ចុងក្រោយ
សេចក្តីថ្លែងការណ៍ | ការមានគំនិតរួមគ្នា និងការប្តេជ្ញាចិត្តខ្ពស់ របស់ភាគីទាំងពីរ ឆ្ពោះទៅកាន់ជំហានបន្ទាប់នៃដំណើរការដោះស្រាយបណ្តឹង របស់ស្ថាប័នទទួលពាក្យបណ្តឹងថ្នាក់ជាតិនៃប្រទេសហូឡង់ ពាក់ព័ន្ធនឹងបញ្ហាបំណុលមីក្រូហិរញ្ញវត្ថុនៅកម្ពុជា
ថ្ងៃទី១៩ ខែមីនា ឆ្នាំ២០២៤
ចាប់ពីថ្ងៃទី១៣ ដល់ថ្ងៃទី១៥ ខែមីនា ឆ្នាំ២០២៤ អ្នកតំណាងមកពីក្រុមហ៊ុន Ecumenical Development Cooperative Society U.A. ឬ Oikocredit ដែលជាអ្នកវិនិយោគឱ្យមានភាពប្រសើរឡើងក្នុងសង្គម និងអ្នកតំណាងមកពីអង្គការសិទិ្ធមនុស្សចំនួនបី ដែលរួមមានសម្ព័ន្ធខ្មែរជំរឿន និងការពារសិទិ្ធមនុស្ស លីកាដូ អង្គការសមធម៌កម្ពុជា និងអង្គការ FIAN អាឡឺម៉ង់ បានមកជួប ដើម្បីសន្ទនាគ្នា ។ ការកិច្ចសន្ទនាគ្នានេះ គឺជាផ្នែកមួយនៃដំណើរការដោះស្រាយបណ្តឹង របស់ស្ថាប័នទទួលពាក្យបណ្តឹងថ្នាក់ជាតិនៃប្រទេសហូឡង់ (NCP) សម្រាប់ការធ្វើធុរកិច្ចប្រកបដោយការទទួលខុសត្រូវ ដែលបណ្តឹងនេះត្រូវបានដាក់ដោយអង្គការសិទិ្ធមនុស្សទាំងបីខាងលើ ពាក់ព័ន្ធនឹងផលប៉ះពាល់ដែលសាធារណជនអះអាងថាមានភាពអវិជ្ជមានទៅលើអ្នកខ្ចីប្រាក់ជាច្រើននាក់ ។ ផលប៉ះពាល់អវិជ្ជមានទាំងនេះ គឺបង្កឡើងដោយកម្ចីខ្នាតតូច ឬមីក្រូហិរញ្ញវត្ថុមួយចំនួននៅក្នុងប្រទេសកម្ពុជា ។
អំឡុងពេលជួបជជែកគ្នានេះ ភាគីទាំងអស់បានរកឃើញនូវគំនិតរួមគ្នា និងបានបង្ហាញនូវការប្តេជ្ញាចិត្តខ្ពស់ ក្នុងការធ្វើឱ្យប្រសើរឡើងនូវជីវភាពរបស់ប្រជាពលរដ្ឋកម្ពុជាដែលបានខ្ចីប្រាក់ ។ អំឡុងពេលជួបគ្នានោះដែរ ភាគីទាំងពីរក៏បានទទួលស្គាល់ថា មានបញ្ហាជាច្រើនដែលត្រូវដោះស្រាយជាបន្ទាន់នៅក្នុងវិស័យមីក្រូហិរញ្ញវត្ថុនៅកម្ពុជា ។ ភាគីទាំងពីរក៏បានរកឃើញ និងធ្វើការប្តេជ្ញាចិត្ត បន្តទៅជំហានបន្ទាប់ ដើម្បីឆ្ពោះទៅរកលទ្ធផលជាវិជ្ជមាននៃកិច្ចសន្ទនានេះ ។
ស្ថាប័នទទួលពាក្យបណ្តឹងថ្នាក់ជាតិនៃប្រទេសហូឡង់ (NCP) សូមសសើរដល់ភាគីទាំងពីរ ដែលបានចូលរួមប្រកបដោយសុចរិតភាពនៅក្នុងដំណើរការដោះស្រាយបណ្តឹងនេះ ៕