ដំណើរឆ្ពោះទៅមុខនៃការស៊ើបអង្កេតលើការវិនិយោគរបស់សាជីវកម្មហិរញ្ញវត្ថុអន្តរជាតិ នៅកម្ពុជា
ចេញផ្សាយ ថ្ងៃទី២ ខែសីហា ឆ្នាំ២០២៣
ការិយាល័យភាពអនុលោម ទីប្រឹក្សា ដោះស្រាយវិវាទ (ស៊ីអេអូ) នៃសាជីវកម្មហិរញ្ញវត្ថុអន្តរជាតិ (អាយអេហ្វស៊ី) នឹងបើកការស៊ើបអង្កេតអំពីអនុលោមភាពនៃស្ថាប័នផ្ដល់កម្ចីមីក្រូហិរញ្ញវត្ថុចំនួន ៦ នៅកម្ពុជា និងអន្តរការីចំនួន ៤ ពាក់ព័ន្ធនឹងផលប៉ះពាល់ដែលបណ្ដាលមកពីបំណុលវ័ណ្ណក និងការផ្ដល់កម្ចីបែបកេងប្រវ័ញ្ច ។
ការស៊ើបអង្កេតរបស់ការិយាល័យភាពអនុលោម ទីប្រឹក្សា ដោះស្រាយវិវាទ ត្រូវបានប្រកាសលើកដំបូងនៅថ្ងៃទី១៣ ខែមិថុនា ឆ្នាំ២០២៣ ប៉ុន្តែត្រូវបានពន្យារពេលបន្ទាប់ពីគណៈគ្រប់គ្រងនៃសាជីវកម្មហិរញ្ញវត្ថុអន្តរជាតិ បានស្នើឱ្យក្រុមប្រឹក្សាភិបាលរបស់ខ្លួនធ្វើការត្រួតពិនិត្យឡើងវិញលើសេចក្ដីសម្រេចរបស់ការិយាល័យភាពអនុលោម ទីប្រឹក្សា ដោះស្រាយវិវាទ ។ នេះគឺជាសំណើដំបូងបង្អស់របស់ស្ថាប័ននេះ ក្នុងការប្រើប្រាស់វិសោធនកម្មគោលនយោបាយនៃការិយាល័យភាពអនុលោម ទីប្រឹក្សា ដោះស្រាយវិវាទ នៅឆ្នាំ២០២១ ដែលអនុញ្ញាតឱ្យមានការត្រួតពិនិត្យឡើងវិញក្នុងកម្រិតហេតុផលបច្ចេកទេស ដែលមានលក្ខណៈតូចចង្អៀតតែប៉ុណ្ណោះ ។ ក្រោយមក សាជីវកម្មហិរញ្ញវត្ថុអន្តរជាតិ បានដកសំណើសុំត្រួតពិនិត្យរបស់ខ្លួននៅថ្ងៃចុងក្រោយនៃការត្រួតពិនិត្យនេះ ដោយមិនបានពន្យល់ហេតុផលអ្វីនោះទេ ។ ការិយាល័យភាពអនុលោម ទីប្រឹក្សា ដោះស្រាយវិវាទ បានកត់សម្គាល់ថា គោលនយោបាយមួយ ទាមទារឱ្យមាន “សំណើ” ត្រូវផ្សព្វផ្សាយជាសាធារណៈ ប៉ុន្តែក៏បានលើកឡើងថា ការសម្រេចចេញផ្សាយជាសាធារណៈនូវការដកសំណើ ឬយ៉ាងណា គឺនៅមិនទាន់សម្រេចនៅឡើយទេ ។
របាយការណ៍វាយតម្លៃពីអនុលោមភាពរបស់ការិយាល័យភាពអនុលោម ទីប្រឹក្សា ដោះស្រាយវិវាទ បានកំណត់ថាដំណើរការស៊ើបអង្កេតគឺមានភាពចាំបាច់ ។ នៅក្នុងរបាយការណ៍នេះដែរ ការិយាល័យភាពអនុលោម ទីប្រឹក្សា ដោះស្រាយវិវាទ បានអះអាងថា ខ្លួនបានរកឃើញសូចនាករជាបឋមមួយចំនួននៃផលប៉ះពាល់ និងលើកឡើងថា សាជីវកម្មហិរញ្ញវត្ថុអន្តរជាតិប្រហែលជាមិនបានគោរពតាមគោលការណ៍របស់ខ្លួនឡើយ ។ របាយការណ៍នេះបានកត់សម្គាល់ថា ផលប៉ះពាល់ទាំងនោះគឺអាចជឿទុកចិត្តបានថា អាចមានការជាប់ពាក់ព័ន្ធនឹងការមិនអនុវត្តអនុលោមភាពរបស់សាជីវកម្មហិរញ្ញវត្ថុអន្តរជាតិ ។
របាយការណ៍នេះក៏បានរកឃើញអំពី “សូចនាករមួយចំនួន ដែលសាជីវកម្មហិរញ្ញវត្ថុអន្តរជាតិមិនបានអនុវត្តនូវកាតព្វកិច្ចរបស់ខ្លួនឱ្យបានសកម្ម និងជាប្រព័ន្ធ ទាក់ទងនឹងការចាត់វិធានការឱ្យបានហ្មត់ចត់ និងការគ្រប់គ្រងគម្រោង [បរិស្ថាន និងសង្គម] ។” ក្នុងនោះក៏បានកត់សម្គាល់ថា “មានឯកសារដែលអាចរកបានជាច្រើន ដែលចងក្រងអំពី វិសាលភាព និងភាពធ្ងន់ធ្ងរនៃផលប៉ះពាល់សង្គម ទាក់ទងនឹងការផ្តល់កម្ចីមីក្រូហិរញ្ញវត្ថុនៅកម្ពុជា” ដោយបានចង្អុលបង្ហាញថា ការព្រួយបារម្ភទាំងនេះ ត្រូវបានបង្ហាញដោយសាជីវកម្មហិរញ្ញវត្ថុអន្តរជាតិខ្លួនឯង តាំងពីដើមឆ្នាំ ២០១៥ ។
របាយការណ៍វាយតម្លៃនៃអនុលោមភាព ក៏បានរួមបញ្ចូលនូវការអះអាងរបស់គណៈគ្រប់គ្រងនៃសាជីវកម្មហិរញ្ញវត្ថុអន្តរជាតិ ដែលថា ផលប៉ះពាល់ចំពោះអ្នកខ្ចីឥណទានរបស់ពួកគេ គួរតែស្ថិតនៅក្រៅគោលនយោបាយរបស់សាជីវកម្មហិរញ្ញវត្ថុអន្តរជាតិ ។ នេះអាចមានន័យថា បញ្ហានេះ គឺមិនមានលក្ខណៈគ្រប់គ្រាន់ចំពោះការត្រួតពិនិត្យដោយការិយាល័យភាពអនុលោម ទីប្រឹក្សា ដោះស្រាយវិវាទ នោះទេ ។ ប៉ុន្តែផ្ទុយទៅវិញ ការិយាល័យភាពអនុលោម ទីប្រឹក្សា ដោះស្រាយវិវាទ បានរកឃើញថា “អត្ថបទនៃក្របខណ្ឌនិរន្តរភាព មិនគាំទ្រការអះអាងរបស់គណៈគ្រប់គ្រងនៃសាជីវកម្មហិរញ្ញវត្ថុអន្តរជាតិទេ” ។
អង្គការសម្ព័ន្ធខ្មែរជំរឿន និងការពារសិទ្ធិមនុស្ស (លីកាដូ) និងអង្គការសមធម៌កម្ពុជា (EC) តាងនាមឱ្យពលរដ្ឋកម្ពុជាជាអ្នកខ្ចីឥណទានខ្នាតតូចដែលរងគ្រោះពីផលប៉ះពាល់នៃកម្ចីមីក្រូហិរញ្ញវត្ថុបែបកេងប្រវ័ញ្ច បានដាក់ពាក្យបណ្តឹងទៅការិយាល័យភាពអនុលោម ទីប្រឹក្សា ដោះស្រាយវិវាទ នៅក្នុងខែកុម្ភ: ឆ្នាំ២០២២ ។ កម្ចីទាំងនោះត្រូវបានផ្ដល់ដោយស្ថាប័នចំនួនប្រាំមួយ ដែលទទួលបានការវិនិយោគផ្ទាល់ពីសាជីវកម្មហិរញ្ញវត្ថុអន្តរជាតិ និងតាមរយៈកម្ចីមូលនិធិអន្តរការី ។ ការិយាល័យភាពអនុលោម ទីប្រឹក្សា ដោះស្រាយវិវាទ បានចំណាយពេលចំនួន ១៥ខែមកហើយ ដើម្បីវាយតម្លៃ និងកំណត់ពីភាពពាក់ព័ន្ធនៃពាក្យបណ្តឹង ហើយបានសម្រេចនៅខែមិថុនា ឆ្នាំ២០២៣ ថា ការស៊ើបអង្កេតគឺសមហេតុផល ៕
- ឯកសារទាក់ទង
- ចំណងជើង & មូលបទ
- គ្រឹះស្ថានមីក្រូហិរញ្ញវត្ថុ និងបញ្ហាបំណុល
