នគរបាលបានហាមឃាត់ ដោយមិនឲ្យបើកវគ្គបណ្តុះបណ្តាលអំពីការចិញ្ចឹមមាន់នៅខេត្តស្វាយរៀង
ចេញផ្សាយ ថ្ងៃទី១៧ ខែកញ្ញា ឆ្នាំ២០១៨នគរបាលនៅខេត្តស្វាយរៀង បានបិទវគ្គបណ្តុះបណ្តាលស្តីពីរបៀបចិញ្ចឹមមាន់បែបធម្មជាតិ ដែលត្រូវបានធ្វើឡើងដោយសមាគមកសិករក្នុងស្រុកមួយ នៅព្រឹកថ្ងៃច័ន្ទនេះ ដោយបានអះអាងថា ការរៀបចំនេះ មិនទាន់ត្រូវបានអនុញ្ញាតដោយអាជ្ញាធរក្នុងតំបន់។
សម្ព័ន្ធសហគមន៍កសិករកម្ពុជា (CCFC) បានរៀបចំនូវវគ្គបណ្តុះបណ្តាលមួយស្តីពីរបៀបចិញ្ចឹមមាន់តាមបែបធម្មជាតិ ដល់កសិករចំនួន ៣០គ្រួសារ នៅក្នុងស្រុករមាសហែក ហើយបានអះអាងថាខាងសមាគមបានជូនដំណឹងយ៉ាងត្រឹមត្រូវទៅដល់អាជ្ញាធរភូមិ និងឃុំរួចហើយ។
គិតត្រឹមឆ្នាំមុន នគរបាល បានបិទ ឬហាមឃាត់យ៉ាងតិច ការប្រមូលផ្តុំគ្នាដែលត្រូវបានរៀបចំឡើងដោយសម្ព័ន្ធសហគមន៍កសិករកម្ពុជា ចំនួន ៦ដងរួចមកហើយ ដែលរួមមានការរៀបចំវគ្គសិក្ខាសាលាបណ្តុះបណ្តាល វេទិកាអភិវឌ្ឍសហគមន៍ និងការប្រារព្ធទិវាអន្តរជាតិសិទិ្ធនារី ដោយបានអះអាងថាខាងសមាគមនេះ មិនបានទទួលការអនុញ្ញាតពីអាជ្ញាធរ។ ចំណែកលើកនេះ គឺជាលើកទីពីរហើយ ដែលវគ្គបណ្តុះបណ្តាលអំពីរបៀបចិញ្ចឹមមាន់ ត្រូវបានអាជ្ញាធររារាំង នៅក្នុងស្រុករមាសហែក។
សមាគមសម្ព័ន្ធសហគមន៍កសិករកម្ពុជា គាំទ្រកិច្ចប្រឹងប្រែងរបស់កសិករ ក្នុងការធ្វើឲ្យប្រសើរឡើងនូវជីវភាពរស់នៅរបស់កសិករទាំងនោះ និងការតស៊ូមតិនានារបស់អ្នកទាំងនោះ ដើម្បីផលប្រយោជន៍របស់ពួកគេ ប៉ុន្តែវគ្គបណ្តុះបណ្តាលរបស់សមាគមនេះ បែរជាតែងតែត្រូវបានរំខាន និងបិទ ដែលជាផ្នែកមួយនៃការគៀបសង្កត់លើអង្គការសង្គមស៊ីវិល។ នៅខែមិនា នគរបាល បានសាកសួរបុគ្គលិកសមាគមនេះ នៅក្នុងខេត្តតាកែវ ដោយចោទថាជាប់ពាក់ព័ន្ធនឹងចលនាសង្គ្រោះជាតិ ដែលជាក្រុមមួយត្រូវបានបង្កើតឡើងដោយសមាជិកអតីតគណបក្សសង្គ្រោះជាតិនិរទេសខ្លួននៅក្រៅប្រទេស។ កាលពីខែមេសា អត្ថបទវិចារណកថាមួយ ដែលត្រូវបានចេញផ្សាយនៅក្នុងសារព័ត៌មានហ្វ្រេសញូរ មាននិន្នាការគាំទ្ររដ្ឋាភិបាល បានចោទប្រកាន់សមាគមនេះ និងប្រធានរបស់សមាគម លោក ថេង សាវឿន ពីការរៀបចំឲ្យមានសកម្មភាព “បដិវត្តពណ៌”។