ឃាតកម្ម កែម ឡី
កម្រងរូបភាព | អស់រយៈពេល៧ឆ្នាំ ការអំពាវនាវឱ្យមានយុត្តិធម៌ទៅលើឃាតកម្មលោកបណ្ឌិត កែម ឡី នៅតែបន្ត
ថ្ងៃទី១០ ខែកក្កដា ឆ្នាំ២០២៣
នាថ្ងៃនេះ ប្រជាពលរដ្ឋ តំណាងគណបក្សនយោបាយ និងក្រុមសង្គមស៊ីវិល រួមមានបុគ្គលិកអង្គការមិនមែនរដ្ឋាភិបាល និងសកម្មជនជាច្រើននាក់ បានជួបជុំគ្នាដើម្បីប្រារព្ធខួប៧ឆ្នាំនៃឃាតកម្មលើលោកបណ្ឌិត កែម ឡី ។ ពួកគេនៅតែបន្តអំពាវនាវឱ្យមានការស៊ើបអង្កេតឱ្យបានហ្មត់ចត់ និងឥតលម្អៀង ទៅលើការមរណភាពរបស់លោកបណ្ឌិត ដើម្បីបង្ហាញការពិត និងផ្ដល់យុត្តិធម៌សម្រាប់រូបលោក ក៏ដូចជាក្រុមគ្រួសាររបស់លោក ។
កម្រងរូបភាព | ការទាមទាររកយុត្តិធម៌ នៅថ្ងៃរំឭកខួប៦ឆ្នាំ នៃឃាតកម្មលើលោកបណ្ឌិត កែម ឡី
ថ្ងៃទី១០ ខែកក្កដា ឆ្នាំ២០២២
ក្រុមសង្គមស៊ីវិល និងគណបក្សនយោបាយមួយ បានប្រមូលផ្ដុំគ្នានៅក្នុងព្រឹត្តិការណ៍ជាច្រើន ដើម្បីអំពាវនាវរកយុត្តិធម៌សម្រាប់លោកបណ្ឌិត កែម ឡី និងគ្រួសាររបស់លោក នៅប៉ុន្មានថ្ងៃចុងក្រោយនេះ ។ ព្រឹត្តិការណ៍ និងការប្រារព្ធពិធី ត្រូវបានធ្វើឡើងនៅក្នុងរាជធានីភ្នំពេញ និងខេត្តតាកែវ ដែលជាភូមិកំណើតរបស់លោកបណ្ឌិត កែម ឡី ដើម្បីរំឭកខួប៦ឆ្នាំនៃឃាតកម្មលើអ្នកវិភាគនយោបាយរូបនេះ ។
សហជីព យុវជនសកម្មជន និងមន្ត្រីសង្គមស៊ីវិលប្រមាណជា ៧០នាក់ បានប្រមូលផ្ដុំគ្នានាព្រឹកនេះ នៅខាងក្រៅស្ដាម៉ាតនៃស្ថានីយប្រេងឥន្ធនៈកាល់តិចស្តុបបូកគោ នៅក្នុងរាជធានីភ្នំពេញ ជាកន្លែងដែលលោកបណ្ឌិត កែម ឡី ត្រូវបានបាញ់សម្លាប់ អំឡុងពេលពិសារកាហ្វេ កាលពីព្រឹកថ្ងៃទី១០ ខែកក្កដា ឆ្នាំ២០១៦ ។ អ្នកចូលរួមបានដាក់កម្រងផ្កា និងបានរៀបចំពិធីសូត្រមន្តតាមបែបព្រះពុទ្ធសាសនា ។ ស្ដាម៉ាតនៅទីនោះ ត្រូវបានបិទ ខណៈដែលអ្នកធ្វើបុណ្យរំឭកខួប បានចាប់ផ្ដើមជួបជុំគ្នា ហើយមន្ត្រីសន្តិសុខស្លៀកពាក់ស៊ីវិលប្រមាណ ២០នាក់ ក៏បានមកតាមដានព្រឹត្តិការណ៍នេះផងដែរ ។
ក្រុមសង្គមស៊ីវិល បន្តអំពាវនាវឱ្យបង្កើតគណៈកម្មការស៊ើបអង្កេត ដើម្បីធ្វើការស៊ើបអង្កេតដោយឯករាជ្យ ឥតលំអៀង និងប្រកបដោយប្រសិទ្ធភាព ជុំវិញការស្លាប់របស់លោកបណ្ឌិត កែម ឡី ។ ការស៊ើបអង្កេតកន្លងមកទៅលើអំពើឃាតកម្មនេះ ត្រូវបានចាត់ទុកថា មិនគ្រប់គ្រាន់ និងមិនទាន់បានវែកញែកអ្នកនៅពីក្រោយអំពើបាញ់ប្រហារ ដែលអាចនឹងត្រូវយកមកផ្ដន្តាទោសសម្រាប់អំពើឃាតកម្មនេះ ៕
សេចក្តីថ្លែងការណ៍ | ប្រទេសកម្ពុជា៖ មិនទាន់មានយុត្តិធម៌ទេក្នុងខួបគម្រប់៥ឆ្នាំ នៃឃាតកម្មលើលោកបណ្ឌិត កែម ឡី
ថ្ងៃទី៩ ខែកក្កដា ឆ្នាំ២០២១
ថ្ងៃនេះមុនខួប ៥ ឆ្នាំនៃឃាតកម្មលើ លោកបណ្ឌិត កែម ឡី ដែលជាអ្នកអត្ថាធិប្បាយបញ្ហាសង្គមដ៏លេចធ្លោ និងអ្នកការពារសិទ្ធិមនុស្ស អង្គការមិនមែនរដ្ឋាភិបាលចំនួន ៤៥ ដែលមានរាយនាមដូចខាងក្រោម សូមអំពាវនាវជាថ្មីដល់អាជ្ញាធរកម្ពុជាក្នុងការបង្កើតគណៈកម្មការឯករាជ្យមួយដើម្បីធ្វើការស៊ើបអង្កេតដោយឯករាជ្យ មិនលម្អៀង និងប្រកបដោយប្រសិទ្ធភាព ចំពោះឃាតកម្មលើលោកបណ្ឌិត កែម ឡី ។ រហូតមកដល់ពេលនេះ រាជរដ្ឋាភិបាលកម្ពុជានៅតែខកខានក្នុងការស្វែងរកយុត្តិធម៌ជូន លោកបណ្ឌិត កែម ឡី និងក្រុមគ្រួសាររបស់គាត់ ។
កម្រងរូបភាព | អាជ្ញាធររារាំងក្រុមយុវជន ព្រះសង្ឃ និងអ្នកគាំទ្រ មិនឱ្យរៀបចំពិធីបុណ្យរំលឹកខួប ៤ឆ្នាំនៃឃាតកម្មលោកបណ្ឌិត កែម ឡី
ថ្ងៃទី១០ ខែកក្កដា ឆ្នាំ២០២០
អស់រយៈពេល ៤ឆ្នាំមកហើយ ក្រោយពេលដែលអ្នកវិភាគនយោបាយ និងសង្គម លោកបណ្ឌិត កែម ឡី ត្រូវបានខ្មាន់កាំភ្លើងបាញ់សម្លាប់ នៅខណៈដែលលោកកំពុងទទួលទានកាហ្វេនៅព្រឹកមួយដូចសព្វដង នៅហាងកាហ្វេ ស្តារម៉ាត របស់ស្ថានីយប្រេងឥន្ធនៈ កាល់តិច ស្តុបបូកគោ ។ នៅថ្ងៃនេះ ហាងកាហ្វេ ស្តារម៉ាត ត្រូវបានបិទទ្វារ និងរឹតបណ្តឹងដោយកងសន្តិសុខជាច្រើននាក់ ។ ប៉ុន្តែទោះបីជាមានការរឹតត្បឹតមិនឱ្យមានការរំលឹកខួប ៤ឆ្នាំ នៅក្នុងហាងកាហ្វេក៏ដោយ ក៏អតីតមិត្តភក្តិនិងក្រុមការងាររបស់លោក និងអ្នកការពារសិទិ្ធមនុស្ស បានប្រមូលផ្តុំគ្នានៅក្នុងរាជធានីភ្នំពេញ និងខេត្តតាកែវ ពីរបីថ្ងៃមុនពេលថ្ងៃខួប ៤ឆ្នាំ ដើម្បីឧទ្ទិសកុសលជូនលោកបណ្ឌិត ។
កាលពីថ្ងៃពុធ ទី៨ ខែកក្កដា កងកម្លាំងសន្ដិសុខបានស្រាក់ដៃគ្នា ដើម្បីរារាំងព្រសង្ឃ និងសកម្មជនវ័យក្មេង មិនឱ្យប្រារព្ធពិធីបួងសួងឧទ្ទិសកុសលដោយសន្ដិវិធី នៅទីតាំងដែលលោកបណ្ឌិត កែម ឡី ត្រូវបានបាញ់សម្លាប់ ។ យុវជនវ័យក្មេងម្នាក់ ដែលពាក់អាវរូបលោកបណ្ឌិត កែម ឡី ត្រូវបានឃាត់ខ្លួនភ្លាមៗ ព្រមទាំងឱ្យធ្វើកិច្ចសន្យាដោយនគរបាលខណ្ឌ ។
នៅថ្ងៃបន្ទាប់ កងនគរបាលប្រដាប់ដោយកាំភ្លើងជាច្រើននាក់បានរាំងខ្ទប់ ក្រុមសកម្មជនយុវជន មិនឱ្យធ្វើដំណើរទៅកាន់ផ្ទះគ្រួសារលោកបណ្ឌិត កែម ឡី នៅខេត្តតាកែវ ។ នៅថ្ងៃនេះដែរ កងនគរបាល និងមន្ត្រីអាវុធហត្ថជាច្រើន ត្រូវបានដាក់ពង្រាយ ដើម្បីរារាំងក្បួនដង្ហែរបស់ព្រះសង្ឃ សកម្មជន និងអ្នកគាំទ្ររបស់អ្នកវិភាគដែលត្រូវបានបាញ់សម្លាប់រូបនេះ មិនឱ្យដង្ហែក្បួនដោយសន្ដិវិធី នៅលើផ្លូវដដែលនោះទេ ។ ទោះបីជាយ៉ាងណាក៏ដោយ ក៏ពួកគាត់នៅតែបន្តដំណើរដោយថ្មើរជើង ។
ក្រុមអ្នកធ្វើការងារសិទ្ធិមនុស្សនៅតែបន្តស្នើសុំដោយទទូចឱ្យអាជ្ញាធរ បង្កើតគណៈកម្មការស៊ើបអង្កេតឯករាជ្យមួយ ដើម្បីធ្វើការស៊ើបអង្កេតឱ្យបានពេញលេញទៅលើឃាតកម្មលោកបណ្ឌិត កែម ឡី ក៏ដូចជាបញ្ឈប់ការគំរាមកំហែង និងការធ្វើទុក្ខបុកម្នេញទាំងអស់ទៅលើប្រជាពលរដ្ឋដែលធ្វើបុណ្យរំលឹកខួបនៃឃាតកម្មរបស់លោកបណ្ឌិតដោយសន្ដិវិធី ៕
សេចក្តីថ្លែងការណ៍ | រយៈពេល៤ឆ្នាំកន្លងទៅហើយ ពុំទាន់មានការស៊ើបអង្កេតដោយប្រសិទ្ធភាពក្នុងករណីឃាតកម្មលើលោកបណ្ឌិត កែម ឡី
ថ្ងៃទី៩ ខែកក្កដា ឆ្នាំ២០២០
នៅមុនថ្ងៃគម្រប់ខួប ៤ ឆ្នាំ នៃឃាតកម្មលើលោកបណ្ឌិត កែម ឡី អ្នកវិភាគនយោបាយ និងអ្នកការពារសិទ្ធិមនុស្សដែលមានកិត្តិនាមនេះ យើងខ្ញុំជាអង្គការសង្គមស៊ីវិលចំនួន ៣០ ដែលមានរាយនាមខាងក្រោម សូមអំពាវនាវឱ្យអាជ្ញាធរកម្ពុជាបង្កើតគណៈកម្មការស៊ើបអង្កេតដោយឯករាជ្យ និងឥតលម្អៀងមួយដើម្បីស៊ើបអង្កេតដោយប្រសិទ្ធភាព និងអាចជឿទុកចិត្តបាន នៅក្នុងករណីឃាតកម្មលើលោកបណ្ឌិត កែម ឡី ដែលអូសបន្លាយពេលយូរទៅហើយ ។ យើងខ្ញុំក៏ស្នើដល់អាជ្ញាធរសូមបញ្ឈប់ការធ្វើទុក្ខបុកម្នេញ និងការយាយីទៅលើបុគ្គលនានាដែលគោរពវិញ្ញាណក្ខន្ធរបស់លោកដោយសន្តិវិធី ។
នៅថ្ងៃទី១០ ខែកក្កដា ឆ្នាំ២០១៦ លោកបណ្ឌិត កែម ឡី ត្រូវបានខ្មាន់កាំភ្លើងបាញ់សម្លាប់ខណៈលោកកំពុងចូលរួមពិសារកាហ្វេក្នុងស្ថានីយប្រេងឥន្ធនៈមួយនៅកណ្តាលរាជធានីភ្នំពេញ ។ ដោយពុំមានធ្វើការស៊ើបអង្កេតជាបន្ទាន់ ហ្មត់ចត់និងដោយឯករាជ្យ អាជ្ញាធរបានចាប់ខ្លួនបុរសម្នាក់ឈ្មោះ អឿត អាង ដែលបង្ហាញឈ្មោះខ្លួនឯងថា “ជួបសម្លាប់” និង “សារភាព” ថា ខ្លួនជាអ្នកសម្លាប់លោកបណ្ឌិត កែម ឡី ។ បន្ទាប់ពីការជំនុំជម្រះក្តីរយៈពេលកន្លះថ្ងៃនៅថ្ងៃទី២៣ ខែមីនា ឆ្នាំ២០១៧ ជាការជំនុំជម្រះដែលរងការរិះគន់យ៉ាងច្រើនដោយសារពុំស្របជាមួយបទដ្ឋានជំនុំជម្រះដោយយុត្តិធម៌អន្តរជាតិនោះ តុលាការបានរកឃើញថាលោក អឿត អាង មានពិរុទ្ធភាពពីបទឃាតកម្ម និងបានផ្តន្ទាទោសគាត់ដាក់ពន្ធនាគារអស់មួយជីវិត ។ នៅថ្ងៃទី២៤ ខែឧសភា ឆ្នាំ២០១៩ តុលាការកំពូលបានតម្កល់សាលក្រមកាត់ទោសនេះ ។
អត្ថបទខ្លីៗ | យុវជនសកម្មជន ត្រូវបានឃាត់ខ្លួន ខណៈដែលអាជ្ញាធររារាំងព្រះសង្ឃសូត្រធម៌ឧទ្ទិសដល់បណ្ឌិត កែម ឡី
ថ្ងៃទី៨ ខែកក្កដា ឆ្នាំ២០២០
យុវជនជាសកម្មជនម្នាក់ ត្រូវបានឃាត់ខ្លួន នៅពេលដែលព្យាយាមចូលទៅស្ថានីយប្រេងឥន្ធនៈ កាល់តិច បូកគោ ដើម្បីចូលរួមរំលឹកខួប ៤ឆ្នាំ នៃការធ្វើឃាតលើលោកបណ្ឌិត កែម ឡី ។ ការឃាត់ខ្លួន ត្រូវបានធ្វើឡើង នៅខណៈដែលសកម្មជន និងព្រះសង្ឃមួយក្រុម ត្រូវបានកងកម្លាំងចម្រុះ ដែលមាន នគរបាល និងកងសន្តិសុខ រារាំង ដោយមិនឱ្យចូលទៅស្ថានីយប្រេងឥន្ធនៈ កាល់តិច ដែលជាកន្លែងលោកបណ្ឌិត ត្រូវបានគេបាញ់សម្លាប់ ។
សកម្មជនម្នាក់ ដែលមានពាក់អាវយឺតមានរូបលោក កែម ឡី ត្រូវបានឃាត់ខ្លួនដោយនគរបាល ភ្លាមៗនៅពេលដែលលោកមកដល់ទីតាំងរំលឹកខួប ។ លោក ត្រូវបានអាជ្ញាធរដោះលែងវិញ បន្ទាប់ពីចុះហត្ថលេខាលើកិច្ចសន្យាជាមួយអាជ្ញាធរ ។
កងកម្លាំងចម្រុះ បានស្រាក់ដៃគ្នា ដើម្បីរារាំងសកម្មជន និងព្រះសង្ឃទាំងនោះ ដោយមិនឱ្យចូលទៅស្ថានីយ ដែលជាកន្លែងលោកបណ្ឌិត ត្រូវបានគេបាញ់សម្លាប់ ខណៈដែលលោកកំពុងទទួលទានកាហ្វេនៅព្រឹកមួយកាលពីថ្ងៃ ១០ ខែកក្កដា ឆ្នាំ២០១៦ ។
អត្ថបទខ្លីៗ | តុលាការកំពូលបដិសេធសំណើសុំនៅក្រៅឃុំរបស់សកម្មជនដែលត្រូវបានចាប់ខ្លួនអំឡុងពេលរំលឹកខួបឃាតកម្មលោកបណ្ឌិត កែម ឡី
ថ្ងៃទី៤ ខែវិច្ឆិកា ឆ្នាំ២០១៩
នាព្រឹកនេះ តុលាការកំពូលបានចេញសាលដីកាបដិសេធសំណើសុំនៅក្រៅឃុំរបស់យុវជន គង់ រ៉ៃយ៉ា ដែលត្រូវបានចាប់ខ្លួនកាលពីថ្ងៃទី៩ ខែកក្កដា ឆ្នាំ២០១៩ បន្ទាប់ពីបានបង្ហោះសារលើបណ្ដាញសង្គមហ្វេសប៊ុកថា លោកមានលក់អាវយឺតមានរូបអ្នកវិភាគនយោបាយដែលត្រូវបានឃាតករបាញ់សម្លាប់។
រ៉ៃយ៉ា ត្រូវបានចោទប្រកាន់ពី “បទញុះញង់ឱ្យប្រព្រឹត្តបទឧក្រិដ្ឋ ជាអាទិ៍” ជាមួយនឹងយុវជន សួង នាគព័ន្ធ ដែលត្រូវបានចាប់ខ្លួននៅថ្ងៃបន្ទាប់ នៅព្រឹត្តិការណ៍រំលឹកខួបលោកបណ្ឌិត កែម ឡី និងត្រូវប្រឈមនឹងបទចោទដូចគ្នា។ បច្ចុប្បន្ននេះ អ្នកទាំងពីរកំពុងជាប់ឃុំនៅមណ្ឌលអប់រំកែប្រែទី១ ក្នុងរាជធានីភ្នំពេញ។
អត្ថបទខ្លីៗ | សកម្មជនពីររូបដែលត្រូវបានឃុំខ្លួនបណ្តោះអាសន្ន ពេលប្រារព្ធខួបបីឆ្នាំរបស់បណ្ឌិត កែម ឡី ត្រូវបានតុលាការបដិសេធសំណើនៅក្រៅឃុំ
ថ្ងៃទី២៥ ខែកក្កដា ឆ្នាំ២០១៩
លោក គង់ រៃ៉យ៉ា និង លោក សួង នាគព័ន្ធ ត្រូវបានសាលាដំបូងរាជធានីភ្នំពេញបដិសេធសំណើរសុំនៅក្រៅឃុំ នារសៀលថ្ងៃពុធថ្ងៃនេះ។ អ្នកទាំងពីរ គឺជាសកម្មជនពីររូបត្រូវបានឃាត់ និងឃុំខ្លួនកាលពីថ្ងៃទី៩ និង១០ ខែកក្កដាកន្លងទៅ ខណៈពេលដែលអ្នកទាំងពីរប្រារព្ធពិធីរំលឹកខួបនៃការបាញ់សម្លាប់លោកបណ្ឌិត កែម ឡី ។
អ្នកទាំងពីរ ត្រូវបានចាប់ខ្លួន បន្ទាប់ពីបានអនុវត្តសិទិ្ធសេរីភាពក្នុងការបញ្ចេញមតិរបស់ខ្លួន ហើយត្រូវបានតុលាការចោទប្រកាន់ពីបទល្មើសញុះញង់ឲ្យប្រព្រឹត្តបទឧក្រិដ្ឋជាអាទិ៍។ រៃ៉យ៉ា ដែលមានអាយុ ២៨ ឆ្នាំ ត្រូវបានចាប់ខ្លួនកាលពីថ្ងៃទី៩ ខែកក្កដា ឆ្នាំ២០១៩ បន្ទាប់ពីលោក បានបង្ហោះសារនៅក្នុងគណនីហ្វេសប៊ុករបស់លោក លក់អាវយឺតដែលមានរូបលោកបណ្ឌិត កែម ឡី និងបង្ហោះលេខទូរស័ព្ទរបស់អ្នករត់ម៉ូតូឌុប ដែលនឹងដឹកជញ្ជូនពលរដ្ឋណាដែលមានបំណងទៅចូលរួមរំលឹកខួបនៃការបាញ់សម្លាប់លោកបណ្ឌិត។ នាគព័ន្ធ ដែលមានអាយុ ២៩ ឆ្នាំ ត្រូវបានចាប់ខ្លួននៅក្រៅស្ថានីយ៍ប្រេងឥន្ធនៈកាលតិចសាខាបូកគោ មួយថ្ងៃក្រោយ ការចាប់ខ្លួន រៃ៉យ៉ា។ ស្ថានីយ៍ប្រេងឥន្ធនៈកាលតិចសាខាបូកគោ គឺជាកន្លែងដែលលោកបណ្ឌិត កែម ឡី ត្រូវបានគេបាញ់សម្លាប់ កាលពីបីឆ្នាំមុន។ នាគព័ន្ធ ដែលជាអតីតសមាជិកម្នាក់នៃក្រុមយុវជនបណ្ឌិតកែមឡី បានកាន់ក្រដាសមួយសន្លឹកដែលមានសរសេរថា “បញ្ឈប់ការសម្លាប់មនុស្សក្រៅប្រព័ន្ធតុលាការ” នៅមុនពេលមានការចាប់ខ្លួនរបស់លោក។
តាមមតិសាធារណជន និងសង្គមស៊ីវិល អ្នកទាំងពីររូប មិនគួរត្រូវបានចាប់ និងឃុំខ្លួនក្នុងពន្ធនាគារ ដោយគ្រាន់តែអនុវត្តនូវសិទិ្ធសេរីភាពនៃការបញ្ចេញមតិរបស់ខ្លួនឡើយ ដែលសេរីភាពទាំងនេះ ត្រូវបានធានាដោយរដ្ឋធម្មនុញ្ញនៃព្រះរាជាណាចក្រកម្ពុជា និងអនុសញ្ញាអន្តរជាតិដែលកម្ពុជាបានផ្តល់សច្ចាប័ន។
សេចក្តីថ្លែងការណ៍ | ការចាប់ខ្លួនសកម្មជន២នាក់បង្ហាញទៅកាន់សាធារណជនថា អាជ្ញាធរខ្វះការគោរពសេរីភាពក្នុងការបញ្ចេញមតិ និងជួបជុំគ្នា
ថ្ងៃទី១២ ខែកក្កដា ឆ្នាំ២០១៩
យើងខ្ញុំ ជាក្រុមសង្គមស៊ីវិលមានរាយនាមដូចខាងក្រោម សូមសម្ដែងការសោកស្ដាយយ៉ាងខ្លាំង ចំពោះការប្រើប្រាស់កងកម្លាំងសន្ដិសុខដោយមិនសមហេតុផល អំឡុងពេលប្រារព្វពិធីរំលឹកខួប៣ឆ្នាំនៃឃាតកម្មលើអ្នកវិភាគនយោបាយ លោកបណ្ឌិត កែម ឡី និងសូមស្នើសុំដោយទទូចឱ្យអាជ្ញាធរដោះលែងសកម្មជនលោក គង់ រ៉ៃយ៉ា និងលោក សួង នាគព័ន្ធ ពីការឃុំខ្លួនឱ្យបានឆាប់រហ័សដោយគ្មានលក្ខខណ្ឌ និងទម្លាក់ចោលបទចោទលើអ្នកទាំងពីរ។
យុរជនទាំងពីរត្រូវបានចាប់ខ្លួន ដោយសារប្រើប្រាស់សេរីភាពនៃការបញ្ចេញមតិដោយអហិង្សា អំឡុងពេលចូលរួមពិធីរំលឹកខួបនៃឃាតកម្មលើអ្នកវិភាគនយោបាយ លោកបណ្ឌិត កែម ឡី ដែលត្រូវបានឃាតករបាញ់សម្លាប់ កាលពីថ្ងៃទី១០ ខែកក្កដា ឆ្នាំ២០១៦។ ភ្លាមៗបន្ទាប់ពីការចាប់ខ្លួន អ្នកទាំងពីរត្រូវបានចោទប្រកាន់ពីបទញុះញង់ តាមបញ្ញត្តិមាត្រា៤៩៤ និងមាត្រា៤៩៥ នៃក្រមព្រហ្មទណ្ឌ ហើយកំពុងត្រូវបានឃុំខ្លួនបណ្ដោះអាសន្នរង់ចាំសវនាការក្នុងមណ្ឌលអប់រំកែប្រែទី១ (ព្រៃស) ក្នុងរាជធានីភ្នំពេញ។
អត្ថបទ | អាជ្ញាធរឃាត់ខ្លួនមនុស្ស៧នាក់ ពាក់ព័ន្ធនឹងការរំលឹកខួប៣ឆ្នាំនៃឃាតកម្មលើលោកបណ្ឌិត កែម ឡី
ថ្ងៃទី១០ ខែកក្កដា ឆ្នាំ២០១៩
អាជ្ញាធរបានឃាត់ខ្លួនមនុស្សចំនួន៧នាក់នៅថ្ងៃទី០៩ និងថ្ងៃទី១០ ខែកក្កដា ឆ្នាំ២០១៩នេះ ពាក់ព័ន្ធនឹងការសម្ដែងក្ដីរំលែកទុក្ខ និងការគាំទ្រចំពោះអ្នកវិភាគនយោបាយ ដែលត្រូវបានឃាតករបាញ់សម្លាប់ គឺលោកបណ្ឌិត កែម ឡី ខណៈដែលប្រជាពលរដ្ឋរំលឹកខួប៣ឆ្នាំនៃឃាតកម្មលើលោកបណ្ឌិត នៅទីតាំងនៃអំពើឃាតកម្មក្នុងរាជធានីភ្នំពេញ ត្រូវបានហ៊ុមព័ទ្ធដោយកងកម្លាំងចម្រុះជាច្រើន។ ការឃាត់ខ្លួនមនុស្សទាំងនេះបង្ហាញពីការបង្ក្រាបឥតឈប់ឈរនៃការប្រើប្រាស់កម្លាំងអាជ្ញាធរច្រើនលើសលុប ដើម្បីរារាំងប្រជាពលរដ្ឋកម្ពុជាពីការសម្ដែងសិទ្ធិក្នុងការបញ្ចេញមតិ និងសិទ្ធិជួបជុំគ្នា។
នាព្រឹកនេះ សកម្មជន៣នាក់ ត្រូវបានឃាត់ខ្លួននៅខាងក្រៅស្ថានីយប្រេងឥន្ធនៈកាល់តិចស្ដុបបូកគោក្នុងរាជធានីភ្នំពេញ បន្ទាប់ពីអ្នកទាំង៣បានចូលរួមជាមួយយុវជន មេដឹកនាំសហជីព និងសមាជិកសង្គមស៊ីវិលដទៃទៀត ដើម្បីធ្វើពិធីរំលឹកខួបនេះ។ ស្ថានីយប្រេងឥន្ធនៈនេះ ជាទីតាំងដែលលោកបណ្ឌិត កែម ឡី ត្រូវបានឃាតករបាញ់សម្លាប់ កាលពីថ្ងៃទី១០ ខែកក្កដា ឆ្នាំ២០១៦។ យុរជនដែលត្រូវបានឃាត់ខ្លួនទាំង៣នាក់ក្នុងនោះក៏មាន សកម្មជនការពារបរិស្ថាន លោក ជុំ ហួត និងលោក ជុំ ហួរ ផងដែរ។
សេចក្តីថ្លែងការណ៍ | រយៈពេល ៣ ឆ្នាំហើយនៅតែមិនទាន់មានកាស៊ើបអង្កេតប្រកបដោយប្រសិទ្ធភាពចំពោះឃាតកម្មលោកបណ្ឌិត កែម ឡី
ថ្ងៃទី៩ ខែកក្កដា ឆ្នាំ២០១៩
នៅថ្ងៃគម្រប់ខួប៣ឆ្នាំ នៃឃាតកម្មទៅលើអ្នកអត្ថាធិប្បាយនយោបាយនិងអ្នកការពារសិទ្ធិមនុស្ស បណ្ឌិត កែម ឡី អង្គការមិនមែនរដ្ឋាភិបាលចំនួន ២៤ ដែលមានឈ្មោះដូចខាងក្រោម អំពាវនាវឡើងវិញឱ្យរដ្ឋាភិបាលកម្ពុជាបង្កើតគណៈកម្មការស៊ើបអង្កេតឯករាជ្យនិងមិនលម្អៀង ដើម្បីស៊ើបអង្កេតឱ្យបានហ្មត់ចត់និងមានប្រសិទ្ធភាពចំពោះឃាតកម្មលើរូបលោក។
នៅថ្ងៃទី១០ ខែកក្កដា ឆ្នាំ២០១៦ លោក កែម ឡី ត្រូវបានឃាតករបាញ់សម្លាប់ខណៈពេលដែលលោកកំពុងទទួលទានកាហ្វេពេលព្រឹកនៅស្ថានីយ៍ប្រេងឥន្ធនៈដែលមានទីតាំងនៅលើមហាវិថីព្រះមុន្នីវង្សនៅកណ្តាលរាជធានីភ្នំពេញ។ ឃាតកម្មនេះបានកើតឡើងចំពេលដែលមានការវាយប្រហារទៅលើអ្នកការពារសិទ្ធិមនុស្សនិងសមាជិកគណបក្សជំទាស់និងកំណត់ត្រានៃឃាតកម្មទៅលើអ្នកការពារសិទិ្ធមនុស្សជាច្រើនកន្លងមកដោយបន្សល់នៅនិទណ្ឌភាពនៅក្នុងប្រទេសកម្ពុជា។
អត្ថបទ | អង្គការសហប្រជាជាតិ នឹងពិនិត្យឡើងវិញទៅលើស្ថានភាពសិទិ្ធមនុស្សនៅកម្ពុជា
ថ្ងៃទី៣០ ខែមករា ឆ្នាំ២០១៩
របាយការណ៍ស្តីពីស្ថានភាពសិទិ្ធមនុស្សនៅកម្ពុជា ត្រូវបានដាក់ចូលទៅក្រុមប្រឹក្សាសិទិ្ធមនុស្សនៃអង្គការសហប្រជាជាតិនាថ្ងៃនេះ ដើម្បីធ្វើការត្រួតពិនិត្យ ដែលនេះជាផ្នែកមួយនៃនីតិវិធីនៃការត្រួតពិនិត្យ ជាសាកល និងជាទៀងទាត់ (UPR)។
អង្គការ លីកាដូ បានចូលរួមចំណែក នៅក្នុងរបាយការណ៍រួមចំនួនពីរ ដែលរៀបរៀងឡើងដោយអង្គការសហព័ន្ធសិទ្ធិមនុស្សអន្តរជាតិ (FIDH) និង វេទិកាអាស៊ានសម្រាប់សិទិ្ធមនុស្ស និងការអភិវឌ្ឍន៍ (FORUM-ASIA)ដោយបានបង្ហាញនូវការបង្ក្រាបរបស់អាជ្ញាធររដ្ឋមកលើអ្នកការពារសិទិ្ធមនុស្ស សារព័ត៌មាន និងក្រុមសង្គមស៊ីវិល ហើយនិងផលវិបាកនៃការរំលោភសិទិ្ធដីធ្លី។
កម្រងរូបភាព | ព្រឹត្តិការណ៍នៃពិធីបុណ្យខួបគម្រប់មួយឆ្នាំនៃមរណភាពលោក បណ្ឌិត កែម ឡី
ថ្ងៃទី១១ ខែកក្កដា ឆ្នាំ២០១៧
កម្រងរូបភាពក្នុងព្រឹត្តិការណ៍ ថ្ងៃទី៩ និងទី១០ ខែកក្កដា ឆ្នាំ២០១៧ អំឡុងពេលប្រារព្ធខួបគម្រប់មួយឆ្នាំនៃការបាញ់សម្លាប់លោកបណ្ឌិត កែម ឡី។ ប្រជាពលរដ្ឋកម្ពុជានៅក្រៅប្រទេស ក៏បានប្រារព្ធបុណ្យខួបគម្រប់មួយឆ្នាំនេះដែរ ដូចជានៅប្រទេសថៃ និងប្រទេសអូស្ត្រាលី។ កាលពីថ្ងៃទី១០ ខែកក្កដា ឆ្នាំ២០១៦ លោកបណ្ឌិត ត្រូវបានឃាតករបាញ់ត្រូវចំនួនពីរកន្លែង ត្រង់ដើមទ្រូង និងក្បាល នៅក្នុងស្តាម៉ាតនៃស្ថានីយ៍ប្រេងឥន្ធនៈកាល់តិចស្ដុបបូកគោក្នុងរាជធានីភ្នំពេញ។ ខ្មាន់កាំភ្លើងដែលត្រូវបានគេស្គាល់ថាឈ្មោះ អឿត អាង ត្រូវបានតុលាការផ្តន្ទាទោសដាក់ពន្ធនាគារអស់មួយជីវិតកាលពីខែមិនា ឆ្នាំ២០១៧ ប៉ុន្តែយុត្តិធម៌នៅតែមិនទាន់មាននៅឡើយ ដោយសារនៅមានមន្ទិលសង្ស័យជាច្រើនពាក់ព័ន្ធនឹងភាពខ្វះចន្លោះនៃដំណើរការរឿងក្ដីព្រហ្មទណ្ឌនេះ ទាំងនៅក្នុងនីតិវិធីស៊ើបអង្កេត និងសវនាការ។
ឯកសារ | លិខិតចំហរួម៖ សំណើបង្កើតគណៈកម្មការស៊ើបអង្កេតជុំវិញរឿងក្ដីឃាតកម្មលើ លោក កែម ឡី
ថ្ងៃទី១០ ខែកក្កដា ឆ្នាំ២០១៧
នៅមុនឱកាសនៃខួបគម្រប់មួយឆ្នាំនៃមរណភាពរបស់លោក កែម ឡី យើងខ្ញុំជាអង្គការសង្គមស៊ីវិល ដែលមានរាយនាមខាងក្រោម សម្តែងក្តីបារម្ភជាថ្មីម្តងទៀតជុំវិញការវិវឌ្ឍតិចតួចនៅក្នុងការស៊ើបអង្កេតករណីឃាតកម្មនេះ ក៏ដូចជា ការស៊ើបអង្កេត និងសវនាការជំនុំជម្រះមិនទាន់គ្រប់គ្រាន់ ដោយសារមានតែឈ្មោះ
អឿត អាង ម្នាក់ប៉ុណ្ណោះដែលត្រូវបានតុលាការសម្រេចផ្តន្ទាទោស ឬចោទប្រកាន់ជុំវិញការស្លាប់របស់លោក កែម ឡី។ ដោយសារតែការស៊ើបអង្កេតនៅមិនទាន់គ្រប់គ្រាន់ យើងខ្ញុំសូមស្នើឲ្យរាជរដ្ឋាភិបាលកម្ពុជា
(“រដ្ឋាភិបាល”) បង្កើតគណៈកម្មការស៊ើបអង្កេតឯករាជ្យ និងឥតលម្អៀងមួយស្របតាមបទដ្ឋានអន្តរជាតិ ដើម្បីបន្តបើកការស៊ើបអង្កេតបន្ថែមទៀត។
សេចក្តីថ្លែងការណ៍ | ការស៊ើបអង្កេតឯករាជ្យជាមធ្យោបាយដ៏សំខាន់មួយ ដែលអាចផ្ដល់យុត្តិធម៌ចំពោះសំណុំរឿងឃាតកម្មលោកបណ្ឌិត កែម ឡី
ថ្ងៃទី៨ ខែកក្កដា ឆ្នាំ២០១៧
អស់រយៈពេលមួយឆ្នាំបន្ទាប់ពីឃាតកម្មលើលោកបណ្ឌិត កែម ឡី យើងខ្ញុំជាក្រុមសង្គមស៊ីវិលមានរាយនាមដូចខាងក្រោម ជឿជាក់ថា យុត្តិធម៌នៅមិនទាន់មាននៅឡើយទេសម្រាប់អតីតអ្នកវិភាគនយោបាយឯករាជ្យរូបនេះ រួមទាំងក្រុមគ្រួសារ មិត្តភក្ដិនិងសហការីរបស់លោក។
អ្នកវិភាគសង្គមនិងនយោបាយដ៏មានប្រជាប្រិយភាព និងជាអ្នកធ្វើយុទ្ធនាការប្រឆាំងអំពើពុករលួយ ត្រូវបានឃាតករបាញ់សម្លាប់នៅថ្ងៃទី១០ ខែកក្កដា ឆ្នាំ២០១៦ ខណៈពេលដែលលោកកំពុងពិសារកាហ្វេនៅក្នុងហាងលក់ទំនិញនៃបរិវេណស្ថានីយ៍ប្រេងឥន្ធនៈកាល់តិច នៅកែងស្ដុបបូកគោក្នុងរាជធានីភ្នំពេញ។ ការស៊ើបអង្កេតនៃករណីឃាតកម្មនេះ នៅមិនទាន់មានតម្លាភាពនៅឡើយទេ ហើយមន្ទិលសង្ស័យជាច្រើនក្នុងសំណុំរឿងនេះ ក៏នៅមិនទាន់មានការបកស្រាយផងដែរ។
សេចក្តីថ្លែងការណ៍ | សេចក្តីថ្លែងការណ៍រួម៖ អង្គការសង្គមស៊ីវិលទាមទារឲ្យមានការស៊ើបអង្កេតឯករាជ្យជុំវិញឃាតកម្មលើលោក កែម ឡី ក្រោយពីការប្រកាសសាលក្រមផ្តន្ទាទោស
ថ្ងៃទី២៣ ខែមីនា ឆ្នាំ២០១៧
បីសប្តាហ៍បន្ទាប់ពីសវនាការជំនុំជម្រះរយៈពេល ៤ ម៉ោង នៅថ្ងៃនេះ សាលាដំបូងរាជធានីភ្នំពេញបានសម្រេចផ្តន្ទាទោសជនជាប់ចោទឈ្មោះ អឿត អាង ដែលហៅក្រៅថា ‘ជួប សម្លាប់’ ពីបទមនុស្សឃាតគិតទុកជាមុនលើលោក កែម ឡី ដែលជាអ្នកវិភាគនយោបាយ និងពីបទកាន់កាប់អាវុធដោយគ្មានការអនុញ្ញាត តាមមាត្រា ២០០ និងមាត្រា ៤៩០ នៃក្រមព្រហ្មទណ្ឌកម្ពុជា។ ប្រធានក្រុមប្រឹក្សាជំនុំជម្រះ លោកចៅក្រម លាង សំណាត់ បានប្រកាសសាលក្រមផ្តន្ទាទោសជនជាប់ចោទ អឿត អាង ឲ្យជាប់ពន្ធនាគារអស់មួយជីវិត។
ថ្វីបើមានភស្តុតាងគួរឲ្យជឿជាក់ថា អឿត អាង គឺជាខ្មាន់កាំភ្លើង ដែលបានបាញ់ និងសម្លាប់លោក កែម ឡី យ៉ាងណាក្តី កង្វះតម្លាភាពក្នុងការស៊ើបអង្កេតលើការស្លាប់របស់លោក កែម ឡី នីតិវិធីជំនុំជម្រះខ្លីពេក និងការខកខានក្នុងការស៊ើបអង្កេតឲ្យបានពេញលេញជុំវិញមូលហេតុ អ្នកសមគំនិត និងស្ថានភាពនៃការចាប់ខ្លួន អឿត អាង ដែលបញ្ហាទាំងអស់នេះបង្កជាក្តីបារម្ភជាខ្លាំងអំពីភាពពេញលេញនៃដំណើរការព្រហ្មទណ្ឌលើករណីមួយនេះ។ ដោយសារតែការស៊ើបអង្កេតមិនគ្រប់គ្រាន់ជុំវិញឃាតកម្មលោក កែម ឡី ក៏ដូចជានីតិវិធីសវនាការជំនុំជម្រះ យើងខ្ញុំជាអង្គការសង្គមស៊ីវិលដែលមានរាយនាមខាងក្រោម សូមអំពាវនាវឲ្យបង្កើតគណៈកម្មការស៊ើបអង្កេតឯករាជ្យមួយ ក្នុងការស៊ើបអង្កេតពីស្ថានភាពទាំងមូលនៃឃាតកម្មនេះ ដើម្បីឲ្យស្របតាមការអនុវត្តល្អបំផុតជាអន្តរជាតិ។
អត្ថបទខ្លីៗ | យុវជនត្រូវបានឃាត់ខ្លួនខណៈដែលមានការហាមចាក់បញ្ចាំងវីដេអូឯកសារ
ថ្ងៃទី១២ ខែមីនា ឆ្នាំ២០១៧
ថ្ងៃនេះ យុវជនចំនួនបួននាក់ត្រូវបានឃាត់ខ្លួនអស់រយៈពេលបីម៉ោងបន្ទាប់ពីនគរបាល និងកងសន្តិសុខបានហាមឃាត់ការចាក់បញ្ចាំងវីដេអូឯកសាររបស់កាសែត Al Jazeera ស្តីពីករណីឃាតកម្មរបស់អ្នកវិភាគនយោបាយ លោកបណ្ឌិត កែម ឡី។
ការចាក់បញ្ចាំងវីដេអូឯកសារនេះត្រូវបានគ្រោងធ្វើឡើងនៅការិយាល័យឯកជនមួយរបស់សមាគមសម្ព័ន្ធនិស្សិតបញ្ញាវន្តខ្មែរ (KSILA) ដែលជាអង្គការមួយរបស់សកម្មជននិងអ្នកវិភាគវ័យក្មេង។ អ្នកចូលរួមប្រមាណជា ១៥នាក់រង់ចាំទស្សនាវីដេអូឯកសារនេះ នៅពេលដែលមានកងកម្លាំងនគរបាលនិងកងសន្តិសុខប្រមាណជា ៥០នាក់បានឡោមព័ទ្ធការិយាល័យនិងបានឃាត់ខ្លួនយុវជនចំនួនបួននាក់។ លោក មួង សូនី លោក សួង នាគព័ន្ធ លោក វ៉ន ចាន់ឡូត និងលោក ហេង សំណាង ជាសមាជិករបស់សមាគមសម្ព័ន្ធនិស្សិតបញ្ញាវន្តខ្មែរ ត្រូវបានដោះលែងនៅម៉ោងប្រហែលជា ៦ល្ងាច បន្ទាប់ពីអ្នកទាំងនោះបានចុះហត្ថលេខាលើកិច្ចព្រមព្រៀង ដោយសន្យាថានឹងឈប់ចាក់បញ្ចាំងខ្សែរវីដេអូនេះម្តងទៀត បើពុំមានការអនុញ្ញាតពីអាជ្ញាធរ។
កម្រងរូបភាព | ក្បួនដង្ហែនៃពិធីបុណ្យខួបគំរប់ ១០០ថ្ងៃ របស់លោកបណ្ឌិត កែម ឡី
ថ្ងៃទី១៧ ខែតុលា ឆ្នាំ២០១៦
កាលពីថ្ងៃអាទិត្យកន្លងទៅនេះ ប្រជាពលរដ្ឋរាប់ពាន់នាក់បានចូលរួមដង្ហែក្បួនពីរាជធានីភ្នំពេញ ឆ្ពោះទៅកាន់ខេត្តតាកែវ ដែលមានចម្ងាយប្រមាណជា ៩០គីឡូម៉ែត្រ ដើម្បីប្រារព្ធពិធីបុណ្យខួបគំរប់ ១០០ថ្ងៃ នៃឃាតកម្មលើអ្នកវិភាគនយោបាយឯករាជ្យ លោកបណ្ឌិត កែម ឡី។ លោកត្រូវបានឃាតករបាញ់សម្លាប់ នៅក្នុងហាងកាហ្វេនៃបរិវេណស្ថានីយប្រេងឥន្ធនៈកាល់តិចមួយកន្លែង នៅកណ្ដាលរាជធានីភ្នំពេញ។ រយៈពេលជាង៣ខែមកហើយ ចាប់តាំងពីលោកត្រូវបានឃាតករបាញ់សម្លាប់ទាំងកណ្ដាលថ្ងៃនៅកណ្ដាលរាជធានី ប៉ុន្តែនៅតែមិនទាន់មានការស៊ើបអង្កេតដោយឯករាជ្យ ដែលគួរឲ្យទុកចិត្តបាននៅឡើយទេ ពាក់ព័ន្ធនឹងឃាតកម្មរបស់លោកនេះ។
ក្បួនដង្ហែបានចាប់ផ្ដើមចេញពីវត្តពោធិយារាម ហៅវត្តចាស់ នៅក្នុងរាជធានីភ្នំពេញ ជាកន្លែងដែលប្រជាពលរដ្ឋរាប់ពាន់នាក់បានធ្វើដំណើរទៅគោរពវិញ្ញាណក្ខន្ធរបស់លោកបណ្ឌិត កែម ឡី កាលពី២ថ្ងៃមុនថ្ងៃដង្ហែក្បួននេះ។
ផ្សាយព័ត៌មានផ្ទាល់ | ការដង្ហែសពលោកបណ្ឌិត កែម ឡី
ថ្ងៃទី២៤ ខែកក្កដា ឆ្នាំ២០១៦
នៅម៉ោង ៧ ព្រឹកនេះ អ្នកកាន់ទុក្ខជាច្រើននាក់នឹងចាប់ផ្ដើមដង្ហែសពលោកបណ្ឌិត កែម ឡី ពីវត្តពោធិយារាម ហៅ វត្តចាស់ នៅរាជធានី ភ្នំពេញ ឆ្ពោះទៅកាន់ស្រុកកំណើតរបស់លោកដែលស្ថិតនៅក្នុងភូមិ អង្គតាកុក ខេត្តតាកែវ។ ការដង្ហែសពនេះរំពឹងថា នឹងអាចមានប្រជាពលរដ្ឋរាប់ពាន់នាក់ចូលរួម។ កាលពីថ្ងៃទី១០ ខែកក្កដា លោកបណ្ឌិត កែម ឡី ត្រូវបានឃាតករបាញ់សម្លាប់នៅក្នុងហាងកាហ្វេមួយនៃស្ថានីយប្រេងឥន្ធនៈកាល់តិច កណ្ដាលរាជធានីភ្នំពេញ។ ជនសង្ស័យម្នាក់ដែលជាអតីតទាហាន ត្រូវបានចាប់ខ្លួនភ្លាមៗបន្ទាប់ពីបានធ្វើការបាញ់ប្រហារ ហើយបច្ចុប្បន្នកំពុងតែស្ថិតនៅក្នុងមណ្ឌលឃុំឃាំង។
សេចក្តីថ្លែងការណ៍ | សង្គមស៊ីវិលកម្ពុជាថ្កោលទោសការសម្លាប់អ្នកវិភាគឯករាជ្យ លោកបណ្ឌិត កែម ឡី
ថ្ងៃទី១១ ខែកក្កដា ឆ្នាំ២០១៦
យើង ខ្ញុំ ជាក្រុមសង្គមស៊ីវិលដែលមានរាយនាមដូចខាងក្រោម មានការសោកស្តាយយ៉ាងខ្លាំងចំពោះការធ្វើឃាតលោកបណ្ឌិត កែម ឡី កាលពីព្រឹកម្សិលមិញ ដែលលោកជាអ្នកវិភាគឯករាជ្យ និងជាអ្នករៀបចំបណ្តាញប្រជាពលរដ្ឋមូលដ្ឋាន ហើយសូមអំពាវនាវឲ្យមានការស៊ើបអង្កេតឲ្យបានឆាប់រហ័ស ឯករាជ្យ និងម៉ត់ចត់ទៅលើការស្លាប់របស់លោក។