លិខិតពីតំណាងសង្គមស៊ីវិលនៅប្រទេសកម្ពុជា ទៅកាន់អគ្គលេខាធិការនៃអង្គការសហប្រជាជាតិ ឯកឧត្តម បាន គីមូន
ចេញផ្សាយ ខែវិច្ឆិកា ឆ្នាំ២០១០ មើលឯកសារនេះជាភាសាអង់គ្លេស (PDF, 30.2 KBs) |
យើងខ្ញុំ ជាអង្គការសង្គមស៊ីវិលដែលមានរាយនាមដូចខាងក្រោយ មានការព្រួយបារម្ភជាខ្លាំងចំពោះសំណើររបស់សម្តេចនាយករដ្ឋមន្ត្រី ហ៊ុន សែន កាលពីថ្ងៃទី២៧ ខែតុលា ឆ្នាំ២០១០ ក្នុងការដកលោក Christophe Peschoux ចេញពីតួនាទីជាអ្នកតំណាងប្រចាំប្រទេសសម្រាប់ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា (OHCHR) ហើយនិងការគម្រាមកំហែងរបស់សម្តេចនាយកក្នុងការបិទការិយាល័យនេះនៅក្នុងប្រទេសកម្ពុជា។
ចាប់តាំងពីការបង្កើតការិយាល័យនេះនាឆ្នាំ ១៩៩៣ ទៅតាមសន្ធិសញ្ញាសន្តិភាពទីក្រុងប៉ារីស ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា ហើយនិងបុគ្គលិករបស់ការិយាល័យ បានធ្វើការព្យាយាមអនុវត្តនូវភារកិច្ចរបស់ខ្លួនក្នុងការការពារ និងលើកកំពស់សិទិ្ធមនុស្ស ហើយនិងបានធ្វើការរួមចំណែកដ៏គួរឲ្យកត់សម្គាល់ទៅលើលទិ្ធប្រជាធិបតេយ្យ និងនីតិរដ្ឋនៅក្នុងប្រទេសកម្ពុជា។ នៅខែមករា ឆ្នាំ២០១០ អណត្តិរបស់ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា ត្រូវបានបន្តបន្ថែមចំនួន ពីរឆ្នាំ។ ការបន្តនេះ គឺធ្វើឡើងទៅតាមស្ថានភាពសិទិ្ធមនុស្សបច្ចុប្បន្ននៅក្នុងប្រទេសកម្ពុជា និងតម្រូវការសម្រាប់បន្តវត្តមានរបស់ការិយាល័យនេះនៅក្នុងប្រទេសកម្ពុជា ដែលជាកន្លែងដែលបញ្ហាពុករលួយ និងប្រព័ន្ធយុត្តាធិការដែលគ្រប់គ្រងដោយគណបក្សនយោបាយ បន្តធ្វើការរឹបអូសដីធ្លីយ៉ាងទូលំទូលាយពីប្រជាពលរដ្ឋក្រីក្រ និងក្រុមដែលគេមិនសូវយកចិត្តទុកដាក់ យកទៅឲ្យក្រុមអភិជននយោបាយ និងក្រុមហ៊ុនដីសម្បទានសេដ្ឋកិច្ចខ្នាតតូច ហើយធ្វើការចាប់អ្នកដែលហ៊ាននិយាយប្រឆាំងនឹងអ្នកមានលុយ និងអំណាច ដាក់ពន្ធនាគារ។