សេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាល ត្រូវបានផ្តល់ការយល់ព្រមដោយព្រឹទ្ធសភា ខណៈមានការតវ៉ាជំទាស់នៅបន្ត
ចេញផ្សាយ ថ្ងៃទី២៤ ខែកក្កដា ឆ្នាំ២០១៥សេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាល ដែលត្រូវបានរិះគន់ជាសាធារណៈ ត្រូវបានផ្តល់ការយល់ព្រមដោយព្រឹទ្ធសភានាម៉ោងប្រហែល ១០ ព្រឹកនេះ នៅពេលដែលព្រះសង្ឃ/ប្រជាពលរដ្ឋប្រមាណជាង ៤០០ អង្គ/នាក់ មកពីក្រុមពលរដ្ឋមូលដ្ឋាន សហជីព បណ្តាញព្រះសង្ឃ និងសមាគមផ្សេងទៀត កំពុងតវ៉ាជំទាស់នឹងសេចក្តីព្រាងច្បាប់នេះនៅខាងក្រៅវិមានព្រឹទ្ធសភា។
នៅខណៈដែលមានការរិះគន់ជាសាធារណៈទាំងក្នុងស្រុក និងអន្តរជាតិ ដែលរួមមានការតវ៉ាជាច្រើនខែទូទាំងប្រទេសជំទាស់នឹងច្បាប់នេះ សមាជិកព្រឹទ្ធសភាមកពីគណបក្សកាន់អំណាច បានបោះឆ្នោតយល់ព្រមលើសេចក្តីព្រាងច្បាប់នេះ ដែលសេចក្តីព្រាងច្បាប់នេះត្រូវបានអនុម័តដោយរដ្ឋសភាកាលពីថ្ងៃទី១៣ ខែកក្កដា។ សមាជិកព្រឹទ្ធសភាមកពីគណបក្សសមរង្ស៊ីទាំង ១១នាក់ បានធ្វើពហិកាពីការចូលរួមបោះឆ្នោតនេះ។
អ្នកតវ៉ាជាច្រើន បានប្រមូលផ្តុំគ្នានៅខាងមុខវិមានព្រឹទ្ធសភានៅព្រឹកនេះ ដោយច្រៀងចម្រៀង កាន់បដាជាច្រើនមានសារជំទាស់នឹងសេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាល និងចែកចាយខិតប័ណ្ណជាច្រើន នៅពេលព្រះសង្ឃនិមន្តប្រារព្ធពិធីសាសនាដែលជានិមិត្តសញ្ញានៃការបញ្ចប់នៃសេចក្តីព្រាងច្បាប់នេះ។ អ្នកតវ៉ាក៏បានដាក់ញត្តិរបស់ក្រុមពលរដ្ឋមូលដ្ឋាន សហជីព និងអង្គការមិនមែនរដ្ឋាភិបាល ទៅកាន់ស្ថានទូតជប៉ុន ដើម្បីឲ្យជួយអន្តរាគមលើសេចក្តីព្រាងច្បាប់នេះ។
- ឯកសារទាក់ទង
- ចំណងជើង & មូលបទ
- តុលាការ និងនីតិរដ្ឋ សិទិ្ធបញ្ចេញមតិ និងចូលរួម ច្បាប់ ឬបទប្បញ្ញត្តិ