលាការគឺគ្រប់គ្រាន់ហើយ និងបានលើកឡើងថា ស្ថានភាពសុខភាពរបស់លោកមិនអាចទ្រាំទ្រនឹងស្ថានភាពនៅក្នុងពន្ធនាគារនោះទេ ។ ទោះជាយ៉ាងណា សាលាឧទ្ធរណ៍នៅតែបង្គាប់ឱ្យមានការឃុំខ្លួនលោកបណ្ដោះអាសន្ន ក្នុងខែឧសភា ឆ្នាំ២០២៣ ។
នាថ្ងៃនេះ តុលាការកំពូល ក៏បានបដិសេធចោលការអះអាងរបស់លោក សេដ្ឋា ផងដែរ ។ លោក សេដ្ឋា ត្រូវបានឃុំខ្លួន ចាប់តាំងពីថ្ងៃទី១៦ ខែមករា ឆ្នាំ២០២៣ លើការចោទប្រកាន់ពី បទមិនបំពេញកាតព្វកិច្ចចំពោះឧបករណ៍អាចជួញដូរបាន និងប្រតិបត្តិការទូទាត់សងប្រាក់ ក្នុងករណីផ្សេងមួយទៀតក្នុងឆ្នាំ២០១៩ ។
កាលពីខែមុន គណបក្សភ្លើងទៀនត្រូវបានគណៈកម្មាធិការជាតិរៀបចំការបោះឆ្នោត បដិសេធមិនឱ្យចុះឈ្មោះចូលរួមការបោះឆ្នោតថ្នាក់ជាតិ នៅខែកក្កដា ឆ្នាំ២០២៣ ខាងមុខនេះ ដោយផ្អែកលើមូលដ្ឋានថាគណបក្សមួយនេះ មិនបានដាក់បញ្ជូនសំណុំឯកសារចាំបាច់ជាច្បាប់ដើម ដោយបានដាក់តែឯកសារថតចម្លង ក្នុងអំឡុងពេលដំណើរការចុះឈ្មោះ ។ ក្រុមប្រឹក្សាធម្មនុញ្ញ ក៏បានតម្កល់សេចក្តីសម្រេចនៃការបដិសេធលើការចុះឈ្មោះរបស់គណបក្សជំទាស់ធំជាងគេមួយនេះ ផងដែរ ៕
- ចំណងជើង & មូលបទ
- តុលាការ និងនីតិរដ្ឋ ការបោះឆ្នោត សិទិ្ធបញ្ចេញមតិ និងចូលរួម បញ្ហាពន្ធនាគារ
