តុលាការផ្ដន្ទាទោសអតីតសកម្មជនបក្សប្រឆាំង៣៦នាក់ ក្នុងសវនាការដ៏ធំចុងក្រោយនេះ
ចេញផ្សាយ ថ្ងៃទី២២ ខែធ្នូ ឆ្នាំ២០២២នាព្រឹកនេះ សាលាដំបូងរាជធានីភ្នំពេញ បានសម្រេចផ្ដន្ទាទោសអតីតថ្នាក់ដឹកនាំ សមាជិក និងអ្នកគាំទ្រគណបក្សសង្គ្រោះជាតិដែលត្រូវបានរំលាយ ពីបទរួមគំនិតក្បត់ តាមបញ្ញត្តិមាត្រា ៤៥៣ នៃក្រមព្រហ្មទណ្ឌ ។ អតីតសកម្មជនគណបក្សជំទាស់ទាំងនេះ ត្រូវបានកាត់ទោសម្នាក់ៗឱ្យជាប់ពន្ធនាគារ ចន្លោះពី ៥ឆ្នាំ ដល់ ៧ឆ្នាំ ហើយសកម្មជនតែ៣នាក់ប៉ុណ្ណោះដែលបានទទួលការព្យួរទោស ។ សកម្មជនចំនួន ១១នាក់ ត្រូវបានព្យួរសិទ្ធិធ្វើនយោបាយរយៈពេល ៥ឆ្នាំ ។
សកម្មជននយោបាយទាំងនេះ ត្រូវបានផ្ដន្ទាទោសដោយផ្អែកលើការបង្ហោះសារនៅលើហ្វេសប៊ុក និងការថតសំឡេងសន្ទនាតាមទូរសព្ទជាលក្ខណៈឯកជន ពាក់ព័ន្ធនឹងការព្យាយាមធ្វើមាតុភូមិនិវត្តន៍មកប្រទេសកម្ពុជាវិញ របស់អ្នកស្រី មូរ សុខហួរ និងអតីតថ្នាក់ដឹកនាំគណបក្សសង្គ្រោះជាតិផ្សេងទៀត កាលពីខែមករា ឆ្នាំ២០២១ ដើម្បីចូលរួមតតាំងក្នុងសវនាការដ៏ធំមួយទៀត ។ អ្នកស្រី សុខហួរ ត្រូវបានបដិសេធមិនឱ្យឡើងយន្តហោះ ដោយសារអាជ្ញាធរកម្ពុជា បានលុបចោលលិខិតឆ្លងដែនរបស់អ្នកស្រី ព្រមទាំងបានបដិសេធក្នុងការផ្ដល់ទិដ្ឋាការឱ្យអ្នកស្រីនៅក្នុងប្រទេសកំណើតរបស់ខ្លួន ។
សកម្មជនទាំង១១នាក់ ដែលជាអតីតថ្នាក់ដឹកនាំគណបក្សសង្គ្រោះជាតិនៅក្រៅប្រទេស ត្រូវបានតុលាការផ្ដន្ទាទោសនាព្រឹកនេះ ឱ្យជាប់ពន្ធនាគាររយៈពេល ៧ឆ្នាំ ។ តុលាការក៏បានដាក់ទោសបន្ថែមតាមការស្នើសុំរបស់តំណាងអយ្យការ ដោយបង្គាប់ថា ពួកគេមិនអាចចូលរួមបោះឆ្នោត ឬឈរឈ្មោះបោះឆ្នោតរយៈពេល ៥ឆ្នាំ ។ អ្នកទាំងនោះរួមមាន លោក សម រង្ស៊ី លោក អេង ឆៃអ៊ាង អ្នកស្រី មូរ សុខហួរ លោក ហូរ វ៉ាន់ លោក ហេង ដាណារ៉ូ លោក ឡុង រី លោក ម៉ែន សុថាវរិន្ទ្រ លោក នុត រំដួល លោក អ៊ូ ចាន់ឫទ្ធិ អ្នកស្រី ជូឡុង សូមូរ៉ា និងលោក វ៉ាន ណារិទ្ធ ។
សមាជិក និងអ្នកគាំទ្រចំនួន ២២នាក់ទៀត ត្រូវបានផ្ដន្ទាទោសឱ្យជាប់ពន្ធនាគាររយៈពេល ៥ឆ្នាំ ។ អ្នកទាំងនេះរួមមាន៖ លោក អាត វិចិត្រ លោក ប៊ុត សុគន្ធា ជារី លោក ឆេង សោភ័ណ លោក ឈុន វ៉ាន លោក ហៃ វណ្ណា លោក ខាន់ ប៊ុនផេង លោក ឃិន ជំរឿន លោក ឃិន សាម៉ន លោក ឃ្លាំង ប៊ុនឡាយ លោក គង់ ម៉ាស់ លោក ឡេង សុធារី លោក ឡុង ប៊ុត្តា លោក ម៉ៅ វិបុល លោក អូន ពៅ លោក ផន ផាន់ណា លោក ប្រាក់ សារុំ លោក សេង ប៊ុនរ៉ុង លោក សុត ស៊ីឡាត លោក ស ចាន់ដេត លោក សុំ សីហា លោក តោ និមល និងលោក វឿង សំណាង ។
ជនជាប់ចោទ៣នាក់ទៀត ក៏ត្រូវបានផ្ដន្ទាទោសដាក់ពន្ធនាគារ ៥ឆ្នាំ ដោយលោក ឈុន សិទ្ធី និងលោក ងីម ញេង ត្រូវបានព្យួរ ទោសទាំងអស់ ហើយលោក ហេង សុខឡេង ត្រូវបានកាត់បន្ថយការអនុវត្តទោសក្នុងពន្ធនាគារ ដោយទោសនៅសល់ត្រូវបានព្យួរ ។ លោក សុខឡេង ធ្លាប់ត្រូវបានឃុំខ្លួនបណ្ដោះអាសន្នរង់ចាំសវនាការ មុនពេលត្រូវបានដោះលែងឱ្យនៅក្រៅឃុំវិញ ។
ជនជាប់ចោទឈ្មោះ ម៉ាត់ វណ្ណី ត្រូវបានសម្រេចឱ្យរួចផុតពីការចោទប្រកាន់ នាព្រឹកនេះ ។ ហើយក៏មានការចេញដីកាចាប់ និងឃុំខ្លួន សម្រាប់សកម្មជនចំនួន ៣០នាក់ ក្នុងនោះមានអ្នកដែលមិនទាន់ត្រូវបានឃុំខ្លួន ឬអ្នកមិនទទួលបានការព្យួរទោស ។ ពុំមានការផ្ដល់ហេតុផលសម្រាប់ការចេញសាលក្រមនេះទេ ។
ក្នុងចំណោមនោះ ពួកគេចំនួន ៣៣នាក់ ត្រូវបានជំនុំជម្រះ និងផ្ដន្ទាទោសដោយកំបាំងមុខ ខណៈដែលភាគីមេធាវីការពារសិទ្ធិឱ្យជនជាប់ចោទ បានអះអាងថា អ្នកដែលនៅក្រៅប្រទេសទាំងនោះ មិនបានទទួលការកោះហៅឱ្យបានត្រឹមត្រូវនោះទេ ។ សកម្មជន៣នាក់រួមមាន លោក ខាន់ ប៊ុនផេង លោក គង់ ម៉ាស់ និងលោក វឿង សំណាង កំពុងស្ថិតក្រោមការឃុំខ្លួនក្នុងពន្ធនាគារ និងស្ថិតក្នុងចំណោមអ្នកដែលត្រូវបានកាត់ទោសឱ្យជាប់ពន្ធនាគារ ៥ឆ្នាំ ។ ពួកគេបានបង្ហាញខ្លួន ក្នុងពេលជំនុំជម្រះ១០លើកកន្លងមក និងក្នុងពេលចៅក្រមប្រកាសសាលក្រមនាព្រឹកនេះ ។ គិតមកទល់ពេលនេះ លោក ប៊ុនផេង និងលោក គង់ ម៉ាស់ បានជាប់ពន្ធនាគាររយៈពេលជាង ៧០០ថ្ងៃមកហើយ ។ លោក សំណាង ត្រូវបានផ្ដល់សិទ្ធិជាជនភៀសខ្លួននៅក្នុងប្រទេសថៃ ប៉ុន្តែត្រូវបានចាប់ខ្លួននៅទីក្រុងបាងកក មុនពេលត្រូវបានបញ្ជូនមកប្រទេសកម្ពុជាវិញ និងឃុំខ្លួនក្នុងពន្ធនាគារ ក្នុងខែវិច្ឆិកា ឆ្នាំ២០២១ ។ ភរិយារបស់ពួកគេ បានបង្ហាញខ្លួននៅក្នុងបន្ទប់សវនាការនាព្រឹកនេះ ហើយភរិយាលោក សំណាង បានយំខ្សឹកខ្សួល និងចាប់កាន់ស្វាមីរបស់ខ្លួន មុនពេលសន្តិសុខឱ្យអ្នកស្រីចេញក្រៅបន្ទប់វិញ ។
សាលក្រមថ្ងៃនេះ គឺជាសាលក្រមទី៤ក្នុងចំណោមសវនាការដ៏ធំទាំង៥ ដែលត្រូវបានប្រព្រឹត្តទៅប្រឆាំងនឹងអ្នកគាំទ្រ និងថ្នាក់ដឹកនាំអតីតគណបក្សសង្គ្រោះជាតិសរុបចំនួន ១៥៨នាក់ ចាប់តាំងពី ខែវិច្ឆិកា ឆ្នាំ២០២០ មក ។ អតីតសកម្មជនជាច្រើន បានក្លាយជាជនជាប់ចោទក្នុងសវនាការផ្សេងៗគ្នា ។ មុនពេលចេញសាលក្រមថ្ងៃនេះ អតីតសកម្មជនចំនួន ៦៦នាក់ ត្រូវបានផ្ដន្ទាទោសក្នុងការជំនុំជម្រះមុនៗចំនួន៣លើក ទៅលើបទឧក្រិដ្ឋ និងបទមជ្ឈិម ផ្សេងៗគ្នា រួមមាន បទញុះញង់ បទរួមគំនិតក្បត់ និងបទប៉ុនប៉ងធ្វើឧបឃាតដែលបង្កឱ្យមានគ្រោះថ្នាក់ដល់ស្ថាប័ននៃព្រះរាជាណាចក្រកម្ពុជា ៕
MP3 format: ស្តាប់សំឡេងជាភាសាខ្មែរ
- ចំណងជើង & មូលបទ
- តុលាការ និងនីតិរដ្ឋ ការបោះឆ្នោត សិទិ្ធបញ្ចេញមតិ និងចូលរួម បញ្ហាពន្ធនាគារ
- ឯកសារទាក់ទង