សកម្មជនប្រាំនាក់ត្រូវបានឃាត់ខ្លួន បន្ទាប់ពីបានចែកខិតប័ណ្ឌជំទាស់នឹងច្បាប់សហជីព សមាគមនិងអង្គការ
ចេញផ្សាយ ថ្ងៃទី១៨ ខែកក្កដា ឆ្នាំ២០១៥ឥឡូវនេះស្ត្រីប្រាំនាក់ ត្រូវបានឃាត់ខ្លួននៅអធិការដ្ឋាននគរបាលខណ្ឌ ៧មករា បន្ទាប់ពីត្រូវបានឃាត់ខ្លួនអំឡុងពេលធ្វើការដើរក្បួនចែកខិតប័ណ្ឌជំទាស់នឹងសេចក្តីព្រាងច្បាប់សហជីព សមាគមនិងអង្គការ នាព្រឹកនេះ។ ការដើរក្បួននេះ បានចាប់ផ្តើមនៅម៉ោង ៨ កន្លះព្រឹក នៅផ្សាររាត្រីក្នុងរាជធានីភ្នំពេញ ដោយមានពលរដ្ឋប្រមាណ ៥០នាក់ បានប្រមូលផ្តុំគ្នា ហើយចែកសារដែលសរសេរថា “សូមនិយាយថាទេ! ចំពោះច្បាប់សហជីព សមាគម និងអង្គការ” និងលិខិតដែលនិយាយពីផលវិបាកនៃច្បាប់នេះ នៅតាមបណ្តាផ្សារសំខាន់ៗក្នុងរាជធានី។ ភ្លាមៗក្រោយម៉ោង ១០ ព្រឹកបន្តិច នៅពេលដែលក្រុមដើរក្បួន បានមកដល់ផ្សារអូរប្ញស្សី កងសន្តិសុខ និងនគរបាលជាច្រើន បានមកដល់ ហើយរារាំងអ្នកទាំងនោះពីការដើរទៅមុខបន្តទៀត។ បន្ទាប់មកអាជ្ញាធរទាំងនោះបានចាប់ស្ត្រីចំនួន ៥នាក់ ដោយ ៤នាក់ គឺជាសកម្មជនសិទិ្ធដីធ្លីមកពីតំបន់បឹងកក់ និងម្នាក់ទៀតជាសកម្មជនមកពីតំបន់បុរីកីឡា។ បន្ទាប់ពីត្រូវបានឃាត់ខ្លួននៅបុស្តិ៍នគរបាលសង្កាត់អូរប្ញស្សីទី២ អស់រយៈពេល ២ម៉ោង ក្រុមពលរដ្ឋទាំងនោះ ត្រូវបានអមដំណើរបញ្ជូនទៅកាន់អធិការរដ្ឋាននគរបាលខណ្ឌ ៧មករា។ អ្នកទាំងនោះ ត្រូវបានប្រាប់ថាពួកគេត្រូវរង់ចាំលោកអភិបាលរាជធានី លោក ប៉ា សុជាតិវង្ស មកដល់។ សកម្មជន និងបុគ្គលិកអង្គការមិនមែនរដ្ឋាភិបាលប្រមាណ ១០នាក់ផ្សេងទៀត កំពុងរង់ចាំអ្នកទាំងនោះ។ ពួកគេត្រូវបានឃាត់ខ្លួនអស់រយៈពេលជាង ៤ម៉ោង។
- ឯកសារទាក់ទង
- ចំណងជើង & មូលបទ
- តុលាការ និងនីតិរដ្ឋ សិទិ្ធបញ្ចេញមតិ និងចូលរួម ច្បាប់ ឬបទប្បញ្ញត្តិ