យុទ្ធនាការ១៦ថ្ងៃ ទប់ស្កាត់អំពើហិង្សាលើស្រី្តភេទ៖ អ្នកស្រី ផាវ ញ៉ើង
ចេញផ្សាយ ថ្ងៃទី២៩ ខែវិច្ឆិកា ឆ្នាំ២០១៨
ដើម្បីប្រារព្ធយុទ្ធនាការ១៦ថ្ងៃទប់ស្កាត់អំពើហិង្សាលើស្រ្តីភេទ អង្គការលីកាដូ ផ្តោតសំខាន់ទៅលើអ្នកធ្វើយុទ្ធនាការសិទិ្ធដីធ្លី និងអ្នកការពារសិទ្ធិមនុស្សជាស្រ្តី ដែលបានប្រឈមមុខ និងទទួលរងអំពើហិង្សាពីសំណាក់អាជ្ញាធររដ្ឋនៅកម្ពុជា។
ប្រជាពលរដ្ឋកម្ពុជាប្រហែលជាងកន្លះលាននាក់បានបាត់បង់ដីធ្លី និងផ្ទះសម្បែង ដោយសារការបណ្តេញដោយបង្ខំ ក្នុងរយៈពេលជាងពីរទសវត្សរ៍មកនេះ។ ពលរដ្ឋទាំងនោះ ដែលភាគច្រើនជាស្រ្តី បានចេញមុខក្នុងការតវ៉ាដោយអហិង្សា ដើម្បីទាមទារយុត្តិធម៌ និងសំណងសមរម្យ។ ភាពសកម្មនិយមរបស់អ្នកទាំងនោះ ជាញឹកញាប់ត្រូវបានទទួលរងដោយការបង្រ្កាបយ៉ាងហិង្សាពីសំណាក់កងសន្តិសុខ ក៏ដូចជាការគំរាមកំហែងដោយប្រើប្រាស់ប្រព័ន្ធតុលាការ និងការឃុំខ្លួនដោយមិនត្រឹមត្រូវផងដែរ។
នៅក្នុងរយៈពេលពីរសប្តាហ៍ខាងមុខ (១៦ថ្ងៃ) អង្គការលីកាដូ នឹងចេញផ្សាយពីប្រវត្តិតស៊ូ និងវីដេអូខ្លីមួយចំនួន ស្តីពីស្រ្តីកម្ពុជា ដែលកំពុងបន្តទាមទារយុត្តិធម៌ ទោះបីអ្នកទាំងនោះបានជួបប្រទះនឹងផលលំបាកយ៉ាងណាក្តី។
អ្នកស្រី ផាវ ញ៉ើង ដែលមានអាយុ ៣៩ ឆ្នាំ គឺជាស្ត្រីឈរជួរមុខ នៅក្នុងការតវ៉ាមួយដែលមានរយៈពេលជាងមួយទសវត្ស ដើម្បីការពារដីធ្លីរបស់កសិកររាប់រយនាក់នៅក្នុងខេត្តកោះកុង។ អ្នកស្រី បានទទួលរងការរំលោភបំពាន ការគម្រាមកំហែង និងការឃាត់ខ្លួនជាច្រើនដង ដោយសារតែភាពសកម្មនិយមរបស់អ្នកស្រី ក្នុងនាមជាអ្នកតំណាងឲ្យសហគមន៍របស់អ្នកស្រី។
អ្នកស្រី រស់នៅក្នុងភូមិ ព្រែកជីក ស្រុកស្រែអំបិល ខេត្តកោះកុង តាំងពីឆ្នាំ ១៩៧៩។ កាលពីអតីតកាល អ្នកស្រី ត្រូវលាក់ខ្លួនពីទាហានខ្មែរក្រហម នៅពេលដែលអ្នកស្រីត្រូវទៅធ្វើស្រែចំការម្តងៗ ហើយត្រឡប់មកភូមិព្រែកជីកវិញជារៀងរាល់យប់ ដើម្បីសុវត្ថិភាពពីពួកទាហានទាំងនោះ។
ក្រោយពីមានការគម្រាមកំហែងពីទាហានខ្មែរក្រហម អ្នកស្រីបានបន្តទទួលការគម្រាមកំហែងជាថ្មីទៀត តាមរយៈផ្លូវតុលាការ និងផ្លូវច្បាប់ ពីអ្នករកស៊ីដែលមានអំណាច ដែលបានទាមទារដីមួយចំនួននៅជុំវិញភូមិរបស់អ្នកស្រី។ នៅឆ្នាំ ២០០៧ ឧកញ៉ា សុខ គង់ បានអះអាងពីភាពជាម្ចាស់កម្មសិទិ្ធនៅលើដីធ្លីទាំងនោះ ហើយក្រោយមកនៅឆ្នាំ ២០០៩ ឧកញ៉ាម្នាក់ទៀត លោក ហេង ហ៊ុយ បានមកអះអាងសិទិ្ធកម្មសិទិ្ធនៅលើដីធ្លីនោះបន្ទាប់ពីលោក សុខ គង់ តាមរយៈសេចក្តីសម្រេចរបស់តុលាការកំពូលមួយ។
ក្រុមហ៊ុនកសិកម្មរបស់លោកឧកញ៉ា ហ៊ុយ ត្រូវការដីធ្លីទាំងនោះ ដើម្បីដាំដំណាំអំពៅ និងផ្គត់ផ្គង់ទៅក្រុមហ៊ុនស្ករស កោះកុងស៊ូហ្គ៊រ ដែលមានម្ចាស់ជាសមាជិកព្រឹទ្ធសភាមកពីគណបក្សកាន់អំណាច លោក លី យ៉ុងផាត់។ ដីធ្លីចំនួន ប្រាំមួយ ហិកតា នៅជុំវិញផ្ទះរបស់អ្នកស្រី ផាវ ញ៉ើង ត្រូវបានឈូសឆាយ និងដាំដំណាំអំពៅ ដែលការឈូសឆាយ បានបំផ្លាញអណ្តូងមួយចំនួនរបស់អ្នកភូមិនៅទីនោះ។
នាងខ្ញុំ ចង់ផ្ញើសារមួយទៅកាន់សកម្មជនសិទិ្ធដីធ្លីជាស្ត្រី និងសមាជិកសហគមន៍ដទៃទៀត ថា សូមកុំនៅស្ងាត់ស្ងៀម។
ក្រុមហ៊ុន ក៏ថែមទាំងបានដាក់ពាក្យបណ្តឹង ដោយប្តឹងអ្នកស្រី ផាវ ញ៉ើង ពីបទបំផ្លិចបំផ្លាញទ្រព្យសម្បត្តិដោយចេតនា។ អ្នកស្រី ញើង ត្រូវបានតុលាការ ដាក់ឲ្យស្ថិតនៅក្រោមការត្រួតពិនិត្យតាមផ្លូវតុលាការ នៅខណៈដែលអ្នកស្រី កំពុងរង់ចាំសវនាការជំនុំជម្រះលើរឿងក្តីរបស់អ្នកស្រីអំពីការចោទប្រកាន់ទាំងនោះ។ ប៉ុន្តែទោះបីជាមានការបំភិតបំភ័យតាមផ្លូវតុលាការ និងតាមរយៈវត្តមាននគរបាលនៅក្បែរផ្ទះអ្នកស្រីជាញឹកញាប់ក៏ដោយ ក៏អ្នកស្រីមិនដែលរាថយ ហើយនៅតែបន្តសកម្មភាពតស៊ូមតិ ដើម្បីទាមទារសិទិ្ធសេរីភាពរបស់អ្នកស្រី និងសហគមន៍របស់អ្នកស្រីផងដែរ។
អ្នកស្រី បានមានប្រសាសន៍ថា៖ “អ្វីដែលលើកទឹកចិត្តខ្ញុំ (ឲ្យក្លាយជាសកម្មជនមួយរូប) គឺជាភាពឈឺចាប់”។ ខ្ញុំ ចង់ធ្វើការងារនេះ ក្នុងនាមអ្នកដទៃផងដែរ ដើម្បីការពារអ្នកទាំងនោះ កុំឲ្យជួបប្រទះបញ្ហាដូចនាងខ្ញុំ។ នាងខ្ញុំ ចង់ឲ្យអ្នកដទៃ យល់ និងដឹងអំពីរបៀបការពារខ្លួន ពីការធ្វើបាបរបស់ក្រុមហ៊ុន។”
នៅឆ្នាំ ២០១៦ អ្នកស្រី ផាវ ញ៉ើង បានចងក្រងពលរដ្ឋចំនួន ៥៣៨ គ្រួសារ ដើម្បីធ្វើដំណើរមករាជធានីភ្នំពេញ និងធ្វើការតស៊ូមតិទាមទារសិទិ្ធរបស់អ្នកទាំងនោះ និងសុំឲ្យអាជ្ញាធរធ្វើការដោះស្រាយជម្លោះដីធ្លីរបស់អ្នកទាំងនោះ។ គិតត្រឹមខែមីនា ឆ្នាំនេះ ពលរដ្ឋចំនួន ១៧៥ គ្រួសារ ទទួលបានសំណង ជាដីធ្លីចំនួន បី ហិកតា និងប្រាក់ ២.៥០០ ដុល្លារអាមេរិក ក្នុងមួយគ្រួសារ។
អ្នកស្រី បានបន្តទៀតថា៖ “នាងខ្ញុំ ចង់ផ្ញើសារមួយទៅកាន់សកម្មជនសិទិ្ធដីធ្លីជាស្ត្រី និងសមាជិកសហគមន៍ដទៃទៀត ថា សូមកុំនៅស្ងាត់ស្ងៀម។ សង្គមមួយនេះ អាចផ្តល់យុត្តិធម៌បាន ដរាបណាពលរដ្ឋចេះសាមគ្គីគ្នា និងជួយគ្នាទៅវិញទៅមក។”
MP3 format: ស្តាប់សំឡេងជាភាសាខ្មែរ
