សកម្មជនដីធ្លីនៅខេត្តកោះកុង ត្រូវបានដោះលែង
ចេញផ្សាយ ថ្ងៃទី៦ ខែតុលា ឆ្នាំ២០២៣នាថ្ងៃនេះ សកម្មជនដីធ្លីខេត្តកោះកុង២នាក់ រួមមានអ្នកស្រី ផាវ ញ៉ើង និងអ្នកស្រី សេង លីន ត្រូវបានដោះលែងពីពន្ធនាគារខេត្តកោះកុង ក្រោយពីសាលាឧទ្ធរណ៍ព្រះសីហនុ បង្គាប់ឱ្យដោះលែងអ្នកទាំង២ពីការឃុំខ្លួនបណ្ដោះអាសន្នរង់ចាំសវនាការ កាលពីម្សិលមិញ ។
នៅក្នុងខែសីហា ឆ្នាំ២០២៣ សាលាដំបូងខេត្តកោះកុង បានផ្ដន្ទាទោសស្រ្តីទាំង២នាក់ ឱ្យជាប់ពន្ធនាគារ១ឆ្នាំ និងឱ្យសងជំងឺចិត្តចំនួន ៤០លានរៀល (ប្រមាណជា ១ម៉ឺនដុល្លារ) ក្រោយពីរកឃើញអ្នកទាំងពីមានពិរុទ្ធភាពពីបទបរិហារកេរ្ដិ៍ និងបទញុះញង់ តាមបញ្ញត្តិមាត្រា៤៩៤ មាត្រា៤៩៥ និងមាត្រា៣០៥នៃក្រមព្រហ្មទណ្ឌ ។ អ្នកទាំង២ត្រូវបានរងបណ្ដឹងមួយដោយអតីតតំណាងសហគមន៍ឈ្មោះ ឆាយ វី ដែលត្រូវបានចោទប្រកាន់ក្នុងឆ្នាំ២០១៩ ពីការរំលោភយកដីធ្លី ។
ទាំងអ្នកស្រី ផាវ ញ៉ើង និងអ្នកស្រី សេង លីន ត្រូវបានឃុំខ្លួនបណ្ដោះអាសន្ន ចាប់តាំងពីថ្ងៃទី៣០ ខែមិថុនា ឆ្នាំ២០២៣ ក្រោយពីការចាប់ខ្លួនអ្នកទាំង២នៅថ្ងៃទី២៩ ខែមិថុនា ឆ្នាំ២០២៣ ។ កូនប្រុសតូចរបស់អ្នកស្រី ផាវ ញ៉ើង បានរស់នៅជាមួយអ្នកស្រីនៅក្នុងពន្ធនាគារ តាំងពីថ្ងៃចាប់ខ្លួននោះ ។
ប្រជាពលរដ្ឋប្រមាណជា ១០០នាក់ មកពីសហគមន៍ដីធ្លី១៧៥ សហគមន៍ដីធ្លី១៩៧ និងសហគមន៍ដីធ្លី៩៥៥ នៅក្នុងខេត្តកោះកុង បានជួបជុំគ្នា នៅខាងមុខសាលាឧទ្ធរណ៍ព្រះសីហនុ កាលពីម្សិលមិញ ដើម្បីគាំទ្រអ្នកតំណាងរបស់ពួកគេដែលកំពុងជាប់ឃុំ ។ អ្នកគាំទ្រ រួមមាន អ្នកស្រី ដេត ហ៊ួ អ្នកស្រី យី គន្ធា អ្នកស្រី ទិន តាំង ជាសកម្មជនដីធ្លី៣នាក់ ដែលត្រូវបានដោះលែងឱ្យនៅក្រៅឃុំ កាលពីថ្ងៃទី២៩ ខែសីហា ឆ្នាំ២០២៣ ។ តំណាងសហគមន៍ និងសមាជិកគ្រួសាររបស់ពួកគេ បានសម្ដែងមតិជាសាធារណៈ អំពាវនាវឱ្យមានការដោះលែងអ្នកទាំង២ ។ យ៉ាងតិចណាស់ អាជ្ញាធរស្លៀកពាក់ស៊ីវិលចំនួន៣នាក់ បានឃ្លាំមើល និងថតរូបសកម្មភាពជួបជុំរបស់សហគមន៍ ៕
- ចំណងជើង & មូលបទ
- សិទ្ធិដីធ្លី