សាលាឧទ្ធរណ៍តម្កល់សាលក្រមកាត់ទោស លោក ថាច់ សេដ្ឋា
ចេញផ្សាយ ថ្ងៃទី២២ ខែមករា ឆ្នាំ២០២៤សាលាឧទ្ធរណ៍រាជធានីភ្នំពេញ រសៀលនេះបានសម្រេចតម្កល់សាលក្រម ពីបទមិនបំពេញកាតព្វកិច្ចចំពោះឧបករណ៍ដែលអាចជួញដូរបាន ទៅលើ អនុប្រធាន គណបក្សភ្លើងទៀន លោក ថាច់ សេដ្ឋា ។ លោក សេដ្ឋា ត្រូវបានតុលាការបង្គាប់ឱ្យកងកម្លាំងបញ្ជូនខ្លួនទៅកាន់ពន្ធនាគារភ្លាមៗ ក្រោយពេលប្រកាសសាលដីកា ។
សាលាដំបូងរាជធានីភ្នំពេញ បានកាត់ទោសលោក សេដ្ឋា នៅថ្ងៃទី២១ ខែកញ្ញា ឆ្នាំ២០២៣ ពីបទមិនបំពេញកាតព្វកិច្ចចំពោះឧបករណ៍ដែលអាចជួញដូរបាន យោងតាមមាត្រា២៣១ នៃច្បាប់ស្តីពីឧបករណ៍អាចជួញដូរបាន និងប្រតិបត្តិការទូទាត់សងប្រាក់ ។ គាត់ត្រូវបានតុលាការកាត់ឱ្យជាប់ពន្ធនាគារ ១៨ ខែ និងបង្គាប់ឱ្យសងជាប្រាក់ពិន័យ ៣ លានរៀល (ប្រមាណជា ៧៥០ដុល្លារ) និងសងប្រាក់ទៅកាន់ដើមបណ្តឹង ដែលជាហាងបញ្ចាំ រិនឆាយ ចំនួន ៣៣.៤០០ ដុល្លារ (ប្រមាណជា ១៣៣,៦ លានរៀល) និង សំណងជំងឺចិត្ត ៥ លានរៀល (ប្រមាណ ១.២៥០ដុល្លារ) ផងដែរ ។ សាលក្រមនេះ ត្រូវបានសាលាឧទ្ធរណ៍សម្រេចតម្កល់ទុកជាបានការ ។
បទចោទនេះ ត្រូវបានធ្វើឡើងតាមបណ្តឹងមួយ ដែលបានចោទលោក សេដ្ឋា ថាបានចេញ មូលប្បទានប័ត្រចំនួន ៥ សន្លឹកដែលគ្មានទឹកប្រាក់ (សែកស្អុយ) កាលពីឆ្នាំ ២០១៩ ដើម្បីសងប្រាក់ទៅកាន់ហាងបញ្ចាំ រិន ឆាយ ។ បញ្ហាបំណុលនេះ លោកបានលើកឡើងថា ជាករណីបណ្តឹងរដ្ឋប្បវេណីដែលមានពីមុន ហើយត្រូវបានដោះស្រាយ ដោយសាលាឧទ្ធរណ៍កាត់ក្តីឱ្យលោក សេដ្ឋា ឈ្នះក្តី ។
ពាក់ព័ន្ធនឹងករណីនេះ លោក ថាច់ សេដ្ឋា ត្រូវបានឃុំខ្លួនបណ្តោះអាសន្នរង់ចាំសវនាការ ចាប់តាំងពីពេលចាប់ខ្លួនកាលពីខែមករា ឆ្នាំ២០២៣ ។ សំណើសុំនៅក្រៅឃុំរបស់លោក ក៏ត្រូវបានតុលាការបដិសេធជាច្រើនលើកផងដែរ ។ សាលាដំបូងរាជធានីភ្នំពេញ ក៏ផ្តន្ទាទោសលោក សេដ្ឋា នៅក្នុងករណីដាច់ដោយឡែកមួយទៀតកាលពី ថ្ងៃ១៨ ខែតុលា ឆ្នាំ២០២៣ ផងដែរ ពីបទញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម និងបទញុះញង់ឱ្យមានការរើសអើង នៅពេលលោកថ្លែងសារទៅកាន់អ្នកគាំទ្រអតីតគណបក្សសង្គ្រោះជាតិ កាលពីឆ្នាំ ២០២៣ ៕