ក្រុមប្រឹក្សាធម្មនុញ្ញប្រកាសថាច្បាប់ស្តីពីតុលាការទាំងបី គឺស្របនឹងរដ្ឋធម្មនុញ្ញ
ចេញផ្សាយ ថ្ងៃទី៤ ខែកក្កដា ឆ្នាំ២០១៤
នាថ្ងៃនេះ ក្រុមប្រឹក្សាធម្មនុញ្ញបានសម្រេចថាច្បាប់ទាំងបីថ្មី នៃតុលាការ គឺច្បាប់ស្តីពីការរៀបចំ និងប្រព្រឹត្តិទៅនៃតុលាការ ច្បាប់ស្តីពីការរៀបចំ និងប្រព្រឹតិ្តទៅនៃឧត្តមក្រុមប្រឹក្សានៃអង្គចៅក្រម និងច្បាប់ស្តីពីលក្ខន្តិកៈចៅក្រម និងព្រះរាជអាជ្ញា មានភាពស្របនឹងរដ្ឋធម្មនុញ្ញកម្ពុជា ហើយអាចចូលជាធរមានបន្ទាប់ពីមានការឡាយព្រះហត្ថលេខារបស់ព្រះមហាក្សត្រ។
នៅក្នុងសេចក្តីថ្លែងការណ៍ដែលត្រូវបានចេញផ្សាយកាលពីខែមុន អង្គការ លីកាដូ បានស្នើសុំដល់ក្រុមប្រឹក្សាធម្មនុញ្ញ សូមលោកមេត្តាបដិសេធនូវច្បាប់ទាំងបី នៅពេលច្បាប់ទាំងនោះនៅជាសេចក្តីព្រាង ព្រោះច្បាប់ទាំងនោះមិនបានស្របតាមរដ្ឋធម្មនុញ្ញនោះទេ។ នៅខណៈដែលរដ្ឋធម្មនុញ្ញបានបញ្ញត្តថាតុលាការត្រូវតែជាស្ថាប័នឯករាជ្យ ច្បាប់ទាំងបីមិនត្រូវបានបញ្ញត្តឆ្លើយតបទៅតាមល័ក្ខខ័ណ្ឌនោះទេ ប៉ុន្តែត្រូវបានធ្វើឲ្យស្របច្បាប់ដោយមិនត្រឹមត្រូវ ដែលក្លាយជាមូលដ្ឋានរបស់រាជរដ្ឋាភិបាលក្នុងការគ្រប់គ្រងប្រព័ន្ធតុលាការ និងចៅក្រមទៅវិញ។។
ច្បាប់ទាំងបី ត្រូវបានអនុម័តកាលពីដើមឆ្នាំនេះ ដោយរដ្ឋសភាជាតិ និងព្រឹទ្ធសភាជាតិ។ មិនមានការប្រឹក្សាជាសាធារណៈ ត្រូវបានធ្វើឡើងលើសេចក្តីព្រាងច្បាប់ទាំងបីនោះទេ ហើយជាលទ្ធផលនៃការធ្វើពហិការក្នុងការចូលសភារបស់សមាជិកសភាគណបក្សជំទាស់ជិតមួយឆ្នាំនេះ ធ្វើច្បាប់ទាំងបីនេះរឹតតែត្រូវបានអនុម័តដោយមិនមានការពិនិត្យពីភាពស្របច្បាប់ឲ្យបានដិតដល់ត្រឹមត្រូវថែមទៀត។
- ឯកសារទាក់ទង
- ចំណងជើង & មូលបទ
- តុលាការ និងនីតិរដ្ឋ ច្បាប់ ឬបទប្បញ្ញត្តិ
