ចៅក្រម បានពន្យារពេលសវនាការលើសំណុំរឿងសមាជិកព្រឹទ្ធសភាគណបក្សជំទាស់
ចេញផ្សាយ ថ្ងៃទី៧ ខែតុលា ឆ្នាំ២០១៥
សវនាការលើសំណុំរឿងលោក ហុង សុខហួរ សមាជិកព្រឹទ្ធសភានៃគណបក្សសមរង្ស៊ី ត្រូវបានពន្យារពេលភ្លាមៗ បន្ទាប់ពីការចាប់ផ្តើមបើកសវនាការបន្តនៅពេលរសៀលនេះ ដើម្បីធ្វើការស្រាវជ្រាវរកឯកសារឡើងវិញ ដែលជាឯកសារដាក់ដោយក្រុមមេធាវីការពារក្តី ហើយតុលាការបានអំពាវនាវឲ្យមាន “អ្នកជំនាញ” ដើម្បីវិភាគលើវិធីសាស្ត្រនៃការស្វែងរកនិងទាញយកឯកសារពីអ៊ិនធើណែត។
លោក ហុង សុខហួរ ត្រូវបានចោទប្រកាន់ពីបទក្លែងឯកសារសាធារណៈ ប្រើប្រាស់ឯកសារសាធារណៈក្លែង និងញុះញង់ឲ្យប្រព្រឹត្តបទល្មើសព្រហ្មទណ្ឌ បន្ទាប់ពីលោកបានបង្ហោះឯកសារដែលត្រូវបានគេកែប្រែ ស្តីពីសន្ធិសញ្ញាឆ្នាំ ១៩៧៩ រវាងប្រទេសកម្ពុជា និងវៀតណាម នៅក្នុងបណ្តាញសង្គម ហ្វេសប៊ុក។ លោក ត្រូវបានឃុំខ្លួនក្នុងមណ្ឌលអប់រំកែប្រែទី ១ ចាប់តាំងពីការចាប់ខ្លួនលោកនៅថ្ងៃទី១៦ ខែសីហា។
មិនមានកាលបរិច្ឆេទនៃការបន្តសវនាការត្រូវបានប្រកាសឲ្យដឹងនោះទេ ប៉ុន្តែសវនាការលើសំណុំរឿងនេះ បានចាប់ផ្តើមតាំងពីថ្ងៃទី២ ខែតុលា បន្ទាប់ពីសំណើសុំនៅក្រៅឃុំបណ្តោះអាសន្នរង់ចាំសវនាការរបស់លោក ហុង សុខហួរ ត្រូវបានបដិសេធ។
- ឯកសារទាក់ទង
