សហគមន៍ជាច្រើននៅទូទាំងប្រទេសប្រារព្ធទិវាសិទិ្ធមនុស្សអន្តរជាតិឆ្នាំ ២០២៣
ចេញផ្សាយ ថ្ងៃទី១០ ខែធ្នូ ឆ្នាំ២០២៣មានពលរដ្ឋយ៉ាងតិចណាស់ ៣.០០០ នាក់ មកពីទូទាំង ១២ ខេត្ត និងរាជធានីភ្នំពេញ ដែលរួមមានខេត្តបន្ទាយមានជ័យ សៀមរាប បាត់ដំបង កំពង់ឆ្នាំង កំពង់ធំ កំពង់ស្ពឺ កំពត កោះកុង ក្រចេះ ព្រះវិហារ ស្វាយរៀង ស្ទឹងត្រែង និងត្បូងឃ្មុំ បានចូលរួមប្រារព្ធទិវាសិទិ្ធមនុស្សអន្តរជាតិឆ្នាំ ២០២៣ នាសប្តាហ៍នេះ ។
ទិវាសិទិ្ធមនុស្សអន្តរជាតិ ត្រូវបានប្រារព្ធឡើងនៅថ្ងៃទី១០ ខែធ្នូ ជារៀងរាល់ឆ្នាំ ដើម្បីរំលឹកពីការអនុម័តសេចក្តីប្រកាសជាសាកលស្តីពីសិទិ្ធមនុស្ស ។ នាឆ្នាំនេះ គឺជាការប្រារព្ធទិវាសិទិ្ធមនុស្សអន្តរជាតិលើកទី ៧៥ ។
អ្នកចូលរួមជាច្រើននាក់ បានប្រមូលផ្តុំគ្នាដើម្បីប្រារព្ធទិវានេះ និងជាឱកាសក្នុងការលើកឡើងអំពីបញ្ហានានាពាក់ព័ន្ធនឹងសិទិ្ធមនុស្សរបស់ពួកគេ ឱ្យសាធារណជនបានដឹងលឺ ។ ការប្រារព្ធទិវាសិទិ្ធមនុស្សនេះ ត្រូវបានធ្វើឡើងជាលក្ខណៈសហគមន៍មូលដ្ឋាននៅតាមបណ្តាខេត្តចំនួន ១២ ។ ការប្រារព្ធជាលក្ខណៈការដើរក្បូន និងធម្មយាត្រា ចំនួន ២ ដោយការដើរធម្មយាត្រាចេញពីខេត្តសៀមរាប ត្រូវបានរៀបចំដោយក្រុមយុវជន ព្រះសង្ឃ តំណាងសហជីព និងតំណាងក្រុមសង្គមស៊ីវិល ហើយរីឯការដើរក្បួនមួយផ្សេងទៀត ត្រូវបានរៀបចំដោយក្រុមយុវជនចលនាមាតាធម្មជាតិ ចេញពីអតីតតំបន់បឹងកក់ ។ ការដើរក្បួនទាំងពីរបញ្ចប់នៅក្នុងទីលានប្រជាធិបតេយ្យនៅថ្ងៃទី១០ ខែធ្នូ ឆ្នាំ២០២៣ ជាកន្លែងដែលមានអ្នកចូលរួមជាច្រើននាក់ដែលជាសមាជិកក្រុមសង្គមស៊ីវិល តំណាងអង្គការមិនមែនរដ្ឋាភិបាលអន្តរជាតិ និងតំណាងនិងបុគ្គលិកស្ថានទូតមួយចំនួនចូលរួមផងដែរ ។ នៅក្នុងការប្រារព្ធទិវានេះ យ៉ាងតិចណាស់មានការរៀបចំប្រារព្ធទិវាចំនួនពីរកន្លែង ត្រូវបានរារាំង និងឃ្លាំមើលដោយអាជ្ញាធរមូលដ្ឋានមួយចំនួន ។
- ចំណងជើង & មូលបទ
- ទិវាសិទ្ធិមនុស្សអន្តរជាតិ