រយៈពេល១ខែនៃការតវ៉ា កម្មករនយោជិតនៅណាហ្គាវើលដ៍នៅតែបង្ហាញសាមគ្គីភាពក្នុងការធ្វើកូដកម្ម
ចេញផ្សាយ ថ្ងៃទី១៨ ខែមករា ឆ្នាំ២០២២ថ្ងៃនេះជាថ្ងៃគំរប់ខួប១ខែ ចាប់តាំងពីកម្មករនយោជិតនៃសហភាពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ (LRSU) បានចាប់ផ្ដើមធ្វើកូដកម្ម និងតវ៉ាជារៀងរាល់ថ្ងៃដោយសន្តិវិធីនៅកណ្ដាលរាជធានីភ្នំពេញ ។ កម្មករនយោជិត បន្តធ្វើកូដកម្មប្រឆាំងនឹងការបញ្ឈប់បុគ្គលិកទ្រង់ទ្រាយធំ ដែលភាគច្រើនជាសមាជិកនិងអ្នកដឹកនាំសហជីពនៅក្នុងកាស៊ីណូ ក៏ដូចជាប្រឆាំងនឹងការផ្ដល់កញ្ចប់សំណងមិនសមរម្យ សម្រាប់និយោជិតដែលបានធ្វើការនៅទីនោះយូរឆ្នាំមកហើយ និងបញ្ហាផ្សេងៗទៀត។
ក្នុងរយៈពេលមួយខែដែលចាប់ផ្ដើមមានកូដកម្ម អាជ្ញាធរបានឃាត់និងចាប់ខ្លួនសមាជិក អ្នកដឹកនាំ និងសកម្មជនសហជីពសរុបចំនួន ២៩នាក់ ។ អ្នកទាំងនោះចំនួន៩នាក់ ត្រូវបានចោទប្រកាន់ពីបទញុះញង់ ដោយមាន៨នាក់ត្រូវបានបញ្ជូនទៅឃុំខ្លួនបណ្ដោះអាសន្នរង់ចាំសវនាការ ក្នុងនោះរួមមានកញ្ញា ឈឹម ស៊ីថរ ប្រធានសហជីព និងអ្នកស្រី ឈឹម សុខន ដែលជាលេខាធិការសហជីព ។ អ្នកស្រី សុខន ត្រូវបានចាប់ខ្លួន ជាមួយសមាជិកសហជីព៧នាក់ផ្សេងទៀត នៅការិយាល័យសហជីពណាហ្គាវើលដ៍ នៅថ្ងៃឆ្លងឆ្នាំសកលចុងឆ្នាំ២០២១ ខណៈដែលកញ្ញា ស៊ីថរ ត្រូវបានចាប់ខ្លួនយ៉ាងហិង្សា ដោយសមត្ថកិច្ចស្លៀកពាក់ស៊ីវិល នៅថ្ងៃទី០៤ ខែមករា ឆ្នាំ២០២២ នៅពេលដែលកញ្ញាព្យាយាមចូលរួមជាមួយកម្មករនយោជិតផ្សេងទៀតដែលកំពុងធ្វើកូដកម្មនៅខាងមុខស្ថានទូតអូស្ត្រាលី ។
ទោះបីជាមានការចាប់ខ្លួនពីសំណាក់អាជ្ញាធរ កម្មករនយោជិតប្រមាណជា ៦០០នាក់ បន្តបង្ហាញវត្តមានធ្វើកូដកម្មរៀងរាល់ថ្ងៃនាពេលរសៀល ដើម្បីទាមទារដោះលែងតំណាងរបស់ពួកគាត់ និងទាមទារឱ្យក្រុមហ៊ុនណាហ្គាវើលដ៍ គោរពតាមច្បាប់ស្ដីពីការងារ ។ អ្នកទាំងនោះបានបដិសេធការអំពាវនាវរបស់ក្រសួងការងាររាល់ថ្ងៃ ដែលឱ្យពួកគាត់ទទួលយក ឬចរចាយកកញ្ចប់សំណង ប៉ុន្តែផ្ទុយទៅវិញ ពួកគាត់អំពាវនាវឱ្យមានការដោះលែងតំណាងសហជីពរបស់ពួកគាត់ជាបន្ទាន់ មុនពេលមានការចរចាផ្សេងៗ ។ អាជ្ញាធរបានរារាំងកម្មករនយោជិតមិនឱ្យតវ៉ានៅខាងមុខកន្លែងការងាររបស់ពួកគេ ដែលសកម្មភាពរារាំងនេះគឺផ្ទុយទៅនឹងច្បាប់ស្ដីពីការងារ ហើយអាជ្ញាធរក៏បានបិទបន្ទប់ទឹកនៅក្បែរទីតាំងធ្វើកូដកម្មផងដែរ ដោយធ្វើការអះអាងមិនត្រឹមត្រូវថា បន្ទប់ទឹកទាំងនោះ មិនដំណើរការ ដែលនេះជាការព្យាយាមរារាំងកម្មករនយោជិតទាំងនោះមិនឱ្យធ្វើកូដកម្ម ។
នៅថ្ងៃទី០៤ ខែមករា ឆ្នាំ២០២២ ក្រុមសង្គមស៊ីវិល សហគមន៍ និងសហជីពចំនួន១១៩ស្ថាប័ន បានអំពាវនាវឱ្យដោះលែងជាបន្ទាន់ និងដោយគ្មានលក្ខខណ្ឌទៅលើសកម្មជនសហជីពទាំងអស់ ដែលត្រូវបានចាប់ខ្លួន និងអំពាវនាវឱ្យអាជ្ញាធរស្វែងរកដំណោះស្រាយ ឆ្លើយតបទៅនឹងការទាមទាររបស់កម្មករនយោជិត ។ នៅថ្ងៃទី០៧ ខែមករា ឆ្នាំ២០២២ អគ្គនាយកនៃអង្គការពលកម្មអន្តរជាតិ (ILO) បានផ្ញើលិខិតមួយជូនទៅសម្ដេចនាយករដ្ឋមន្ត្រី ហ៊ុន សែន ដោយស្នើសុំឱ្យសម្ដេចធានាពីការដោះលែងជាបន្ទាន់ចំពោះសកម្មជនសហជីពដែលកំពុងត្រូវបានឃុំខ្លួន ព្រមទាំងទម្លាក់ចោលបទចោទព្រហ្មទណ្ឌទាំងអស់ប្រឆាំងនឹងអ្នកទាំងនោះ ។
សកម្មជនសហជីពទាំង៨នាក់ ដែលកំពុងជាប់ឃុំក្នុងពន្ធនាគារ មានដូចជា៖
- អ្នកស្រី ឈឹម សុខន
- កញ្ញា ឈឹម ស៊ីថរ
- អ្នកស្រី ហៃ សុភាព
- អ្នកស្រី ឃ្លាំង សុបិន្ត
- អ្នកស្រី រី សុវណ្ណឌី
- លោក សុខ ណារឹទ្ធ
- អ្នកស្រី សុន ស្រីពេជ្រ
- កញ្ញា ទូច សិរីមាស
ជារៀងរាល់ថ្ងៃ សហជីព និងអ្នកគាំទ្ររបស់ពួកគេ អំពាវនាវឱ្យមានការដោះលែងសកម្មជនទាំង៨នាក់ តាមរយៈការបង្ហោះសារនៅលើប្រព័ន្ធផ្សព្វផ្សាយសង្គម ។ គិតមកទល់ពេលនេះ អ្នកទាំង៨ បានជាប់ឃុំអស់រយៈពេល ១៩ថ្ងៃមកហើយ ៕
MP3 format: ស្តាប់សំឡេងជាភាសាខ្មែរ
- ឯកសារទាក់ទង