ពលរដ្ឋសហគមន៍បុរីកីឡា ប្រារព្ធខួបនៃការបណ្តេញចេញដោយបង្ខំកាលពីឆ្នាំ ២០១២
ចេញផ្សាយ ថ្ងៃទី៣ ខែមករា ឆ្នាំ២០១៩នាព្រឹកថ្ងៃនេះ ពលរដ្ឋសហគមន៍បុរីកីឡា បានប្រារព្ធខួប ៧ ឆ្នាំ នៃការបណ្តេញចេញដោយបង្ខំ និងហិង្សា ដែលបានកើតមានឡើងកាលឆ្នាំ ២០១២ ដើម្បីធ្វើការអនុវត្តនូវគម្រោងអភិវឌ្ឍទីក្រុងរបស់អ្នកជំនួញជាស្ត្រីដែលមានឥទ្ធិពលម្នាក់។
ពលរដ្ឋ និងក្រុមសង្គមស៊ីវិល ប្រមាណ ៤០ នាក់ បានប្រមូលផ្តុំគ្នានៅក្នុងសហគមន៍បុរីកីឡា ដើម្បីប្រារព្ធពិធីសាសនា និងថ្លែងទៅកាន់អ្នកសារព័ត៌មាន អំពីការបណ្តេញចេញដោយបង្ខំ និងសិទិ្ធដីធ្លីរបស់អ្នកទាំងនោះ។ ប៉ុន្តែក៏មានវត្តមានរបស់នគរបាលប្រមាណ ១០ នាក់ ដើម្បីឃ្លាំមើលការប្រារព្ធពិធីនៅទីតាំងនោះផងដែរ ហើយនិងបានហាមឃាត់ពលរដ្ឋសហគមន៍ ដោយមិនឲ្យមានការព្យួរ ឬកាន់បដាអ្វីទាំងអស់។
កាលពីថ្ងៃទី៣ ខែមករា ឆ្នាំ២០១២ ពលរដ្ឋសហគមន៍បុរីកីឡា ត្រូវបានអាជ្ញាធរបណ្តេញចេញដោយបង្ខំពីទីតាំងសហគមន៍របស់អ្នកទាំងនោះ នៅពេលក្រុមហ៊ុន ផាន អ៊ីមិច ដែលគ្រប់គ្រងដោយអ្នកស្រី ស៊ុយ សុផាន បានឈូសឆាយផ្ទះសំបែងរបស់អ្នកទាំងនោះ ដោយមិនបានជូនដំណឹងជាមុន និងមានការជួយពីកងកម្លាំងប្រដាប់អាវុធជាច្រើន។
ក្រុមហ៊ុន ផាន អ៊ីមិច បានទទួលដីសម្បទាននៅទីតាំងនោះ ដោយមានកិច្ចសន្យាថា នឹងត្រូវសាងសង់អាគារចំនួន ១០ នៅលើទីតាំងនោះ ដើម្បីអភិវឌ្ឍនៅនឹងកន្លែងជូនពលរដ្ឋបុរីកីឡា ហើយដីដែលនៅសល់ចំនួន ២,៦ ហិកតា នឹងត្រូវបានអភិវឌ្ឍដោយក្រុមហ៊ុន។ ប៉ុន្តែ នៅឆ្នាំ ២០១០ ក្រុមហ៊ុន បានរំលោភកិច្ចសន្យា បន្ទាប់ពីបានសាងសង់អាគារទី ៨ ដោយធ្វើឲ្យពលរដ្ឋចំនួន ៣០០ គ្រួសារ មិនទាន់បានទទួលផ្ទះសំបែង។
នៅខណៈដែលពលរដ្ឋជាច្រើនគ្រួសារ បានផ្លាស់ទីលំនៅទៅកាន់ទីតាំងថ្មីនៅក្រៅរាជធានី ដែលខ្វះខាតហេដ្ឋារចនាសម្ព័ន្ធមូលដ្ឋាន មានពលរដ្ឋមួយចំនួន បានត្រលប់មករស់នៅលើទីតាំងចាស់ក្នុងសហគមន៍បុរីកីឡា នៅក្នុងស្ថានភាពយ៉ាងលំបាក និងទាមទារឲ្យមាននូវសំណងសមរម្យមួយពីការបណ្តេញអ្នកទាំងនោះចេញដោយបង្ខំ។