តុលាការកំពូលតំកល់ការផ្តន្ទាទោសលោក សុន ឆ័យ ពាក់ព័ន្ធនឹងការរិះគន់លើការបោះឆ្នោតជ្រើសរើសក្រុមប្រឹក្សាឃុំសង្កាត់
ចេញផ្សាយ ថ្ងៃទី២៣ ខែកុម្ភៈ ឆ្នាំ២០២៣
នាព្រឹកនេះ តុលាការកំពូលបានសម្រេចតំកល់សេចក្តីសម្រេចផ្តន្ទាទោសអនុប្រធានគណបក្សភ្លើងទៀន លោក សុន ឆ័យ ពីបទបរិហាកេរ្តិ៍ជាសាធារណៈ ពាក់ព័ន្ធនឹងបណ្តឹងចំនួនពីរ ដែលមួយត្រូវបានប្តឹងដោយគណបក្សប្រជាជនកម្ពុជា និងមួយទៀតដោយគណកម្មាធិការជាតិរៀបចំការបោះឆ្នោត អំពីការណ៍ដែលលោករិះគន់ជាសាធារណៈទៅលើដំណើរការនៃការបោះឆ្នោតជ្រើសរើសក្រុមប្រឹក្សាឃុំសង្កាត់ ។
លោក សុន ឆ័យ ត្រូវបានតុលាការបង្គាប់ឱ្យសងជំងឺចិត្តជាប្រាក់ចំនួន ៤ ពាន់លានរៀល (ប្រហែល១លានដុល្លារអាមេរិក) ទៅគណបក្សប្រជាជនកម្ពុជា និងរងពិន័យពីរផ្សេងទៀតដែលសរុបចំនួន ២០ លានរៀល (ប្រហែល ៥.០០០ ដុល្លារ) ដូចនឹងសេចក្តីសម្រេចរបស់សាលាឧទ្ធរណ៍កាលពីខែធ្នូ ឆ្នាំ២០២២ ។ អចលនទ្រព្យចំនួនពីរកន្លែងរបស់លោក ត្រូវបានសាលាដំបូងរាជធានីភ្នំពេញដីការក្សាការពារ (បង្កកទុក) ចាប់តាំងពីខែវិច្ឆិកា ដើម្បីរារាំងលោកពីការលក់ ឬផ្ទេរកម្មសិទិ្ធទៅអ្នកដទៃ តាមរយៈសំណើរបស់គណបក្សប្រជាជនកម្ពុជា ។
លោក សុន ឆ័យ ត្រូវបានចោទប្រកាន់ពីបទបរិហាកេរ្តិ៍ជាសាធារណៈ យោងតាមមាត្រា ៣០៥ នៃក្រមព្រហ្មទណ្ឌ កាលពីខែសីហា ឆ្នាំ២០២២ តាមរយៈបណ្តឹងរបស់គណបក្សប្រជាជនកម្ពុជាកាលពីខែមិថុនា និងបណ្តឹងរបស់គណៈកម្មធិការជាតិរៀបចំការបោះឆ្នោតប៉ុន្មានថ្ងៃក្រោយបណ្តឹងរបស់គណបក្សប្រជាជនកម្ពុជា ។ បណ្តឹងទាំងពីរបានលើកឡើងថា លោក សុន ឆ័យ ធ្វើឱ្យខូចខាតនូវកិត្តិយសរបស់ពួកគេ ក្រោយពេលដែលលោកបានអះអាងតាមរយៈកិច្ចសម្ភាសន៍ជាមួយអ្នកសារព័ត៌មានថាការបោះឆ្នោត គឺមានភាពមិនប្រក្រតីមួយចំនួន ដូចជាការគម្រាមកំហែង ការទិញសន្លឹកឆ្នោត និងការលួចសន្លឹកឆ្នោត ។
លោក សុន ឆ័យ ត្រូវបានផ្តន្ទាទោសដោយសាលាដំបូងរាជធានីភ្នំពេញកាលពីខែតុលា ឆ្នាំ២០២២ ដោយពិន័យជាប្រាក់ចំនួន ៨ លានរៀល (ប្រហែល ២.០០០ ដុល្លារ) ពាក់ព័ន្ធនឹងបណ្តឹងរបស់គណបក្សប្រជាជនកម្ពុជា និង៩ លានរៀល (ប្រហែល ២.២៥០ ដុល្លារ) ពាក់ព័ន្ធនឹងបណ្តឹងរបស់គណៈកម្មាធិការជាតិរៀបចំការបោះឆ្នោត ហើយនិងបង្គាប់ឱ្យសងជំងឺចិត្តទៅគណបក្សប្រជាជនកម្ពុជាចំនួន ៣ ពាន់លានរៀល (ប្រហែល ៧៥០.០០០ ដុល្លារ) ។ ដោយឡែក សាលាឧទ្ធរណ៍បានបង្កើនការពិន័យជាប្រាក់ទាំងពីរនេះ ដោយការពិន័យនីមួយៗបានកើនឡើងរហូតដល់ ១០ លានរៀល (ប្រហែល ២.៥០០ ដុល្លារ) និងប្រាក់ជំងឺចិត្តបានកើនដល់ ៤ ពាន់លានរៀល (ប្រហែល ១ លាន ដុល្លារ) កាលពីខែធ្នូ ។
អ្នកសង្កេតការណ៍ឯករាជ្យមួយចំនួន រួមមាន បណ្ដាញអាស៊ានដើម្បីការបោះឆ្នោតដោយសេរី (ANFREL) និងគណៈកម្មាធិការ ដើម្បីការបោះឆ្នោត ដោយសេរី និងយុត្តិធម៌ នៅកម្ពុជា (ខុមហ្វ្រែល) បានរាយការណ៍ជាសាធារណៈអំពីការរកឃើញភាពមិនប្រក្រតីនៅមុនពេល អំឡុងពេល និងក្រោយពេលបោះឆ្នោត ។
ការផ្តន្ទាទោសលោក សុន ឆ័យ ត្រូវបានធ្វើឡើងស្របពេលដែលសហការីរបស់លោក គឺលោក ថាច់ សេដ្ឋា ដែលជាអនុប្រធានគណបក្សភ្លើងទៀន ត្រូវបានអាជ្ញាធរចាប់ដាក់ពន្ធនាគារកាលពីខែមករា ឆ្នាំ២០២៣ ពាក់ព័ន្ធនឹងសំណុំរឿងកាលពីមួយឆ្នាំមុនអំពីការចេញសែកក្លែងក្លាយ ។ នៅក្នុងខែមករាដដែល មន្ត្រីជាន់ខ្ពស់ម្នាក់របស់គណបក្សភ្លើងទៀន លោក គង់ គាំ បានសម្រេចប្រគល់ផ្ទះរបស់លោកជូនរាជរដ្ឋាភិបាល និងលាឈប់ពីគណបក្សជំទាស់ ក្រោយពេលរងបណ្តឹងពីគណបក្សប្រជាជនកម្ពុជា ដែលក្រោយមកបណ្តឹងនោះត្រូវបានដកវិញក្រោយពេលលោកលាឈប់ពីគណបក្សជំទាស់ ។
MP3 format: ស្តាប់សំឡេងជាភាសាខ្មែរ
- ចំណងជើង & មូលបទ
- ការបោះឆ្នោត
