ការបោះឆ្នោត
.jpg)
ថ្ងៃទី១៥ ខែកុម្ភៈ ឆ្នាំ២០២៤
សាលាឧទ្ធរណ៍បាត់ដំបងថ្ងៃនេះ បានតម្កល់សាលក្រមសាលាដំបូងខេត្តបន្ទាយមានជ័យ ដោយផ្តន្ទាទោសដាក់ពន្ធនាគាររយៈពេល ៣ ឆ្នាំ លើ លោក កង សារ៉ន ដែលជាសកម្មជនសង្គម ហើយត្រូវបានអាជ្ញាធរចាប់ខ្លួន កាលពីខែ កក្កដា ឆ្នាំ ២០២៣ ជុំវិញការបញ្ចេញមតិរបស់លោកទៅលើបញ្ហានយោបាយតាមរយៈការផ្សាយផ្ទាល់លើបណ្តាញសង្គម ហ្វេសប៊ុក របស់លោក ។
លោក សារ៉ន ត្រូវបានចាប់ខ្លួនដំបូងកាលពីថ្ងៃទី២ ខែកក្កដា ឆ្នាំ២០២៣ ពេលដែលលោកបានបញ្ចេញមតិនៅក្នុងវីដេអូមួយ ដែលបង្ហោះតាមគណនីហ្វេសប៊ុករបស់លោក នៅអំឡុងពេលនៃការឃោសនាបោះឆ្នោតថ្នាក់ជាតិ ។ ក្រោយមក លោក សារ៉ន ក៏ត្រូវបានលែងវិញបន្ទាប់ពីលោកបានធ្វើការសុំទោស ។ ទោះបីជាយ៉ាងណាក៏ដោយ លោកត្រូវបានកាត់ទោស ដោយសាលាដំបូងខេត្តបន្ទាយមានជ័យ កាលពីថ្ងៃទី ២២ ខែវិច្ឆិកា ពីបទ “ញុះញង់ឱ្យប្រព្រឹត្តបទឧក្រិដ្ឋជាអាទិ៍” “ជេរប្រមាថជាសាធារណៈ” និងបទ “ប្រមាថចំពោះអង្គព្រះមហាក្សត្រ” ហើយត្រូវបានផ្តន្ទាទោសដាក់ពន្ធនាគាររយៈពេល ៣ ឆ្នាំ ។ លោក សារ៉ន ត្រូវបានចាប់ខ្លួនកាលពី ថ្ងៃទី២៥ ខែវិច្ឆិកា និងឃុំខ្លួននៅក្នុងពន្ធនាគារខេត្តបន្ទាយមានជ័យ ។
សាលាឧទ្ធរណ៍បាត់ដំបង បានសម្រេចតម្កល់ការផ្តន្ទាទោសខាងលើនេះ កាលពីថ្ងៃព្រហស្បតិ៍ ។ ដូចនេះលោកនឹងនៅបន្តក្នុងពន្ធនាគារ រង់ចាំការប្តឹងសាទុក្ខទៅតុលាការកំពូល ។
ថ្ងៃទី៧ ខែកុម្ភៈ ឆ្នាំ២០២៤
ថ្ងៃទី ៧ ខែកុម្ភៈ ឆ្នាំ២០២៤ សាលាដំបូងខេត្តចំនួនពីរ បានសម្រេចផ្តន្ទាទោសសកម្មជនដ៏លេចធ្លោចំនួន ពីររូប នៅក្នុងសំណុំរឿងចំនួន ពីរ ដាច់ដោយឡែកពីគ្នា ។
សកម្មជនបរិស្ថាន លោក ឆន ផល្លា ត្រូវបានផ្តន្ទាទោសដាក់ពន្ធនាគារចំនួន ១ឆ្នាំ
សាលាដំបូងខេត្តរតនគិរី នាព្រឹកថ្ងៃនេះ បានប្រកាសសាលក្រម ដោយសម្រេចផ្តន្ទាទោសលោក ឆន ផល្លា ពីបទបរិហាកេរ្តិ៍ជាសាធារណៈ ប្រមាថ និងបទ ញុះញង់ឲ្យប្រព្រឹត្តបទឧក្រិដ្ឋជាអាទិ៍ ដោយយោងតាមមាត្រា ៣០៥ ៥០២ និង ៤៩៥ នៃក្រមព្រហ្មទណ្ឌ ។ តុលាការបានផ្តន្ទាទោសលោក ដោយដាក់ពន្ធនាគារកំណត់ចំនួន ១ ឆ្នាំ និងពិន័យជាប្រាក់ចំនួន ១០ លានរៀល (ប្រមាណ ២.៥០០ ដុល្លារអាមេរិក) ។
ថ្ងៃទី១ ខែកុម្ភៈ ឆ្នាំ២០២៤
ការបង្រ្កាបទៅលើសមាជិកគណបក្សជំទាស់ គឺកាន់តែកើនឡើង ដោយកាលពីម្សិលមិញ សមាជិកគណបក្សជំទាស់ពីររូបបន្ថែមទៀតត្រូវបានចាប់ខ្លួន ។ អាជ្ញាធរបន្តចាប់ និងឃុំខ្លួនអ្នកដែលមាននិន្នាការនយោបាយជំទាស់ មុនឈានដល់ការបោះឆ្នោតព្រឹទ្ធសភាខាងមុខនេះ ។
លោក ម៉ា ចិន្តា ប្រធានក្រុមចលនាយុវជនគណបក្សភ្លើងទៀនប្រចាំខណ្ឌដូនពេញ រាជធានីភ្នំពេញ ត្រូវបានអាជ្ញាធរចាប់ខ្លួនកាលពីថ្ងៃទី ៣១ ខែមករា ឆ្នាំ២០២៤ ក្នុងអំឡុងពេលមានការប្រជុំគណបក្សភ្លើងទៀននៅក្នុងរាជធានីភ្នំពេញ ។ នៅថ្ងៃដដែល លោក ហាក់ កុសល ដែលជាសកម្មជនគណបក្សជំទាស់មួយរូបទៀតក៏ត្រូវបានអាជ្ញាធរចាប់ខ្លួនផងដែរ ។ ការចាប់ខ្លួនលោក កុសល ត្រូវបានធ្វើឡើងមួយថ្ងៃ ក្រោយពេលដែលលោកបានទៅដាក់បញ្ជីឈ្មោះអ្នកសង្កេតការណ៍សម្រាប់ការបោះឆ្នោតព្រឹទ្ធសភា តំណាងឱ្យគណបក្សឆន្ទៈខ្មែរ នៅគណៈកម្មាការរាជធានីខេត្ត រៀបចំការបោះឆ្នោត ។
អ្នកទាំងពីរត្រូវបានចោទពីបទ “ក្លែងបន្លំ” និង “ប្រើប្រាស់លិខិតក្លែង” ដែលប្រឈមនឹងជាប់ពន្ធនាគារពី ១ឆ្នាំ ទៅ ៣ឆ្នាំ ប្រសិនបើរកឃើញថាមានទោស ។
ថ្ងៃទី៣០ ខែមករា ឆ្នាំ២០២៤
នាព្រឹកនេះ សាលាឧទ្ធរណ៍រាជធានីភ្នំពេញ បានបើកសវនាការលើកដំបូងទាក់ទងនឹងការផ្តន្ទាទោសលើឯកឧត្តម កឹម សុខា ពីបទក្បត់ជាតិ និងបទសន្ទិដ្ឋិភាពជាមួយបរទេស ។ ឯកឧត្តម គឺជាអតីតប្រធានគណបក្សសង្គ្រោះជាតិ (CNRP) ដែលត្រូវបានរំលាយ ។ ឯកឧត្តមត្រូវបានផ្តន្ទាទោសឲ្យជាប់ពន្ធនាគារ ២៧ ឆ្នាំ ដោយសាលាដំបូងរាជធានីភ្នំពេញកាលពី ខែមីនា ឆ្នាំ២០២៣ ។ ការផ្តន្ទាទោសនេះ ធ្វើឡើងក្នុងរយៈពេលមិនដល់ ៥ខែ នោះទេ មុនពេលបោះឆ្នោតជាតិ កាលពីខែកក្កដា ឆ្នាំមុននេះ ។ ឯកឧត្តម កឹម សុខា ត្រូវបានបញ្ជូនទៅឃុំខ្លួនក្នុងផ្ទះ រហូតដល់សាលដីកាចូលជាស្ថាពរ ។
អំឡុងពេលសវនាការ មេធាវីរបស់ឯកឧត្តមបានស្នើសុំតុលាការឱ្យកែសម្រួលលក្ខខណ្ឌតឹងរឹងមួយចំនួនអំឡុងពេលឃុំខ្លួនក្នុងផ្ទះ ប៉ុន្តែចៅក្រមបានបដិសេធ និងបន្តឱ្យឯកឧត្តមស្ថិតនៅក្រោមលក្ខខណ្ឌនៃការត្រួតពិនិត្យតាមផ្លូវតុលាការដដែល ។
មុនពេលចាប់ផ្តើមសវនាការ អាជា្ញធរបានធ្វើការបិទផ្លូវជុំវិញសាលាឧទ្ធរណ៍ ដោយហាមឃាត់មិនឱ្យសាធារណជន ក៏ដូចជាអ្នកសារព័ត៌មានអាចចូលទៅខាងមុខអាគារតុលាការបាននោះទេ ។
ថ្ងៃទី១៦ ខែមករា ឆ្នាំ២០២៤
ប្រធានស្តីទីគណៈកម្មាធិការប្រតិបត្តិនៃគណបក្សភ្លើងទៀនរាជធានីភ្នំពេញត្រូវបានឃាត់ខ្លួន កាលពីថ្ងៃ ច័ន្ទ និងបានបញ្ជូនខ្លួនទៅកាន់តុលាការ នៅថ្ងៃនេះ បន្ទាប់ពីរងការចោទប្រកាន់ដោយសាលាដំបូងរាជធានីភ្នំពេញ ពីបទ ក្លែងបន្លំឯកសារពាក់ព័ន្ធនឹងការបោះឆ្នោត ។
កាលពីថ្ងៃច័ន្ទ លោក ខឹម ចាន់វណ្ណៈ ត្រូវបានឃាត់ខ្លួនពេញមួយយប់ដោយនគរបាល ខណៈពេលដែលលោកកំពុងស្ថិតនៅក្នុងគេហដ្ឋានជាមួយក្រុមគ្រួសាររបស់លោក។ នៅថ្ងៃ អង្គារ៍ ស្នងការដ្ឋាននគរបាលរាជធានីភ្នំពេញបាន ចេញសេចក្តីថ្លែងការណ៍មួយ ដោយបានលើកឡើងថា លោក ខឹម ចាន់វណ្ណៈ ត្រូវបានឃាត់ខ្លួន ដើម្បីឆ្លើយបំភ្លឺទាក់ទិននឹង ការក្លែងបន្លំឯកសារពាក់ព័ន្ធនឹងការបោះឆ្នោតកាលពីថ្ងៃទី ៧ ខែវិច្ឆិកា ឆ្នាំ២០២៣ កន្លងទៅ។
ថ្ងៃទី៦ ខែធ្នូ ឆ្នាំ២០២៣
នារសៀលនេះ មន្ត្រីនគរបាលចំនួន ៦នាក់ បានចូលក្នុងបរិវេណការិយាល័យ លីកាដូ ខេត្តបន្ទាយមានជ័យ ហើយបានចាប់ខ្លួនមនុស្សចំនួន ៤ នាក់ ដែលកំពុងទទួលការប្រឹក្សាយោបល់ផ្នែកច្បាប់ ទាក់ទងនឹងករណីសកម្មជនបញ្ចេញមតិក្នុងបណ្តាញសង្គម ដែលកំពុងជាប់ក្នុងពន្ធនាគារ លោក កង សារ៉ន ។ លោក កង សារ៉ន ទទួលបានការការពារក្តីតាមផ្លូវច្បាប់ពីក្រុមមេធាវីរបស់អង្គការ លីកាដូ ។
អ្នកទាំងបួន រួមមានអ្នកស្រី ហង្ស ត្រឹប ជាភរិយាលោក សារ៉ន កញ្ញា សេង ចន្ថា ជាកូនស្រីរបស់លោក សារ៉ន និងអ្នកជិតខាងពីរនាក់ផ្សេងទៀត ដែលជូនអ្នកទាំងពីរមកការិយាល័យ លីកាដូ ខេត្តបន្ទាយមានជ័យ ។ អ្នកទាំងបួន ត្រូវបានចាប់ខ្លួន ១០ នាទី ក្រោយពេលចូលមកដល់ការិយាល័យរបស់អង្គការ លីកាដូ បន្ទាប់ពីអ្នកទាំងនោះ បានទៅសួរសុខទុក្ខលោក សារ៉ន នៅក្នុងពន្ធនាគារកាលពីពេលព្រឹក ។
បុគ្គលិកអង្គការ លីកាដូ បានស្នើសុំការបង្ហាញឯកសារពាក់ព័ន្ធ ប៉ុន្តែមន្ត្រីនគរបាលទាំងនោះមិនបានបង្ហាញនោះទេ ហើយបែរជានិយាយថា ពួកគេ “ធ្វើតាមបទបញ្ជា” ទៅវិញ ។ មន្ត្រីនគរបាលទាំងនោះ ក៏បានបញ្ជាឱ្យបុគ្គលិក លីកាដូ លុបចោលរូបភាព ដែលបុគ្គលិកថតបាន អំពីវត្តមានរបស់មន្ត្រីនគរបាលទាំងនោះចូលក្នុងបរិវេណការិយាល័យ ដោយមិនមានបង្ហាញដីកា ។
ថ្ងៃទី១០ ខែវិច្ឆិកា ឆ្នាំ២០២៣
នាព្រឹកនេះ តុលារការកំពូលបានច្រានចោលប្តឹងឧទ្ធរណ៍របស់មន្ត្រីគណបក្សភ្លើងទៀនមួយរូប និងបដិសេធការស្នើសុំឱ្យនៅក្រៅឃុំរបស់មន្រ្តីគណបក្សភ្លើងទៀនមួយរូបទៀត នៅក្នុងសំណុំរឿងពីរផ្សេងគ្នា ដែលធ្វើឱ្យពួកគេនៅបន្តជាប់ពន្ធនាគារ។
តុលារការបានច្រានចោលប្តឹងឧទ្ធរណ៍របស់លោក តូច ថឹង ជាប្រធានប្រចាំខេត្តម្នាក់របស់គណបក្សភ្លើងទៀន ដែលត្រូវបាន
ផ្តន្ទាទោសពីបទក្លែងបន្លំ និងបទប្រើប្រាស់លិខិតក្លែងក្លាយ កាលពីដើមឆ្នាំនេះ។ តុលារការកំពូល ក៏បានសម្រេចបន្តឱ្យឃុំខ្លួនបណ្តោះអាសន្នលេីលោក ចៅ វាសនា ជាអតីតចៅសង្កាត់ប៉ោយប៉ែត និងជាសមាជិកគណៈកម្មាធិការអចិន្រ្តៃយ៍នៃគណបក្សភ្លើងទៀន ដែលកំពុងរងចាំការជំនុំជម្រះក្តីពីបទញុះញុង។ មន្រ្តីទាំងពីររូបនេះត្រូវបានបញ្ជូនទៅពន្ធនាគារវិញបន្ទាប់ពីសវនាការរួច។
ថ្ងៃទី២១ ខែកញ្ញា ឆ្នាំ២០២៣
នាព្រឹកនេះ សាលាដំបូងរាជធានីភ្នំពេញ បានសម្រេចផ្ដន្ទាទោស លោក ថាច់ សេដ្ឋា អនុប្រធានគណបក្សភ្លើងទៀន ពីបទមិនបំពេញកាតព្វកិច្ចចំពោះឧបករណ៍ដែលអាចជួញដូរបាន និងបានកាត់ទោសឱ្យលោកជាប់ ពន្ធនាគារ១ឆ្នាំ និង៦ខែ ក៏ដូចជាការពិន័យជាប្រាក់ និងសំណងជំងឺចិត្តផ្សេងទៀត ។ ករណីនេះ ធ្វើឡើងក្រោយពេលមានពាក្យបណ្ដឹងមួយដោយហាងបញ្ចាំឈ្មោះ រិន ឆាយ ដែលបានចោទប្រកាន់លោក សេដ្ឋា ថាបាន ចេញមូលប្បទានបត្រឥតប្រាក់ (សែកស្អុយ) ចំនួន៥ ក្នុងការទូទាត់សងប្រាក់កម្ចីនៅឆ្នាំ២០១៩ ។ លោក សេដ្ឋា ត្រូវបានឃុំខ្លួនបណ្ដោះអាសន្នរង់ចាំសវនាការ ចាប់តាំងពីថ្ងៃចាប់ខ្លួនលោកក្នុងខែមករា ឆ្នាំ២០២៣ ដោយសំណើសុំនៅក្រៅឃុំជាបន្តបន្ទាប់របស់លោកត្រូវបានបដិសេធផងដែរ ។
តុលាការ បានកាត់ទោសលោក សេដ្ឋា តាមបញ្ញត្តិមាត្រា ២៣១នៃច្បាប់ស្ដីពីឧបករណ៍អាចជួញដូរបាន និងប្រតិបត្តិការទូទាត់សងប្រាក់ ។ លោក ត្រូវបានពិន័យជាប្រាក់ទៅរដ្ឋចំនួន ៣លានរៀល (ប្រមាណជា ៧៥០ដុល្លារ) ព្រមទាំងបង្គាប់ឱ្យសងប្រាក់ចំនួន ៣៣.៤០០ ដុល្លារ (ទឹកប្រាក់ដែលលោកជំពាក់ ហាងបញ្ចាំរិនឆាយ) និងសំណងជំងឺចិត្តចំនួន៥លានរៀលទៅដើមបណ្ដឹងរដ្ឋប្បវេណីផងដែរ ។
នាថ្ងៃនេះ សាលាដំបូងរាជធានីភ្នំពេញ ក៏បានបើកសវនាការក្នុងសំណុំរឿងដាច់ដោយឡែកមួយទៀត ពាក់ព័ន្ធនឹងការចោទប្រកាន់លោក ថាច់ សេដ្ឋា ពីបទញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម និងបទញុះញង់ឱ្យមានការរើសអើង តាមបញ្ញត្តិមាត្រា៤៩៤ មាត្រា៤៩៥ និងមាត្រា៤៩៦នៃក្រមព្រហ្មទណ្ឌ ។ លោក សេដ្ឋា ត្រូវបានចោទប្រកាន់ក្នុងខែមេសា ឆ្នាំ២០២៣ ពាក់ព័ន្ធនឹងការអត្ថាធិប្បាយរបស់លោកទៅកាន់ពលករចំណាកស្រុកនៅប្រទេសកូរ៉េខាងត្បូង កាលពីថ្ងៃទី០៨ ខែមករា ឆ្នាំ២០២៣ ដែលត្រូវបានផ្សព្វផ្សាយដោយប្រភពមិនស្គាល់មួយនៅលើ យូធ្យូប (YouTube) ។ លោក សេដ្ឋា ក៏ត្រូវបានបង្គាប់ឱ្យបញ្ជូនទៅឃុំខ្លួនបណ្ដោះអាសន្ន ផ្អែកតាមបទចោទទាំងនេះផងដែរ ដោយតុលាការកំពូលបានសម្រេចបដិសេធសំណើសុំនៅក្រៅឃុំរបស់លោក ក្នុងខែមិថុនា ឆ្នាំ២០២៣ ។
ថ្ងៃទី១៥ ខែកញ្ញា ឆ្នាំ២០២៣
នាល្ងាចម្សិលមិញនេះ មន្ត្រី និងសមាជិកគណបក្សភ្លើងទៀនចំនួន ៧រូប ត្រូវបានបញ្ជូនទៅឃុំខ្លួនបណ្ដោះអាសន្នរង់ចាំសវនាការ ក្រោយពីត្រូវបានចោទប្រកាន់ពីបទញុះញង់ តាមបញ្ញត្តិមាត្រា៤៩៤ និង/ឬមាត្រា៤៩៥ និងបទឆបោក តាមបញ្ញត្តិមាត្រា ៣៧៧ និង ៣៧៨ នៃក្រមព្រហ្មទណ្ឌនៃព្រះរាជាណាចក្រកម្ពុជា ។ បច្ចុប្បន្ន អ្នកទាំងនោះ កំពុងស្ថិតក្រោមការឃុំខ្លួន នៅក្នុងពន្ធនាគារខេត្តបន្ទាយមានជ័យ ។
សកម្មជនទាំង៧នាក់ ដែលត្រូវបានចោទប្រកាន់ គឺស្ថិតក្នុងចំណោមសមាជិកគណបក្សភ្លើងទៀនចំនួន ២៣នាក់ ដែលត្រូវបានកោះហៅទៅសាកសួរដោយមន្ត្រីនគរបាលក្នុងខេត្តបន្ទាយមានជ័យ ចាប់តាំងពីថ្ងៃសៅរ៍ ទី០៩ ខែកញ្ញានេះ ពាក់ព័ន្ធនឹងការបង្កើតគណបក្សថ្មីមួយ ។ មូលដ្ឋាននៃការចោទប្រកាន់នេះ គឺពុំទាន់មានការបញ្ជាក់ពីអាជ្ញាធរនៅឡើយទេ ។
សកម្មជននយោបាយគណបក្សភ្លើងទៀនទាំង៧នាក់ ដែលត្រូវបានចោទប្រកាន់រួមមាន លោក ស៊ីន វត្ថា ប្រធានគណៈកម្មាធិការប្រតិបត្តិខេត្តបន្ទាយមានជ័យ លោក ឡុង ឡាវី អនុប្រធានគណៈកម្មាធិការប្រតិបត្តិខេត្តបន្ទាយមានជ័យ លោក ទេស សម្បត្តិ វឌ្ឍនោ សមាជិកគណបក្ស លោក ទួត វាសនា ប្រធានគណៈកម្មាធិការប្រតិបត្តិស្រុកមង្គលបុរី លោក ឈុំ ស៊ីណាត អនុប្រធានគណៈកម្មាធិការប្រតិបត្តិស្រុកមង្គលបុរី លោក លោក វ៉ាន់ ស៊ុយអ៊ីវ សមាជិកក្រុមប្រឹក្សាសង្កាត់ និងលោក ហ៊ឹម ឡា អ្នកគាំទ្រគណបក្សភ្លើងទៀន ។ ក្នុងនោះ សកម្មជន៥នាក់ ត្រូវបានចោទប្រកាន់ពីបទញុះញង់ផង និងបទឆបោកផង ខណៈដែលសកម្មជន២នាក់ទៀត គឺលោក វ៉ាន់ ស៊ុយអ៊ីវ និងលោក ហ៊ឹម ឡា ត្រូវបានចោទប្រកាន់ពីបទញុះញង់តែមួយទេ ។
ថ្ងៃទី១៩ ខែមិថុនា ឆ្នាំ២០២៣
នាព្រឹកនេះ តុលាការកំពូលបានតម្ដល់សាលក្រមរបស់ សាលាដំបូងរាជធានីភ្នំពេញ ក្នុងការបដិសេធមិនឱ្យលោក ថាច់ សេដ្ឋា ថ្នាក់ដឹកនាំនៃគណបក្សជំទាស់នៅក្រៅឃុំ ។
លោក សេដ្ឋា អនុប្រធានគណបក្សភ្លើងទៀន ត្រូវបានចោទប្រកាន់ពីបទញុះញង់ឱ្យប្រព្រឹត្តបទឧក្រិដ្ឋ ជាអាទិ៍ និងបទញុះញង់ឱ្យមានការរើសអើង តាមមាត្រា ៤៩៤ មាត្រា៤៩៥ និងមាត្រា៤៩៦ នៃក្រមព្រហ្មទណ្ឌ ក្នុងខែមេសា ឆ្នាំ២០២៣ ពាក់ព័ន្ធនឹងការអត្ថាធិប្បាយរបស់លោកជាមួយពលករខ្មែរនៅក្រៅប្រទេស និងត្រូវបានបង្គាប់ឱ្យស្ថិតក្រោមការឃុំខ្លួនបណ្តោះអាសន្នរង់ចាំសវនាការ ។
ថ្នាក់ដឹកនាំគណបក្សជំទាស់វ័យ ៧០ ឆ្នាំរូបនេះបានប្ដឹងឧទ្ធរណ៍ ដោយអះអាងថាលក្ខខណ្ឌនៃការដាក់រូបលោកឱ្យស្ថិតក្រោមការត្រួតពិនិត្យតាមផ្លូវតុលាការគឺគ្រប់គ្រាន់ហើយ និងបានលើកឡើងថា ស្ថានភាពសុខភាពរបស់លោកមិនអាចទ្រាំទ្រនឹងស្ថានភាពនៅក្នុងពន្ធនាគារនោះទេ ។ ទោះជាយ៉ាងណា សាលាឧទ្ធរណ៍នៅតែបង្គាប់ឱ្យមានការឃុំខ្លួនលោកបណ្ដោះអាសន្ន ក្នុងខែឧសភា ឆ្នាំ២០២៣ ។
ថ្ងៃទី២៥ ខែឧសភា ឆ្នាំ២០២៣
នៅថ្ងៃនេះ ក្រុមប្រឹក្សាធម្មនុញ្ញ បានសម្រេចបដិសេធបណ្តឹងរបស់គណបក្សភ្លើងទៀនដែលស្នើសុំចុះបញ្ជីឈរឈ្មោះបោះឆ្នោតថ្នាក់ជាតិ នៅខែកក្កដា ឆ្នាំ២០២៣ ខាងមុខនេះ ។ នេះគឺជាការសម្រេចបិទផ្លូវតវ៉ា និងជាការដកគណបក្សជំទាស់ធំជាងគេចេញពីការប្រកួតប្រជែងនៃការបោះឆ្នោតថ្នាក់ជាតិ ដោយសារតែមូលហេតុកង្វះឯកសារចុះបញ្ជី ។
សេចក្តីសម្រេចរបស់ក្រុមប្រឹក្សាធម្មនុញ្ញ តម្កល់សេចក្តីសម្រេចរបស់គណៈកម្មាធិការជាតិរៀបចំការបោះឆ្នោត (គជប) កាលពីថ្ងៃទី១៥ ខែឧសភា ដែលបដិសេធការចុះបញ្ជីឈរឈ្មោះបោះឆ្នោតរបស់គណបក្សភ្លើងទៀន សម្រាប់ឆ្នាំនេះ ។ គជប បានអះអាងថាគណបក្សភ្លើងទៀន មិនបានបំពេញគ្រប់នីតិវិធី ដោយមិនបានដាក់លិខិតបញ្ជាក់នីត្យានុកូលកម្មនៃឯកសារច្បាប់ដើមចុះបញ្ជីរបស់គណបក្ស ដែលបញ្ជាក់ដោយរដ្ឋបាលមូលដ្ឋាន ។ ឯកសារនេះ ត្រូវបានគណបក្សភ្លើងទៀនអះអាងថាត្រូវបានអាជ្ញាធររឹបអូសអំឡុងពេលដែលអាជ្ញាធរចុះបិទទីស្នាក់ការគណបក្សសង្គ្រោះជាតិ ក្រោយពេលដែលគណបក្សនេះត្រូវបានតុលាការកំពូលរំលាយកាលពីឆ្នាំ ២០១៧ ។
ការបដិសេធរបស់ គជប បានធ្វើឡើង ទោះជាស្ថាប័ននេះ ធ្លាប់បានអនុញ្ញាតឱ្យគណបក្សភ្លើងទៀនចុះឈ្មោះសម្រាប់ការបោះឆ្នោតថ្នាក់ឃុំសង្កាត់ កាលពីឆ្នាំ២០២២ ក៏ដោយ ។
ថ្ងៃទី៣០ ខែមីនា ឆ្នាំ២០២៣
នាព្រឹកនេះ តុលាការកំពូល បានសម្រេចតម្កល់សាលក្រមសាលាដំបូងរាជធានីភ្នំពេញ និងសាលដីកាសាលាឧទ្ធរណ៍រាជធានីភ្នំពេញ ដែលបានផ្ដន្ទាទោសសមាជិកអតីតគណបក្សសង្គ្រោះជាតិចំនួន ១២រូប និងអតីតមន្ត្រីក្រសួងមហាផ្ទៃម្នាក់ ពីបទញុះញង់ និងបទរួមគំនិតក្បត់ ហើយត្រូវបានកាត់ទោសម្នាក់ៗឱ្យជាប់ពន្ធនាគារ ៥ឆ្នាំ ក្នុងនោះទោស ១៦ខែត្រូវបានព្យួរ ។ តុលាការកំពូលពុំបានផ្ដល់ហេតុផលនៅក្នុងសាលដីកានេះទេ ។
មនុស្សទាំង ១៣នាក់ ត្រូវបានផ្ដន្ទាទោស នៅថ្ងៃទី១៧ ខែមីនា ឆ្នាំ២០២២ ដោយសាលាដំបូងរាជធានីភ្នំពេញ នៅក្នុងសវនាការដ៏ធំមួយ រួមជាមួយអតីតថ្នាក់ដឹកនាំ និងសមាជិកគណបក្សសង្គ្រោះជាតិចំនួន៨រូបទៀត ដែលមិនបានប្ដឹងសារទុក្ខ ។ សាលាឧទ្ធរណ៍រាជធានីភ្នំពេញ បានតម្ដល់ការផ្ដន្ទាទោសជនជាប់ចោទទាំង ១៣នាក់ ក្នុងខែធ្នូ ឆ្នាំ២០២២ ។ អ្នកទាំង១៣ មានដូចជា លោក ឆុន ប៊ុនឆាត លោក ឡុង ផារី លោក ឃុត ច្រឹក លោក ងិន ឃាន លោក យឹម សារ៉េត លោក ឃឹម ភាណា លោក ថៃ សុគន្ធា លោក កែវ ថៃ លោក ញ៉ែម វាន លោក ជុំ ចាន់ លោក សុខ ចន្ថា លោក ពៀត ម៉ាប់ និងលោក ស៊ន់ ធន់ ។
អ្នកទាំង១៣ ត្រូវបានឃុំខ្លួនជាប់មករហូតតាំងពីសវនាការនៅតុលាការជាន់ទាប ដោយពួកគាត់ជាច្រើននាក់ ត្រូវបានឃុំខ្លួន រហូតដល់ ៣ឆ្នាំ ហើយរង់ចាំការប្រកាសសាលដីកាស្ថាពរនៅថ្ងៃនេះ ។ អ្នកទាំងនោះ នៅតែបន្តស្ថិតក្រោមការឃុំខ្លួន នៅមណ្ឌលអប់រំកែប្រែទី៣ ដោយកំពុងអនុវត្តទោសជាប់ពន្ធនាគារ ៣ឆ្នាំ ៨ខែ ។ ការផ្ដន្ទាទោសនេះ នឹងធ្វើឱ្យពួកគាត់ជាប់ពន្ធនាគាររហូតដល់ក្រោយការបោះឆ្នោតថ្នាក់ជាតិនៅខែកក្កដា ឆ្នាំ២០២៣ ខាងមុខនេះ ។
ថ្ងៃទី៣ ខែមីនា ឆ្នាំ២០២៣
នាព្រឹកនេះ សាលាដំបូងរាជធានីភ្នំពេញ បានសម្រេចផ្ដន្ទាទោស ឯកឧត្ដម កឹម សុខា អតីតប្រធានគណបក្សសង្គ្រោះជាតិដែលត្រូវបានរំលាយ (CNRP) ពីបទក្បត់ជាតិ និងបទសន្ទិដ្ឋិភាពជាមួយបរទេស តាមបញ្ញត្តិមាត្រា៤៣៩ និងមាត្រា៤៤៣នៃក្រមព្រហ្មទណ្ឌ ។ ឯកឧត្ដម ត្រូវបានផ្ដន្ទាទោស ២៧ឆ្នាំ ក្នុងពន្ធនាគារ និងភ្លាមៗត្រូវបានបញ្ជូនទៅឃុំខ្លួនក្នុងផ្ទះ ក្រោយពីត្រូវបាននាំចេញពីបន្ទប់សវនាការដោយសន្តិសុខ និងនគរបាល៥នាក់ ។ ការផ្ដន្ទាទោសនេះ ធ្វើឡើងនៅរយៈពេលត្រឹមតែ៥ខែប៉ុណ្ណោះ មុនពេលឈានដល់ការបោះឆ្នោតជាតិឆ្នាំ២០២៣ ឆាប់ៗខាងមុខនេះ ។
តុលាការ ក៏បានបង្គាប់ឱ្យដកសិទ្ធិនយោបាយជាអចិន្រ្តៃយ៍ចំពោះឯកឧត្ដម កឹម សុខា ក្នុងការឈរឈ្មោះ ឬចូលរួមបោះឆ្នោត ដែលជាទណ្ឌកម្មបន្ថែម តាមបញ្ញត្តិមាត្រា ៤៥០ នៃក្រមព្រហ្មទណ្ឌ ។ សាលក្រម បានរៀបរាប់ថា ទំហំគ្រោះថ្នាក់ គឺពុំទាន់ត្រូវបានវាយតម្លៃនៅឡើយ ដែលទំនងជាពាក់ព័ន្ធនឹងវិធានការរដ្ឋប្បវេណី ដែលអាចនឹងត្រូវបានប្ដឹង ស្របតាមមាត្រា២២នៃក្រមនីតិវិធីព្រហ្មទណ្ឌ ។
ថ្ងៃទី២៣ ខែកុម្ភៈ ឆ្នាំ២០២៣
នាព្រឹកនេះ តុលាការកំពូលបានសម្រេចតំកល់សេចក្តីសម្រេចផ្តន្ទាទោសអនុប្រធានគណបក្សភ្លើងទៀន លោក សុន ឆ័យ ពីបទបរិហាកេរ្តិ៍ជាសាធារណៈ ពាក់ព័ន្ធនឹងបណ្តឹងចំនួនពីរ ដែលមួយត្រូវបានប្តឹងដោយគណបក្សប្រជាជនកម្ពុជា និងមួយទៀតដោយគណកម្មាធិការជាតិរៀបចំការបោះឆ្នោត អំពីការណ៍ដែលលោករិះគន់ជាសាធារណៈទៅលើដំណើរការនៃការបោះឆ្នោតជ្រើសរើសក្រុមប្រឹក្សាឃុំសង្កាត់ ។
លោក សុន ឆ័យ ត្រូវបានតុលាការបង្គាប់ឱ្យសងជំងឺចិត្តជាប្រាក់ចំនួន ៤ ពាន់លានរៀល (ប្រហែល១លានដុល្លារអាមេរិក) ទៅគណបក្សប្រជាជនកម្ពុជា និងរងពិន័យពីរផ្សេងទៀតដែលសរុបចំនួន ២០ លានរៀល (ប្រហែល ៥.០០០ ដុល្លារ) ដូចនឹងសេចក្តីសម្រេចរបស់សាលាឧទ្ធរណ៍កាលពីខែធ្នូ ឆ្នាំ២០២២ ។ អចលនទ្រព្យចំនួនពីរកន្លែងរបស់លោក ត្រូវបានសាលាដំបូងរាជធានីភ្នំពេញដីការក្សាការពារ (បង្កកទុក) ចាប់តាំងពីខែវិច្ឆិកា ដើម្បីរារាំងលោកពីការលក់ ឬផ្ទេរកម្មសិទិ្ធទៅអ្នកដទៃ តាមរយៈសំណើរបស់គណបក្សប្រជាជនកម្ពុជា ។
ថ្ងៃទី១៣ ខែកុម្ភៈ ឆ្នាំ២០២៣
យើងខ្ញុំ ជាស្ថាប័នសារព័ត៌មាន និងអង្គការសង្គមស៊ីវិល ដែលមានរាយនាមដូចខាងក្រោម សូមសម្ដែងការសោកស្ដាយយ៉ាងខ្លាំង ចំពោះការសម្រេចរបស់សម្ដេចនាយករដ្ឋមន្ត្រី ហ៊ុន សែន ក្នុងការលុបចោលអាជ្ញាប័ណ្ណសារព័ត៌មានវីអូឌី ដែលជាសារព័ត៌មានឯករាជ្យចុងក្រោយមួយនៅក្នុងប្រទេសកម្ពុជា ។ យើងខ្ញុំ ក៏សូមថ្កោលទោសផងដែរ ចំពោះការបៀតបៀនផ្លូវភេទ និងការគំរាមកំហែងថ្មីៗនេះ ទៅលើស្ត្រីអ្នកសារព័ត៌មានវីអូឌីម្នាក់ ។
ការបិទសារព័ត៌មានវីអូឌី និងការប្រើភាសាបៀតបៀនផ្លូវភេទទៅលើស្រ្តីអ្នកសារព័ត៌មានវីអូឌី បានធ្វើឱ្យបាត់បង់ទំនុកចិត្តទៅលើការអះអាងរបស់រាជរដ្ឋាភិបាលខ្លួនឯង ពាក់ព័ន្ធនឹងការគោរពសិទ្ធិសេរីភាពសារព័ត៌មាននៅកម្ពុជា និងហាក់ដូចជាកំពុងឆ្លុះបញ្ចាំងពីការខកខានក្នុងការគោរពច្បាប់ស្ដីពីរបបសារព័ត៌មាន ដែលបានបង្កើតឡើងក្នុងឆ្នាំ១៩៩៥ ។ ការសម្រេចចិត្តលុបចោលអាជ្ញាប័ណ្ណផ្សាយព័ត៌មានរបស់វីអូឌី នៅមុនការបោះឆ្នោតថ្នាក់ជាតិឆ្នាំ២០២៣នេះ បង្ហាញពីរលកថ្មីមួយនៃមធ្យោបាយគំរាមកំហែងប្រឆាំងនឹងសារព័ត៌មានឯករាជ្យដែលកំពុងមានតិចស្រាប់ ដែលស្រដៀងគ្នាទៅនឹងការបិទកាសែតខេមបូឌា ដេលី ក្នុងឆ្នាំ២០១៧ និងការលក់កាសែតភ្នំពេញប៉ុស្ដិ៍ ក្នុងឆ្នាំ២០១៨ ។
ថ្ងៃទី១៣ ខែកុម្ភៈ ឆ្នាំ២០២៣
នាព្រឹកនេះ រាជរដ្ឋាភិបាល បានសម្រេចដកហូតអាជ្ញាប័ណ្ណផ្សាយព័ត៌មានរបស់មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយព័ត៌មានឯករាជ្យ (CCIM) ជាស្ថាប័នគ្រប់គ្រងទៅលើសារព័ត៌មានដែលផ្សាយជាពីរភាសាគឺ វីអូឌី (VOD) ដែលជាសារព័ត៌មានឯករាជ្យចុងក្រោយមួយដែលនៅសេសសល់ ។
ក្រសួងព័ត៌មាន បានដកហូតអាជ្ញាប័ណ្ណវីអូឌី ក្រោយពីសម្ដេចនាយករដ្ឋមន្ត្រី ហ៊ុន សែន និងកូនប្រុសរបស់សម្ដេច ដែលជាមេបញ្ជាការកងទ័ពជើងគោក បានចោទជាបញ្ហាចំពោះអត្ថបទរបស់វីអូឌីដែលបានចេញផ្សាយកាលពីថ្ងៃទី០៩ ខែកុម្ភៈ ដោយបង្ហាញពីប្រតិកម្មមួយចំនួន ពីមនុស្សផ្សេងៗគ្នា ។ នេះរួមមាន ការអត្ថាធិប្បាយរបស់អ្នកនាំពាក្យរាជរដ្ឋាភិបាល ឯកឧត្តម ផៃ ស៊ីផាន ផងដែរ ពាក់ព័ន្ធនឹងការអះអាងថា ឯកឧត្ដម ហ៊ុន ម៉ាណែត បានចុះហត្ថលេខាលើកិច្ចព្រមព្រៀងមួយ ដើម្បីផ្ដល់ជំនួយហិរញ្ញវត្ថុ ទៅកាន់ប្រទេសតួគី ។ ទាំងឯកឧត្ដម ហ៊ុន ម៉ាណែត និងសម្ដេចនាយករដ្ឋមន្ត្រី ក្រោយមកបានបង្ហោះនៅលើបណ្ដាញសង្គម ដើម្បីបដិសេធទៅលើរឿងដែលថា ឯកឧត្ដម ហ៊ុន ម៉ាណែត បានចុះហត្ថលេខាលើឯកសារនោះ ។
ថ្ងៃទី២២ ខែធ្នូ ឆ្នាំ២០២២
នាព្រឹកនេះ សាលាដំបូងរាជធានីភ្នំពេញ បានសម្រេចផ្ដន្ទាទោសអតីតថ្នាក់ដឹកនាំ សមាជិក និងអ្នកគាំទ្រគណបក្សសង្គ្រោះជាតិដែលត្រូវបានរំលាយ ពីបទរួមគំនិតក្បត់ តាមបញ្ញត្តិមាត្រា ៤៥៣ នៃក្រមព្រហ្មទណ្ឌ ។ អតីតសកម្មជនគណបក្សជំទាស់ទាំងនេះ ត្រូវបានកាត់ទោសម្នាក់ៗឱ្យជាប់ពន្ធនាគារ ចន្លោះពី ៥ឆ្នាំ ដល់ ៧ឆ្នាំ ហើយសកម្មជនតែ៣នាក់ប៉ុណ្ណោះដែលបានទទួលការព្យួរទោស ។ សកម្មជនចំនួន ១១នាក់ ត្រូវបានព្យួរសិទ្ធិធ្វើនយោបាយរយៈពេល ៥ឆ្នាំ ។
សកម្មជននយោបាយទាំងនេះ ត្រូវបានផ្ដន្ទាទោសដោយផ្អែកលើការបង្ហោះសារនៅលើហ្វេសប៊ុក និងការថតសំឡេងសន្ទនាតាមទូរសព្ទជាលក្ខណៈឯកជន ពាក់ព័ន្ធនឹងការព្យាយាមធ្វើមាតុភូមិនិវត្តន៍មកប្រទេសកម្ពុជាវិញ របស់អ្នកស្រី មូរ សុខហួរ និងអតីតថ្នាក់ដឹកនាំគណបក្សសង្គ្រោះជាតិផ្សេងទៀត កាលពីខែមករា ឆ្នាំ២០២១ ដើម្បីចូលរួមតតាំងក្នុងសវនាការដ៏ធំមួយទៀត ។ អ្នកស្រី សុខហួរ ត្រូវបានបដិសេធមិនឱ្យឡើងយន្តហោះ ដោយសារអាជ្ញាធរកម្ពុជា បានលុបចោលលិខិតឆ្លងដែនរបស់អ្នកស្រី ព្រមទាំងបានបដិសេធក្នុងការផ្ដល់ទិដ្ឋាការឱ្យអ្នកស្រីនៅក្នុងប្រទេសកំណើតរបស់ខ្លួន ។
ថ្ងៃទី៧ ខែតុលា ឆ្នាំ២០២២
នារសៀលនេះ លោក ស៊ុន ឆៃ អនុប្រធានគណបក្សភ្លើងទៀន ដែលជាគណបក្សជំទាស់ ត្រូវបានផ្ដន្ទាទោសពីចំនួនពីរករណីនៃបទបរិហារកេរ្តិ៍ ដោយសាលាដំបូងរាជធានីភ្នំពេញ ក្រោយពីលោកបានរិះគន់ជាសាធារណៈទៅលើការបោះឆ្នោតឃុំ-សង្កាត់ កាលពីខែមិថុនា ឆ្នាំ២០២២ ។ លោក ត្រូវបានបង្គាប់ឱ្យបង់សំណងជំងឺចិត្តទៅកាន់គណបក្សកាន់អំណាចគឺ គណបក្សប្រជាជនកម្ពុជា ចំនួន បីពាន់ លានរៀល (ប្រមាណជា ៧៥ម៉ឺន ដុល្លារ) ព្រមទាំងពិន័យជាប្រាក់ទាំងពីរករណីសរុបចំនួន ១៧ លានរៀល (ប្រមាណជា ៤.២៥០ ដុល្លារ) ។
គណបក្សប្រជាជនកម្ពុជា និង គជប បានដាក់ពាក្យបណ្ដឹងផ្សេងគ្នា ប្រឆាំងនឹងលោក ស៊ុន ឆៃ កាលពីខែមិថុនា ឆ្នាំ២០២២ ដោយបានចោទប្រកាន់ថា លោកបានធ្វើឱ្យប៉ះពាល់កិត្តិយសរបស់ខ្លួន ក្រោយពីលោកបានអត្ថាធិប្បាយអំពីយុត្តិធម៌នៃលទ្ធផលបោះឆ្នោត នៅក្នុងបទសម្ភាសន៍តាមប្រព័ន្ធផ្សព្វផ្សាយមួយ ។ លោក ស៊ុន ឆៃ បានអះអាងថា គជប ត្រូវបានគ្រប់គ្រងដោយគណបក្សនយោបាយមួយ ហើយថា មានភាពមិនប្រក្រតីនៅមុនពេល និងអំឡុងពេលការបោះឆ្នោតរួមមាន ការបំភ័យ មានការទិញ មានការលួច ។
នៅក្នុងខែសីហា ឆ្នាំ២០២២ លោក ស៊ុន ឆៃ ត្រូវបានចោទប្រកាន់ពីបទបរិហារកេរ្តិ៍ តាមបញ្ញត្តិមាត្រា៣០៥នៃក្រមព្រហ្មទណ្ឌ ដោយផ្អែកលើបណ្ដឺងទាំងពីរ ។ តាមរយៈសវនាការដាច់ដោយឡែកទាំងពីរ សាលាដំបូងរាជធានីភ្នំពេញ បានប្រកាសសេចក្ដីសម្រេចផ្ដន្ទាទោសពាក់ព័ន្ធនឹងបណ្ដឹងទាំងពីរ នារសៀលនេះ ។ លោក ស៊ុន ឆៃ ត្រូវបានពិន័យជាប្រាក់ចំនួន ៨លានរៀល (ប្រមាណ ពីរពាន់ដុល្លារ) ក្នុងបណ្ដឹងរបស់គណបក្សប្រជាជនកម្ពុជា និង៩លានរៀលទៀត (២.២៥០ដុល្លារ) ក្នុងបណ្ដឹងរបស់គជប ។ ចៅក្រម ក៏បានប្រកាសពីទោសបន្ថែម តាមបញ្ញត្តិមាត្រា ៣១០ នៃក្រមព្រហ្មទណ្ឌ រួមមាន ការបិទផ្សាយនៃសេចក្ដីសម្រេចផ្ដន្ទាទោសជាសាធារណៈនៅគេហដ្ឋានលោកស៊ុន ឆៃ នៅការិយាល័យឃុំ-សង្កាត់តាមមូលដ្ឋានរបស់លោក នៅសាលាដំបូងរាជធានីភ្នំពេញ និងនៅគ្រប់មណ្ឌលបោះឆ្នោតនៅក្នុងរាជធានីភ្នំពេញ ក្នុងរយៈពេល២ខែ និងចេញផ្សាយតាមប្រព័ន្ធផ្សព្វផ្សាយ រយៈពេល៨ថ្ងៃ ។
ថ្ងៃទី២១ ខែមិថុនា ឆ្នាំ២០២២
លោក ញឹម សារ៉ុម មេឃុំជាប់ឆ្នោតថ្មីៗ មកពីគណបក្សភ្លើងទៀន ត្រូវបានចាប់ខ្លួន នារសៀលនេះ និងឃាត់ខ្លួននៅខេត្តកំពង់ធំ ពាក់ព័ន្ធនឹងការចោទប្រកាន់ពីអំពើប្លន់ កាលពីឆ្នាំ២០០២ ។ លោកគឺជាមេឃុំម្នាក់ក្នុងចំណោមមេឃុំ៤នាក់នៃគណបក្សជំទាស់នៅទូទាំងប្រទេស ដែលបានជាប់ឆ្នោតក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់ កាលពីដើមខែនេះ ។
លោក សារ៉ុម ត្រូវបានសង្ស័យក្នុងការប្រព្រឹត្តអំពើប្លន់ក្នុងឆ្នាំ២០០២ និងត្រូវបានចោទប្រកាន់៥ឆ្នាំក្រោយក្នុងឆ្នាំ២០០៧ តាមបញ្ញត្តិមាត្រា៦នៃច្បាប់ស្ដីពីស្ថានទម្ងន់ទោសនៃបទឧក្រិដ្ឋ ។ បន្ទាប់មក ក៏មានការចេញដីកាចាប់ខ្លួនលោកក្នុងឆ្នាំ២០១២ ។ លោក សារ៉ុម និងជនសង្ស័យបីរូបទៀត ត្រូវបានតុលាការផ្តន្ទាទោសដោយកំបាំងមុខ កាលពីឆ្នាំ ២០១៤ ដោយសម្រេចឱ្យជាប់ពន្ធនាគារចំនួន ៥ឆ្នាំ ក្រោមការចោទប្រកាន់ថាអ្នកទាំងបួន បានលួចម៉ាស៊ីនភ្លើងមួយគ្រឿង ។ ក្នុងករណីនេះ ភាគីដើមបណ្តឹង បានដកពាក្យបណ្តឹងតាំងពីមុនពេលមានការផ្តន្ទាទោស ។
នៅដើមខែនេះ លោក សារ៉ុម បានជាប់ឆ្នោត ក្លាយជាមេឃុំចំណាលើ ក្នុងស្រុកស្ទោង ខេត្តកំពង់ធំ និងត្រូវបានកំណត់ឱ្យចូលកាន់តំណែង បើតាមការប្រកាសលទ្ធផលបោះឆ្នោតជាផ្លូវការ នៅថ្ងៃទី២៦ ខែមិថុនា ខាងមុខនេះ ។ លោក ធ្លាប់ជាជំទប់ទី១នៃឃុំចំណាលើក្នុងឆ្នាំ២០១៧ មកពីគណបក្សសង្គ្រោះជាតិ មុនពេលគណបក្សនេះត្រូវបានរំលាយ ប៉ុន្តែក្រោយមក អាសនៈរបស់លោក ត្រូវបានដកឱ្យទៅគណបក្សប្រជាជនកម្ពុជា ។
ថ្ងៃទី៣ ខែមិថុនា ឆ្នាំ២០២២
ការបោះឆ្នោតជ្រើសរើសក្រុមប្រឹក្សាឃុំ-សង្កាត់ឆ្នាំ២០២២ នៅថ្ងៃទី០៥ ខែមិថុនា ត្រូវបានធ្វើឡើង ដើម្បីជ្រើសរើសក្រុមប្រឹក្សាឃុំ-សង្កាត់នៅទូទាំងប្រទេសសរុបទាំងអស់ចំនួន ១.៦៥២ ។ ការបោះឆ្នោតកំពុងធ្វើឡើង ខណៈដែលមានការធ្វើទុក្ខបុកម្នេញជាច្រើនឆ្នាំមកហើយ ទៅលើសេរីភាពនយោបាយ និងសង្គមស៊ីវិល ។ សូមតាមដាន ព័ត៌មាន និងព្រឹត្តិការណ៍សិទ្ធិមនុស្សសំខាន់ៗ ដែលកើតមានឡើង នៅទីនេះ ។