អង្គការសិទិ្ធមនុស្សដាក់ពាក្យបណ្តឹងទៅក្រុមហ៊ុន Oikocredit ពាក់ព័ន្ធនឹងការវិនិយោគលើវិស័យមីក្រូហិរញ្ញវត្ថុនៅកម្ពុជា
ចេញផ្សាយ ថ្ងៃទី១២ ខែធ្នូ ឆ្នាំ២០២២; ក្រុមសង្គមស៊ីវិលនាថ្ងៃនេះ អង្គការសិទិ្ធមនុស្សចំនួនបីស្ថាប័ន បានដាក់ពាក្យបណ្តឹងទៅកាន់ ស្ថាប័នទទួលពាក្យបណ្តឹងថ្នាក់ជាតិរបស់រដ្ឋាភិបាលប្រទេសហូឡង់សម្រាប់ការទទួលខុសត្រូវសកម្មភាពអាជីវកម្ម (National Contact Point for Responsible Business Conduct) ដោយចោទប្រកាន់ក្រុមហ៊ុន អយកូក្រេឌីត (Oikocredit) ដែលជាវិនិយោគិនសង្គមជាសកល ថាបានបរាជ័យក្នុងការអនុវត្តវិធានការត្រួតពិនិត្យឱ្យបានគ្រប់ជ្រុងជ្រោយ និងធ្វើការវិនិយោគដែលផ្តល់ផលប៉ះពាល់អវិជ្ជមាន នៅក្នុងវិស័យមីក្រូហិរញ្ញវត្ថុនៅកម្ពុជាចាប់តាំងពីឆ្នាំ ២០១៧ ទោះជាមានភស្តុតាងយ៉ាងច្បាស់ៗពីផលប៉ះពាល់ដោយផ្ទាល់ ពាក់ព័ន្ធនឹងការវិនិយោគទាំងនោះក៏ដោយ ។
ក្រុមហ៊ុន Oikocredit បានវិនិយោគយ៉ាងធំ និងបង្កើនការវិនិយោគទៅលើគ្រឹះស្ថានមីក្រូហិរញ្ញវត្ថុនៅកម្ពុជាចាប់តាំងពីឆ្នាំ ២០១៧ រហូតមកដល់ឆ្នាំ ២០២២ នេះ នៅពេលដែលមានភស្តុតាងជាច្រើនដែលបង្ហាញពីការជាប់ជំពាក់បំណុលច្រើនលើសលប់ និងផលប៉ះពាល់អវិជ្ជមានផ្នែកសង្គម តាមការចេញផ្សាយរបាយការណ៍ដោយអង្គការមិនមែនរដ្ឋាភិបាលក្នុងស្រុក អ្នកសារព័ត៌មាន អង្គការមិនមែនរដ្ឋាភិបាលអន្តរជាតិនានា និងរួមទាំងក្រុមហ៊ុន Oikocredit ខ្លួនឯងផ្ទាល់ ។ ទោះបីជាមានភស្តុតាងជាច្រើនក្តី ក៏ក្រុមហ៊ុន Oikocredit នៅតែបង្កើនការវិនិយោគរបស់ខ្លួននៅក្នុងគ្រឹះស្ថានមីក្រូហិរញ្ញវត្ថុនៅកម្ពុជា ដោយកើនឡើងពី ៥០លានអឺរ៉ូ នៅឆ្នាំ ២០១៧ ទៅដល់ជាង ៦៧លានអឺរ៉ូ គិតត្រឹមខែកញ្ញា ឆ្នាំ២០២២ នេះ ដែលការវិនិយោគនេះ ធ្វើឱ្យប្រទេសកម្ពុជា ក្លាយជាប្រទេសដែលទទួលបានការវិនិយោគធំទីពីររបស់ក្រុមហ៊ុន Oikocredit ។
ប្រទេសកម្ពុជា ជាប្រទេសដែលមានបំណុលមីក្រូហិរញ្ញវត្ថុក្នុងមនុស្សម្នាក់ច្រើនជាងគេបំផុតនៅក្នុងពិភពលោក ដោយទំហំបំណុលជាមធ្យម គឺច្រើនជាងបីដងនៃចំណូលជាមធ្យមរបស់ពលរដ្ឋកម្ពុជា ។ ហើយវិបតិ្តបំណុលដែលកំពុងបន្តកើតមានឡើងនេះ និងផលប៉ះពាល់ដែលអាចមើលដឹងជាមុនរបស់វា ក៏ត្រូវបានទទួលស្គាល់ដោយអគ្គលេខាធិកាអង្គការសហប្រជាជាតិ ក្រុមអង្គការសិទិ្ធមនុស្សក្នុងស្រុក និងអន្តរជាតិ ហើយសូម្បីតែការសិក្សាស្រាវជ្រាវមួយដែលទទួលបានជំនួយហិរញ្ញវត្ថុពីក្រុមហ៊ុន Oikocredit ខ្លួនឯងផងដែរ កាលពីឆ្នាំ ២០១៧ ។
ការវិនិយោគរបស់ក្រុមហ៊ុន Oikocredit បានរួមចំណែកក្នុងការបង្កើតឱ្យមានវិបត្តិសិទិ្ធមនុស្សដោយសារបញ្ហាបំណុលនៅកម្ពុជា ។ វិបត្តិនេះបង្កឱ្យមានការលក់ដីដោយបង្ខំ អសន្តិសុខស្បៀង និងការបាត់បង់ជីវភាពរស់នៅសមរម្យរបស់ពលរដ្ឋដែលជំពាក់បំណុលរាប់សែននាក់ ។ ពាក្យបណ្តឹងនេះ បានចោទប្រកាន់ក្រុមហ៊ុន Oikocredit ថាបានបដិសេធក្នុងការចូលរួមជាមួយដៃគូពាក់ព័ន្ធនៅក្នុងស្រុកដែលជាផ្នែកមួយនៃដំណើរការត្រួតពិនិត្យឱ្យបានគ្រប់ជ្រុងជ្រោយរបស់ក្រុមហ៊ុន ទោះបីជាមានការស្នើសុំពីក្រុមសង្គមស៊ីវិលជាតិទាំងនោះ និងកង្វល់នៃការប្រឈមនឹងការសងសឹកក៏ដោយ ។
ក្នុងនាមជាសមាជិកនៃអង្គការសម្រាប់កិច្ចសហប្រតិបត្តិការសេដ្ឋកិច្ច និងអភិវឌ្ឍន៍ (OECD) ស្ថាប័នទទួលពាក្យបណ្តឹងថ្នាក់ជាតិរបស់ប្រទេសហូឡង់ គឺជាយន្តការទទួលពាក្យបណ្តឹងគាំទ្រដោយរដ្ឋាភិបាល សម្រាប់បណ្តឹងពាក់ព័ន្ធនឹងសកម្មភាពអាជីវកម្មជាសកលរបស់ក្រុមហ៊ុនដែលមានមូលដ្ឋាននៅប្រទេសហូឡង់ និងការចោទប្រកាន់ពីការរំលោភបំពានរបស់ពួកគេ ស្ដីពីការទទួលខុសត្រូវក្នុងការធ្វើអាជីវកម្ម ដូចមានចែងនៅក្នុងគោលការណ៍ណែនាំស្ដីពីសហគ្រាសពហុជាតិរបស់ អង្គការ OECD ។
ទាញយករបាយការណ៍នេះ (PDF, 450.14 KBs) |
អង្គការមិនមែនរដ្ឋាភិបាលទាំង៣ដែលដាក់ពាក្យបណ្ដឹងនេះ ក្នុងនោះមានអង្គការសិទ្ធិមនុស្ស២នៅក្នុងប្រទេសកម្ពុជាគឺ អង្គការសម្ព័ន្ធខ្មែរជំរឿន និងការពារសិទ្ធិមនុស្ស លីកាដូ និងអង្គការសមធម៌កម្ពុជា ក៏ដូចជា អង្គការ FIAN អាឡឺម៉ង់ បានចេញផ្សាយជាសាធារណៈអំពីការរីករាលដាល និងការរំលោភសិទ្ធិមនុស្សជាប្រព័ន្ធ នៅក្នុងវិស័យមីក្រូហិរញ្ញវត្ថុនៅកម្ពុជា ក្នុងរយៈពេលប៉ុន្មានឆ្នាំចុងក្រោយនេះ រួមទាំងគ្រឹះស្ថានមីក្រូហិរញ្ញវត្ថុដែលទទួលបានមូលនិធិដោយផ្ទាល់ពី Oikocredit ផងដែរ ។
អ្នកនាង ណាលី ពីឡូក នាយិកាទទួលបន្ទុកកិច្ចការក្រៅតំបន់នៃអង្គការលីកាដូ បានមានប្រសាសន៍ថា “Oikocredit បានអះអាងថាជា វិនិយោគិនមួយដើម្បីអភិវឌ្ឍសង្គម ប៉ុន្តែការវិនិយោគរបស់ពួកគេនៅក្នុងប្រទេសកម្ពុជា បានធ្វើឱ្យប៉ះពាល់ដល់អ្នកខ្ចីប្រាក់នៅទីនេះ យ៉ាងធ្ងន់ធ្ងរ ។ ក្ដីសង្ឃឹមរបស់យើងគឺថា ពាក្យបណ្ដឹងនេះនឹងបង្ខំឱ្យ Oikocredit ក៏ដូចជាវិនិយោគិនផ្សេងទៀត ដែលបានអះអាងថា ធ្វើការវិនិយោគដើម្បីសង្គមប្រកបដោយប្រសិទ្ធភាព ប៉ុន្តែបង្កើតឱ្យមានវិបត្តិសិទ្ធិមនុស្សនេះ ឱ្យធ្វើការជួសជុលការខូចខាតដែលពួកគេបានរួមចំណែក និងផ្ដល់ការអនុគ្រោះពិតប្រាកដសម្រាប់ប្រជាពលរដ្ឋខ្មែរអ្នកខ្ចីប្រាក់” ។
ចាប់តាំងពីឆ្នាំ២០១៩ អង្គការលីកាដូ បានចេញផ្សាយរបាយការណ៍ចំនួន៤ ស្ដីពីការរំលោភបំពាននៅក្នុងវិស័យមីក្រូហិរញ្ញវត្ថុនៅកម្ពុជា ។ នៅក្នុងរបាយការណ៍ចុងក្រោយថ្មីៗនេះ “សិទ្ធិទទួលបានការអនុគ្រោះ” ដែលបានចេញផ្សាយរួមគ្នាជាមួយ អង្គការសមធម៌កម្ពុជា ក្នុងខែមិថុនា ឆ្នាំ២០២១ អង្គការទាំងពីរបានសម្ភាសអ្នកខ្ចីប្រាក់ជាង ១៧០នាក់ នៅទូទាំង១៤សហគមន៍ នៅកម្ពុជា ដោយរៀបរាប់អំពីការអនុវត្តការប្រមូលឥណទានបែបកេងប្រវ័ញ្ច ការលក់ដីដោយបង្ខំ និងការបំភិតបំភ័យ ដែលកើតមានជាញឹកញាប់នៅក្នុងវិស័យមីក្រូហិរញ្ញវត្ថុ ដែលនាំឱ្យមានអសន្តិសុខស្បៀង ការលក់ដី ពលកម្មកុមារ ចំណាកស្រុក និងការរំលោភបំពានផ្សេងទៀត ។
កាលពីខែកុម្ភៈ ឆ្នាំ២០២២ អង្គការ FIAN នៅអាឡឺម៉ង់ បានចេញផ្សាយរបាយការណ៍មួយ មានចំណងជើងថា “Mikrokredite und Überschuldungskrise in Kambodscha” ដែលពិពណ៌នាពីការផ្ដល់មូលនិធិរបស់រដ្ឋាភិបាល និងធនាគារអាឡឺម៉ង់ ទៅកាន់គ្រឹះស្ថានមីក្រូហិរញ្ញវត្ថុដែលមានគ្រោះថ្នាក់ ។ ចាប់តាំងពីពេលនោះមក ការសិក្សាមួយដែលគាំទ្រដោយ BMZ របស់វិទ្យាស្ថានសម្រាប់ការអភិវឌ្ឍ និងសន្តិភាព (INEF) បានបញ្ជាក់ដូចគ្នាថា ការរកឃើញរបស់អង្គការទាំងបីនេះ ដោយបានប៉ាន់ប្រមាណថា អ្នកខ្ចីប្រាក់រហូតដល់ ១៦០.០០០ នាក់ នៅក្នុងប្រទេសកម្ពុជា បានលក់ដី ដើម្បីបង់សងបំណុលគ្រឹះស្ថានមីក្រូហិរញ្ញវត្ថុ ក្នុងរយៈពេល៥ឆ្នាំចុងក្រោយនេះ ដែលនេះមានន័យថា មានការលក់ដីម្ដងនៅរៀងរាល់១៦នាទី ។
លោក Mathias Pfeifer មន្ត្រីកម្មវិធីនៃអង្គការ FIAN អាឡឺម៉ង់ បានមានប្រសាសន៍ថា “Oikocredit និងវិនិយោគិនរបស់រដ្ឋ និងវិនិយោគិនសង្គមជាច្រើនផ្សេងទៀត បានមើលរំលងពីភស្តុតាងដែលបង្ហាញពីការកើនឡើងនៃភាពជាប់ជំពាក់បំណុលច្រើនលើសលប់ និងគ្រោះថ្នាក់សង្គម ហើយនៅតែបន្តផ្ដល់ប្រាក់វិនិយោគនៅក្នុងគ្រឹះស្ថានមីក្រូហិរញ្ញវត្ថុនៅកម្ពុជា” ។
ពាក្យបណ្ដឹង OECD កើតឡើង ខណៈដែលគ្រឹះស្ថានមីក្រូហិរញ្ញវត្ថុជាច្រើនដែលទទួលបានមូលនិធិពី Oikocredit កំពុងរងបណ្ដឹងមួយដែលកំពុងដំណើរការ នៅការិយាល័យភាពអនុលោម ទីប្រឹក្សាដោះស្រាយវិវាទនៃសាជីវកម្មហិរញ្ញវត្ថុអន្តរជាតិ ។ ពាក្យបណ្ដឹងនោះ ត្រូវបានដាក់ប្ដឹងក្នុងខែកុម្ភៈ ឆ្នាំ២០២២ ដោយអង្គការលីកាដូ និងអង្គការសមធម៌កម្ពុជា តំណាងឱ្យអ្នកខ្ចីប្រាក់ដែលរងផលប៉ះពាល់ ដែលបានឈានដល់ដំណាក់កាលត្រួតពិនិត្យអនុលោមភាព នៅថ្ងៃទី១០ ខែវិច្ឆិកា ឆ្នាំ២០២២ ។
កាលពីខែតុលា ឆ្នាំ២០២១ ធនាគារអភិវឌ្ឍនៅហូឡង់ឈ្មោះ FMO បានវិនិយោគទឹកប្រាក់ ៥០លានដុល្លារ នៅក្នុងគ្រឹះស្ថានមីក្រូហិរញ្ញវត្ថុមួយ ដែលជាប់ពាក់ព័ន្ធនឹងការរំលោភបំពាន ។ អំឡុងពេលនោះ មូលនិធិជំនួយមួយដែលបានម្ចាស់ភាគហ៊ុនដូចជា សាជីវកម្មហិរញ្ញវត្ថុអន្តរជាតិ KfW, BMZ និងស្ថាប័នរដ្ឋនៅអឺរ៉ុបផ្សេងទៀត បានបង្កើនការវិនិយោគរបស់ពួកគេ នៅក្នុងគ្រឹះស្ថានមីក្រូហិរញ្ញវត្ថុផងដែរ ។ ក្នុងខែមេសា ឆ្នាំ២០២២ ធនាគារអភិវឌ្ឍហេដ្ឋារចនាសម្ព័ន្ធអាស៊ី (AIIB) បានធ្វើការអនុម័តយ៉ាងប្រញាប់ប្រញាល់នូវការវិនិយោគដំបូងរបស់ខ្លួននៅក្នុងវិស័យមីក្រូហិរញ្ញវត្ថុនៅកម្ពុជា ដោយសន្យាថានឹងផ្ដល់ទឹកប្រាក់ចំនួន ១៧៥លានដុល្លារទៅកាន់គ្រឹះស្ថានមីក្រូហិរញ្ញវត្ថុចំនួន២ ដែលបច្ចុប្បន្នកំពុងរងបណ្ដឹងនៅ ការិយាល័យភាពអនុលោម ទីប្រឹក្សាដោះស្រាយវិវាទ ។ ក្នុងខែសីហា ឆ្នាំ២០២២ អង្គការកម្មវិធីអភិវឌ្ឍន៍របស់អង្គការសហប្រជាជាតិ (UNDP) នៅកម្ពុជា បានរួមបញ្ចូលការវិនិយោគនៅក្នុងគ្រឹះស្ថានមីក្រូហិរញ្ញវត្ថុ ជាផ្នែកមួយនៃកម្មវិធីរបស់ពួកគេស្ដីពី គោលដៅអភិវឌ្ឍប្រកបដោយចីរភាព ដែលឆ្លុះបញ្ចាំងពីកង្វះខាតនៃការចាត់វិធានការឱ្យបានគ្រប់ជ្រុងជ្រោយ និងការយល់ដឹងលើបញ្ហាទាំងនេះ ក្នុងចំណោមភ្នាក់ងារអភិវឌ្ឍមួយចំនួន ។
នាយកប្រតិបត្តិនៃអង្គការសមធម៌កម្ពុជា លោក អៀង វុទ្ធី បានមានប្រសាសន៍ថា “វិនិយោគិន និងភ្នាក់ងារអភិវឌ្ឍន៍ ត្រូវយល់ដឹងថា ការវិនិយោគរបស់ពួកគេកំពុងតែធ្វើឱ្យមានផលប៉ះពាល់យ៉ាងពិតប្រាកដ ហើយពួកគេគួរតែចូលតុចរចា ដើម្បីចាប់ផ្ដើមពិភាក្សាអំពីវិធីសាស្ត្រក្នុងការដោះស្រាយបញ្ហាទាំងនេះ” ។ លោកបន្ថែមថា “ពួកយើងបានត្រៀមខ្លួនក្នុងការធ្វើការជាមួយវិនិយោគិន ដែលចាប់អារម្មណ៍ក្នុងការស្វែងរកដំណោះស្រាយពិតប្រាកដ ដែលជាប្រយោជន៍របស់អ្នកខ្ចីប្រាក់ដែលងាយរងគ្រោះជាងគេ នៅកម្ពុជា ហើយផ្ដល់ការអនុគ្រោះពិតប្រាកដ សម្រាប់អ្នកខ្ចីប្រាក់ដែលកំពុងជួបទុក្ខលំបាក” ៕
សម្រាប់ព័ត៌មានបន្ថែម សូមទាក់ទង៖
▪ លោក អៀង វុទ្ធី នាយកប្រតិបត្តិនៃអង្គការសមធម៌កម្ពុជាតាមរយៈ Signal: (+៨៥៥) ១២ ៧៩១ ៧០០ (ភាសាខ្មែរ និងអង់គ្លេស)
▪ អ្នកនាង ណាលី ពីឡូក នាយិកាទទួលបន្ទុកកិច្ចការក្រៅតំបន់នៃអង្គការលីកាដូ តាមរយៈ Signal: (+៨៥៥) ១២ ២១៤ ៤៥៤ (ភាសាអង់គ្លេស)
▪ លោក Pfeifer Mathias មន្ត្រីកម្មវិធីនៃអង្គការ FIAN អាឡឺម៉ង់ តាមរយៈ Signal: (+៤៩) ១៧៦៥៤១១៣៩៨៨, m.pfeifer@fian.de
PDF៖ ទាញយកសេចក្តីថ្លែងការណ៍ជាភាសាអង់គ្លេស - ទាញយកសេចក្តីថ្លែងការណ៍ជាភាសាខ្មែរ
MP3៖ ស្តាប់សំឡេងជាភាសាខ្មែរ
- ចំណងជើង & មូលបទ
- តុលាការ និងនីតិរដ្ឋ គ្រឹះស្ថានមីក្រូហិរញ្ញវត្ថុ និងបញ្ហាបំណុល