សវនាការលើបណ្ដឹងបរិហារកេរ្តិ៍ប្រឆាំងនឹងម្ចាស់កាសែតខេមបូឌា ដេលី ត្រូវបានលើកពេលម្ដងទៀត
ចេញផ្សាយ ថ្ងៃទី១២ ខែមេសា ឆ្នាំ២០១៨
នាថ្ងៃនេះ សាលាដំបូងរាជធានីភ្នំពេញ បានសម្រេចលើកពេលសវនាការលើសំណុំរឿង អ្នកស្រី Deborah Krisher-Steele ម្ចាស់កាសែតខេមបូឌា ដេលី ដែលត្រូវបានបិទដំណើរការ។ អ្នកស្រី កំពុងរងការចោទប្រកាន់ពី “បទបរិហារកេរ្តិ៍ ជាសាធារណៈ”។
បទចោទនេះត្រូវបានប្ដឹងដោយអគ្គនាយកដ្ឋានពន្ធដារ យោងតាមលិខិតចំហរមួយដែលបានចោទប្រកាន់នាយកដ្ឋានពន្ធដារថា បានទម្លាយព័ត៌មានសម្ងាត់អំពីបញ្ជីជាប់ជំពាក់ពន្ធដ៏ច្រើនមហាសាល ទៅកាន់សាធារណជន។ កាសែតនេះ បានសម្រេចបញ្ឈប់បុគ្គលិក និងបិទការិយាល័យនៅកម្ពុជា កាលពីថ្ងៃទី០៤ ខែកញ្ញា ឆ្នាំ២០១៧ បន្ទាប់ពីរងការចោទប្រកាន់ពីការជាប់ជំពាក់ពន្ធ ដែលមានទឹកប្រាក់ប្រមាណជាង ៦,៣ លានដុល្លារ។
អំឡុងពេលប្រកាសការលើកពេលសវនាការជាលើកទីពីរនេះ លោកចៅក្រម សេង លាង បានលើកហេតុផលថា ការលើកពេលសវនាការគឺមានភាពចាំបាច់ ដោយសាររឿងក្ដីនេះមានភាពស្មុគស្មាញ និងដើម្បីពិចារណាលើសំណើររបស់ភាគីចុងចោទក្នុងការកោះហៅបុគ្គលិកសារព័ត៌មាន Fresh News ម្នាក់ ក្នុងនាមជាសាក្សី។
កាលពីថ្ងៃទី២២ ខែមីនា ឆ្នាំ២០១៨ ចៅក្រមក៏បានសម្រេចផ្អាកសវនាការលើសំណុំរឿងនេះផងដែរ បន្ទាប់ពីសវនាការដំណើរការបានបន្តិច ដោយសំអាងថា ភ័ស្ដុតាងសំខាន់ៗមួយចំនួនមិនទាន់ត្រូវបានបកប្រែទៅជាភាសាខ្មែរ។
កាលបរិច្ឆេទថ្មីនៃសវនាការនេះមិនទាន់ត្រូវបានកំណត់នៅឡើយទេ។
