ទិវាចលនាពិភពលោក៖ កម្ពុជាបង្ហោះប៉ោងប៉ោងក្នុងភាពជាសាមគ្គីជាមួយអ្នកដែលត្រូវបានចាប់ខ្លួនទាំង ២៣
ចេញផ្សាយ ថ្ងៃទី១០ ខែកុម្ភៈ ឆ្នាំ២០១៤
ប្រជាជនកម្ពុជាទូទាំងប្រទេស និងប្រជាជននៅទូទាំងពិភពលោកបានធ្វើបាតុកម្មរួមគ្នាក្នុងលក្ខណៈសាមគ្គីភាព នាថ្ងៃនេះ ជាមួយអ្នកការពារសិទ្ធិមនុស្ស និងកម្មករទាំង ២៣នាក់ ដែលបានឃាត់ខ្លួនក្នុងអំឡុងពេលការប្រើប្រាស់អំពើហិង្សាលើកម្មកររោងចក្រកាលពីខែមុខ បានបណ្តាលឲ្យមានប្រជាពលរដ្ឋយ៉ាងតិចណាស់ ៤នាក់បានស្លាប់ ៣៨នាក់ត្រូវបានបញ្ជូនទៅកាន់មន្ទីរពេទ្យ ដែលក្នុងនោះមានអ្នករងរបួសដោយសារគ្រាប់កាំភ្លើងចំនួន ២៥នាក់។
នៅក្នុងប្រទេសកម្ពុជា សហជីព សមាគម និងសហគមន៍ជាច្រើន បានរៀបចំប៉ោងប៉ោងយ៉ាងតិចណាស់ចំនួន ៤០០ និងចាប់ផ្តើមបង្ហោះទូទាំងប្រទេស ពីការិយាល័យ សកលវិទ្យាល័យ វត្ត និងរោងចក្រជាច្រើនដែលរួមទាំងរោងចក្រដែលសិ្ថតនៅផ្លូវវ វេងស្រេង ជាកន្លែងដែលមានការបង្រ្កាប និងបណ្តាលឲ្យមានមនុស្សស្លាប់កាលពីដើមខែមករាកន្លងមក។ នាពេលថ្ងៃត្រង់ ក្រុមសហជីព សហគមន៍ និងសមាគមបានធ្វើការបង្ហោះប៉ោងប៉ោងតំណាលគ្នា ទាំងនៅរាជធានីភ្នំពេញ កំពង់សោម បាត់ដំបង សៀមរាប ប៉ោយប៉ែត និងខេត្តបន្ទាយមានជ័យ ដើម្បីអំពាវនាវសុំឲ្យដោះលែងអ្នកទាំង ២៣នាក់។
នៅថ្ងៃនេះ ការជួបជុំគ្នាជាច្រើនបានកើតឡើងនៅក្នុងរាជធានីភ្នំពេញ។ សកម្មជនដីធ្លីរាប់រយនាក់បានធ្វើការដាក់ញាតិដោយផ្ទាល់ទៅកាន់ក្រសួងយុត្តិធម៌ ហើយអង្គការសង្គមស៊ីវិលមានបំណងដាក់ញាតិជារួមទៅកាន់ស្ថានទូតវៀតណាម ប៉ុន្តែត្រូវបានបដិសេធមិនព្រមទទួល។ បន្ថែមពីនេះទៅទៀត អ្នកគាំទ្រសហជីពប្រមាណជា ១០០នាក់ និងព្រះសង្ឃ ២០អង្គ បានដឹកនាំក្បួនដង្ហែរទៅកាន់ព្រះអង្គដងកើ នៅមុខព្រះបរមរាជវាំងដើម្បីធ្វើការបង្ហោះប៉ោងប៉ោង។ ក្បួនដង្ហែរនេះក៏បានធ្វើដំណើរឆ្លងកាត់សាលាឧទ្ធរណ៍ ជាកន្លែងដែលអ្នកទាំង ២១នាក់នឹងឡើងសវនាការសុំនៅក្រៅឃុំជាបណ្តោះអាសន្ននាថ្ងៃស្អែក។ ពួកគេធ្វើការតស៊ូមតិដើម្បីទាមទារសុំឲ្យដោះលែងអ្នកទាំង ២៣នាក់ និងប្រាក់ខែអប្បបរមា ១៦០ដុល្លា ក្នុងមួយខែសម្រាប់កម្មកររោងចក្រ។
សកម្មភាពនៅក្នុងប្រទេសទាំងឡាយនេះ បានកើតឡើងតំណាលគ្នាទូទាំងពិភពលោកនៅថ្ងៃនេះ នៅក្នុងទិវាចលនាពិភពលោកសម្រាប់អ្នកការពារសិទ្ធិមនុស្ស និងកម្មករ ដែលត្រូវបានឃុំខ្លួន ដោយត្រូវបានរៀបចំឡើងដោយសហជីពអន្តរជាតិ IndustriALL សហជីពសាកលលោក (Global Union) និងសហព័ន្ធសហជីពពិភពលោក (ITUC)។ រហូតមកដល់ពេលនេះ ក្រុមអ្នកប្រើប្រាស់ និងសកម្មជនជាច្រើនបានធ្វើបាតុកម្មរួមគ្នា នៅមុខស្ថានទូតកម្ពុជាប្រចាំនៅទីក្រុង សេអ៊ូល ហុងកុង និងម៉ានីឡា ហើយបាតុករជាច្រើនទៀតបានរៀបចំគម្រោងធ្វើបាតុកម្មនាថ្ងៃនេះ ក្នុងទីក្រុងបាងកក ទីក្រុងកូឡាឡាំងពួ ទីក្រុងកង់បេរ៉ា ទីក្រុងប៊ែកឡាំង ទីក្រុងព្រុចសែល ទីក្រុងសឺណែវ ទីក្រុងចាកាតា និងទីក្រុងឡុងដ៍។
- ចំណងជើង & មូលបទ
- សិទិ្ធបញ្ចេញមតិ និងចូលរួម
