បញ្ឈប់ការធ្វើទុក្ខបុកម្នេញ គំរាមកំហែង និងផ្ដល់ការកាន់កាប់ដីធ្លីស្របច្បាប់ជូនប្រជាសហគមន៍សំរោងត្បូង
ចេញផ្សាយ ថ្ងៃទី២៥ ខែមករា ឆ្នាំ២០២៤; ក្រុមសង្គមស៊ីវិលយើងខ្ញុំជាក្រុមសង្គមស៊ីវិល ដែលរួមមានសមាគម អង្គការមិនមែនរដ្ឋាភិបាល និង សហគមន៍ មូលដ្ឋាន ដែលមានរាយនាមដូចខាងក្រោម មានការព្រួយបារម្ភ ចំពោះសន្តិសុខ សុវត្ថិភាពដីធ្លីរបស់ សហគមន៍សំរោងត្បូង យ៉ាងខ្លាំង នៅពេលដែលរាជរដ្ឋាភិបាលបានបន្តកាត់ផ្ទៃបឹងតាមោកក្នុងទំហំដ៏ច្រើនលើសលប់ ហើយសហគមន៍អាចនឹងត្រូវបានបណ្តេញចេញពីលំនៅឋានទាំងបង្ខំ។ រីឯអ្នកតំណាងសហគមន៍បន្តរងការចោទប្រកាន់ និងបណ្តឹងពីតុលាការ ដោយសារការការពារដីធ្លីផ្ទះសម្បែងរបស់ខ្លួន និងសិទិ្ធលំនៅឋានរបស់សមាជិកសហគមន៍ ។
ប្រជាសហគមន៍សំរោងត្បូង បានតាំងទីលំនៅតាំងពីឆ្នាំ១៩៩៦ រៀងមក ស្ថិតនៅភូមិសំរោងត្បូង សង្កាត់សំរោង ខណ្ឌព្រែកព្នៅ រាជធានីភ្នំពេញ ដែលបច្ចុប្បន្នមាន ៧៦ខ្នងផ្ទះ។ អនុក្រឹត្យរបស់រាជរដ្ឋាភិបាល លេខ ២០ អនក្រ.បក ចុះថ្ងៃទី០៣ ខែកុម្ភៈ ឆ្នាំ២០១៦ បានបង្ហាញថា សហគមន៍សំរោងត្បូង មិនស្ថិតនៅក្នុងអនុក្រឹត្យនៃការកំណត់ផ្ទៃបឹងនេះទេ ហើយក៏មិនប៉ះពាល់ដល់ការពង្រីកផ្លូវទាំងស្រុងនោះដែរ(សូមមើលផែនទីនៃឧបសម្ព័ន្ធ ផែនទី ទី ៣)។
ខណៈពេលដែលដីសហគមន៍មិនស្ថិតក្នុងផ្ទៃបឹងតាមោកដែលកំណត់ផ្លូវការ ក៏មិនប៉ះពាល់ដល់ការពង្រីកផ្លូវ ហើយពួកគាត់បានតាំងទីលំនៅ កាន់កាប់ និង អាស្រ័យផលដីនេះតាំងពីយូរណាស់មកហើយ ស្ថានភាពនេះ ពិតជាសមហេតុផល ដែលប្រជាសហគមន៍សំរោងត្បូង គួរតែទទួលបានការអភិវឌ្ឍនៅនឹងកន្លែង ដូចដែលអាជ្ញាធរបានអនុវត្តកន្លងមក នៅតាមសហគមន៍ទីក្រុងផ្សេងៗទៀត ដូចជាសហគមន៍នៅតាមបណ្តោយប្រឡាយស្ទឹងមានជ័យ ជាដើម ។ ពួកគាត់មិនគួរត្រូវបានអាជ្ញាធរគំរាមកំហែងឱ្យចាកចេញពីលំនៅឋានដូចបច្ចុប្បន្ននោះទេ។
ផ្ទុយពីស្ថានភាពរបស់សហគមន៍ រាជរដ្ឋាភិបាលបានបន្តកាត់ផ្ទៃបឹងជាបន្តបន្ទាប់ប្រគល់ឱ្យក្រុមហ៊ុន និងបុគ្គលឯកជនជាកម្មសិទ្ធិស្របច្បាប់ ចំនួន ៨០ លើក ដែលស្មើនឹង ៧៤,៩២% នៃផ្ទៃបឹង បើទោះបីជាពួកគេទាំងនេះមិនដែលធ្លាប់បានរស់នៅទីតាំងនោះទាល់តែសោះក៏ដោយ ។ ការអនុវត្តស្តង់ដារពីរខុសគ្នា បង្កើតបានជាអំពើអយុត្តិធម៌សង្គមយ៉ាងខ្លាំង ដែលធ្វើឱ្យសហគមន៍មានការឈឺចាប់ បាត់បង់មុខរបរ សេដ្ឋកិច្ចធ្លាក់ចុះនិងជំពាក់បំណុល ធ្វើចំណាកស្រុក ព្រាត់ប្រាស់គ្រួសារ និងទទួលរងបណ្តឹងព្រហ្មទណ្ឌដោយសារការការពារដីខ្លួនឯងជាដើម។ តាំងពីឆ្នាំ២០២១ ដល់ ២០២៣ មានសមាជិកចំនួន ១៨នាក់ កំពុងរងបណ្តឹងពីតុលាការក្រោមបទចោទ ហិង្សាដោយចេតនា និងប្រឆាំងនឹងអ្នករាជការសាធារណៈមានស្ថានទម្ងន់ទោស និងក្នុងឆ្នាំ២០២៣ មានសមាជិក ១នាក់ បានរត់គេចខ្លួនដោយព្រួយបារម្ភពីបញ្ហាសុវត្ថិភាព ។
តាំងពីឆ្នាំ២០១៩ សហគមន៍បានស្វែងរកកិច្ចអន្តរាគមន៍ ពីស្ថាប័នជាតិនានាដូចជា សាលាសង្កាត់សំរោងត្បូង សាលាខណ្ឌព្រែកព្នៅ សាលារាជធានីភ្នំពេញ ខុទ្ទកាល័យសម្តេចនាយករដ្ឋមន្ត្រី ព្រឹទ្ធសភា ក្រសួងរៀបចំដែនដីនគរូបនីយកម្ម និងសំណង់ជាដើម ប៉ុន្តែវាហាក់បីដូចគ្មានដំណោះស្រាយ និងអូសពេលវេលា ឱ្យចេះតែកន្លងហួសទៅ ។
ការបណ្តេញចេញដោយបង្ខំ គឺការរំលោភបំពានយ៉ាងធ្ងន់ធ្ងរលើច្បាប់សិទ្ធិមនុស្ស ជាពិសេស រំលោភលើសិទ្ធិទទួលបានលំនៅឋានសមរម្យ និងសិទ្ធិជាច្រើនផ្សេងទៀត ។ ការបណ្តេញចេញដោយបង្ខំបានបង្កើនវិសមភាពដែលមានស្រាប់ហើយនោះ រិតតែប៉ះពាល់ដល់សហគមន៍ក្រីក្រ និងសហគមន៍ងាយរងគ្រោះ ដោយរុញច្រានសហគមន៍ទាំងនោះឱ្យកាន់តែក្រីក្របន្ថែមទៀត។
យើងខ្ញុំ សូមអំពាវនាវ ឱ្យអាជ្ញាធររដ្ឋបញ្ឈប់ជាបន្ទាន់នូវការធ្វើទុក្ខបុកម្នេញ និង គំរាមកំហែង តាមគ្រប់រូបភាពមកលើអ្នកតំណាង និងសមាជិកសហគមន៍សំរោងត្បូង ជាពិសេសស្នើសុំដល់តុលាការ សូមមេត្តាទំលាក់ចោលបទចោទប្រកាន់មកលើអ្នកតំណាងសហគមន៍ទាំង ១៨ នាក់ ។ យើងខ្ញុំ ក៏ស្នើសុំដល់រាជរដ្ឋាភិបាល សូមផ្តល់កម្មសិទិ្ធដីធ្លីស្របច្បាប់ ក៏ដូចជាការអភិវឌ្ឍន៍នៅនឹងកន្លែង ជូនប្រជាសហគមន៍សំរោងត្បូង និងបញ្ឈប់ការបណ្តេញចេញដោយបង្ខំដោយមិនត្រឹមត្រូវ ។
សេចក្តីថ្លែងការណ៍នេះគាំទ្រដោយ៖
១. សហគមន៍ អណ្ដូងតាអៀង (ភ្នំពេញ)
២. សហគមន៍ បឹងឈូកមានជ័យថ្មី២ (ភ្នំពេញ)
៣. សហគមន៍ បឹងត្របែកភូមិបួន (ភ្នំពេញ)
៤. មជ្ឍមណ្ឌលសិទ្ធិមនុស្សកម្ពុជា (CCHR)
៥. សមាគមការពារសិទ្ធិមនុស្ស និងអភិវឌ្ឍន៍នៅកម្ពុជា (ADHOC)
៦. អង្គការសម្ព័ន្ធខ្មែរជំរឿន និងការពារសិទ្ធិមនុស្ស (LICADHO)
៧. សមាគមបណ្តាញយុវជនកម្ពុជា (CYN)
៨. មជ្ឍមណ្ឌលសម្ព័ន្ធភាពការងារ និង សិទ្ធមនុស្ស (CENTRAL)
៩. សហគមន៍ ចម្រើន (ភ្នំពេញ)
១០. សហគមន៍ ឆ្មាអើត (ភ្នំពេញ)
១១. គណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា (COMFREL)
១២. សមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA)
១៣. សហគមន៍ កៅពីរ (ភ្នំពេញ)
១៤. សហគមន៍ ឡពាង (កំពង់ឆ្នាំង)
១៥. សហគមន៍ មានជ័យ (ស្វាយរៀង)
១៦. សហគមន៍ ផ្លូវរថភ្លើង (ភ្នំពេញ)
១៧. សហគមន៍ ពង្រសែនជ័យ (ភ្នំពេញ)
១៨. សហគមន៍ ពង្រកជ័យល័ក្ខ (ភ្នំពេញ)
១៩. សហគមន៍ ព្រែកតាគង់បី (ភ្នំពេញ)
២០. សហគមន៍ ព្រែកតាគង់ ហុកសិបម៉ែត្រ (ភ្នំពេញ)
២១. សហគមន៍ ព្រៃឈើភូមិត្នោត (កំពត)
២២. សហគមន៍ ព្រៃពាយ (កំពត)
២៣. សហគមន៍ រស្មីសាមគ្គី (ភ្នំពេញ)
២៤. សហគមន៍ ឬស្សីស្រស់ (ភ្នំពេញ)
២៥. អង្គការសមាគមធាងត្នោត (STT)
២៦. សហគមន៍ សាមគ្គីចេកមាស (ស្វាយរៀង)
២៧. សហគមន៍ សាមគ្គីរមាសហែក (ស្វាយរៀង)
២៨. សហគមន៍ សែនរីករាយ (ភ្នំពេញ)
២៩. សហគមន៍ ស្មសាន្ត (ភ្នំពេញ)
៣០. សហគមន៍ ស្ទឹងកំបុត (ភ្នំពេញ)
៣១. សហគមន៍ ស្រ្ដីក្លាហាន (ភ្នំពេញ)
៣២. សហគមន៍ ស្រ្ដីឃ្លាំងសាំង (ភ្នំពេញ)
៣៣. សហគមន៍ ថ្លាន់មួយរយ (កំពត)
៣៤. សហគមន៍ ត្រពាំងរាំង (ភ្នំពេញ)
៣៥. សហគមន៍ ទំនប់តាថ្លាង (ភ្នំពេញ)
៣៦. សហគមន៍ វាលឥន្រ្ទី (កំពត)
៣៧. សហគមន៍ វាលស្បូវ (ភ្នំពេញ)
សម្រាប់ព័ត៌មានបន្ថែម សូមទាក់ទង៖
▪ លោក វណ្ណ សុផាត អ្នកសម្របសម្រួលគម្រោងធុរកិច្ច និងសិទ្ធិមនុស្ស, មជ្ឍមណ្ឌលសិទ្ធិមនុស្សកម្ពុជា (CCHR), លេខទំនាក់ទំនង៖ ០១២ ៩៤១ ២០៦
▪ លោក ស៊ាង មួយឡៃ ប្រធានកម្មវិធីសិទ្ធិក្នុងទីក្រុង, អង្គការសមាគមធាងត្នោត (STT), លេខទំនាក់ទំនង៖ ០១៦ ៨៩៩ ៤៦៥
PDF៖ ទាញយកសេចក្តីថ្លែងការណ៍ជាភាសាអង់គ្លេស - ទាញយកសេចក្តីថ្លែងការណ៍ជាភាសាខ្មែរ
MP3៖ ស្តាប់សំឡេងជាភាសាខ្មែរ