ឯកឧត្តម កឹម សុខា ត្រូវបានដាក់ឲ្យស្ថិតនៅក្រោមការត្រួតពិនិត្យតាមផ្លូវតុលាការ
ចេញផ្សាយ ថ្ងៃទី១០ ខែកញ្ញា ឆ្នាំ២០១៨
នាព្រឹកនេះ អតីតមេដឹកនាំគណបក្សជំទាស់ ឯកឧត្តម កឹម សុខា ដែលបានជាប់ពន្ធនាគារអស់រយៈពេលជាងមួយឆ្នាំដោយមិនទាន់មានការជំនុំជម្រះ ត្រូវបានចៅក្រមស៊ើបសួរសាលាដំបូងរាជធានីភ្នំពេញដាក់ឲ្យស្ថិតនៅក្រោមការត្រួតពិនិត្យតាមផ្លូវតុលាការ និងមិនត្រូវបានអនុញ្ញាតឲ្យចាកចេញពីបរិវេណជុំវិញគេហដ្ឋានរបស់លោក។
ដីការបស់តុលាការដែលបានចុះហត្ថលេខាដោយចៅក្រមស៊ើបសួរ លោក គី ឬទ្ធី បានសម្រេចដោះលែងឯកឧត្តម កឹម សុខា ឲ្យនៅក្រៅឃុំបណ្តោះអាសន្ន ប៉ុន្តែដីកានោះបានចែងថា លោកមិនត្រូវបានអនុញ្ញាតឲ្យអាចចាកចេញពីតំបន់ដែលស្ថិតនៅជុំវិញផ្ទះរបស់លោកក្នុងរាជធានីភ្នំពេញបានឡើយ។ លក្ខខណ្ឌផ្សេងៗ និងការរឹតត្បិត ដែលមិនធ្លាប់មានពីមុនមក ក៏ត្រូវបានតុលាការយកមកប្រើប្រាស់លើករណីរបស់លោកផងដែរ។
មេដឹកនាំដែលមានវ័យ ៦៥ឆ្នាំ របស់គណបក្សសង្រ្គោះជាតិដែលត្រូវបានរំលាយរូបនេះ ត្រូវបានហាមឃាត់ ដោយមិនឲ្យជួបជាមួយនឹងអតីតសមាជិករបស់គណបក្សសង្គ្រោះជាតិ និងបុគ្គលដែលពាក់ព័ន្ធនឹងសំណុំរឿងរបស់លោក ឬ ជនបរទេស ជាពិសេសជនបរទេសដែលពាក់ព័ន្ធនឹងសំណុំរឿងរបស់លោក និងមិនត្រូវធ្វើសកម្មភាពជួបជុំក្នុងគោលដៅនយោបាយ ឬសកម្មភាពនយោបាយផ្សេងទៀតឡើយ។
អំឡុងពេលសវនាការសុំនៅក្រៅឃុំរបស់តុលាការកំពូលកាលពីខែមុន ចៅក្រមជំនុំជម្រះ លោក គង់ ស្រ៊ីម បានបដិសេធសំណើរបស់មេធាវីការពារក្តីដែលបានលើកឡើងថា ឯកឧត្តម កឹម សុខា ចាំបាច់ត្រូវទទួលការព្យាបាល ដែលការព្យាបាលនេះមិនអាចមាន នៅក្នុងពន្ធនាគារដែលនៅឆ្ងាយដាច់ស្រយាល ដូចជាពន្ធនាគារ ម៣នោះទេ ហើយចៅក្រមបានលើកឡើងថា ការបដិសេធសំណើរសុំនៅក្រៅឃុំ គឺ “សមហេតុផល” ដើម្បី “ធានាសុវត្ថិភាព និងស្ថេរភាព”។
ឯកឧត្តម កឹម សុខា ត្រូវបានឃុំខ្លួនចាប់តាំងពីថ្ងៃទី៣ ខែកញ្ញា ឆ្នាំ២០១៧ និងត្រូវបានចោទពីបទក្បត់ជាតិ ដែលមានចែងក្នុងមាត្រា ៤៤៣ នៃក្រមព្រហ្មទណ្ឌ ស្តីពី “បទសន្ទិដ្ឋិភាពជាមួយបរទេស”។ តាមមតិជាតិ និងអន្តរជាតិ មិនមានភស្តុតាងគួរឲ្យអាចជឿជាក់បានណាមួយ ត្រូវបានបង្ហាញជាសាធារណៈនោះឡើយ។
គណបក្សសង្គ្រោះជាតិ ត្រូវបានរំលាយដោយតុលាការកំពូល កាលពីខែតុលា ឆ្នាំ២០១៧ តាមសំណើររបស់រាជរដ្ឋាភិបាល ដោយប្រើប្រាស់ច្បាប់ស្តីពីគណបក្សនយោបាយ ដែលទើបនឹងអនុម័តនាពេលថ្មីៗនេះ។
- ចំណងជើង & មូលបទ
- តុលាការ និងនីតិរដ្ឋ កឹម សុខា
