តុលាការកំពូលតម្កល់ការផ្តន្ទាទោសលើសកម្មជនចលនាមាតាធម្មជាតិ
ចេញផ្សាយ ថ្ងៃទី២៩ ខែកក្កដា ឆ្នាំ២០២២
តុលាការកំពូលនាព្រឹកនេះ បានប្រកាសតម្កល់ការផ្តន្ទាទោសសកម្មជនចលនាមាតាធម្មជាតិ បីរូប ដោយបន្តឱ្យអ្នកទាំងបីស្ថិតនៅក្រោមវិធានការត្រួតពិនិត្យដ៏តឹងរ៉ឹងរបស់តុលាការ ។
សកម្មជនទាំងបីរូប ដែលរួមមាន លោក ថុន រដ្ឋា កញ្ញា ឡុង គន្ធា និងកញ្ញា ភួន កែវរស្មី ត្រូវបានសាលាដំបូងរាជធានីភ្នំពេញផ្តន្ទាទោស កាលពីខែឧសភា ឆ្នាំ ២០២១ ក្រោមបទចោទ ញុះញង់ ដោយយោងតាមមាត្រា ៤៩៤ និង ៤៩៥ នៃក្រមព្រហ្មទណ្ឌ ។ សាលាឧទ្ធរណ៍រាជធានីភ្នំពេញ ក៏បានរក្សាការផ្តន្ទាទោស និងព្យួរទោសរបស់សាលាដំបូង កាលពីខែវិច្ឆិកា ឆ្នាំ២០២១ ។ រដ្ឋា ត្រូវបានសាលាដំបូងផ្តន្ទាទោសឱ្យជាប់ពន្ធនាគារចំនួន ២០ ខែ ប៉ុន្តែសាលាឧទ្ធរណ៍បន្ថយទោស ដោយអនុវត្តទោសចំនួន ១៤ខែ ព្យួរទោស ៦ ខែដែលនៅសល់ ។ គន្ធា និងរស្មី ត្រូវបានសាលាឧទ្ធរណ៍រក្សាទោសជាប់ពន្ធនាគារចំនួន ១៨ ខែដដែល ប៉ុន្តែអនុវត្តទោសចំនួន ១៤ខែ ព្យួរទោសចំនួន ៤ ខែដែលនៅសល់ ។ អ្នកទាំងបី ក៏ត្រូវបានតុលាការពិន័យជាប្រាក់ម្នាក់ៗចំនួន ៤លានរៀលផងដែរ ។
អ្នកទាំងបី មិនមានវត្តមាននៅក្នុងបន្ទប់សវនាការនាព្រឹកនេះនោះទេ នៅពេលដែលចៅក្រមតុលាការកំពូលប្រកាសសាលដីកាតម្កល់សេចក្តីសម្រេចរបស់សាលាឧទ្ធរណ៍ ។ សាលាឧទ្ធរណ៍ ក៏បានសម្រេចដាក់អ្នកទាំងបីឱ្យស្ថិតក្រោមការវិធានការត្រួតពិនិត្យដោយភ្ជាប់ជាមួយនូវកាតព្វកិច្ចដោយឡែកយ៉ាងច្រើនសន្ធឹកសន្ធាប់រយៈពេល បីឆ្នាំ ហើយប្រសិនបើល្មើស អ្នកទាំងបីអាចនឹងត្រូវប្រឈមមុខនឹងការទទួលទោសដែលនៅសល់ ។ សកម្មជនចលនាមាតាធម្មជាតិពីររូបទៀត គឺកញ្ញា ជា គន្ធីន និងលោក អាឡិចសាន់ដ្រូ ហ្គោដសាឡេស ដេវីដសុន ក៏ត្រូវបានផ្តន្ទាទោសដោយកំបាំងមុខទៅលើករណីនេះនៅសាលាដំបូងផងដែរ ។
គន្ធា រស្មី និងរដ្ឋា បានធ្វើការងារជាច្រើន ដើម្បីបង្ហាញដល់សាធារណជនអំពីការបំផ្លិចបំផ្លាញធនធានធម្មជាតិនៅក្នុងប្រទេស ។ ការផ្តន្ទាទោសនេះ ត្រូវបានធ្វើឡើងក្រោយពេលដែលអ្នកទាំងនោះរៀបចំយុទ្ធនាការដើរតែម្នាក់ឯងរបស់គន្ធា នៅភ្នំពេញ ដើម្បីស្នើសុំឱ្យបញ្ឈប់ការលុបបឹងតាមោក ។ អ្នកទាំងបី ត្រូវបានចាប់ខ្លួនកាលពីខែកញ្ញា ឆ្នាំ២០២០ និងត្រូវបានឃុំខ្លួនក្នុងពន្ធនាគាររយៈពេល ១៤ខែ មុនពេលអ្នកទាំងបី ត្រូវបានដោះលែងជាមួយសកម្មជនចលនាមាតាធម្មជាតិចំនួន បីរូបផ្សងទៀត កាលពីខែវិច្ឆិកា ឆ្នាំ២០២១ ។
អ្នកទាំងបី នៅតែបន្តប្រឈមមុខនឹងបទចោទ ក្បត់ជាតិ និងទោសជាប់ពន្ធនាគាររហូតដល់ ១០ ឆ្នាំ នៅក្នុងករណីមួយផ្សេងទៀត ជាមួយនឹងសកម្មជនចលនាមាតាធម្មជាតិផ្សេងទៀត ដែលរួមមាន កញ្ញា ស៊ុន រដ្ឋា លោក យឹម លាងហ៊ី លោក លី ចាន់ដារ៉ាវុត និងលោក អាឡិចសាន់ដ្រូ ហ្គោដសាឡេស ដេវីដសុន ៕
- ឯកសារទាក់ទង
- ចំណងជើង & មូលបទ
- សិទិ្ធបញ្ចេញមតិ និងចូលរួម មាតាធម្មជាតិ
