ឯកឧត្តម សម រង្ស៊ី ត្រូវបានផ្ដន្ទាទោសដោយកំបាំងមុខ
ចេញផ្សាយ ថ្ងៃទី២៨ ខែកក្កដា ឆ្នាំ២០១៦នាព្រឹកនេះ សាលាដំបូងរាជធានីភ្នំពេញបានបើកសវនាការលើសំណុំរឿងបរិហារកេរ្តិ៍រវាងឯកឧត្តម សម រង្ស៊ី មេដឹកនាំគណបក្សសង្រ្គោះជាតិដែលកំពុងនិរទេសខ្លួននៅក្រៅប្រទេស និងសម្ដេចហេង សំរិនដែលជាប្រធានរដ្ឋសភាជាតិ។
សំណុំរឿងនេះត្រូវបានសើរើសារជាថ្មីជុំវិញបញ្ហា ដែលលោក សម រង្ស៊ី បានបង្ហោះព័ត៌មាននៅលើបណ្ដាញសង្គមហ្វេសបុក (Facebook) របស់លោកកាលពីថ្ងៃទី១៧ ខែវិច្ឆិកា ឆ្នាំ២០១៥ ដោយបានចែកចាយវីដេអូមួយបង្ហាញពីអតីតព្រះមហាក្សត្រព្រះបាទនរោត្តមសីហនុធ្វើការអត្ថាធិប្បាយពីសកម្មភាពក្រោមរបបដឹកនាំរបស់សម្ដេច ហេង សំរិនអំឡុងទសវត្សរ៍ឆ្នាំ១៩៨០។ លោកព្រះរាជអាជ្ញា វង្ស ប៊ុនវិសុទ្ធ និងលោកមេធាវី គី តិច ជាមេធាវីតំណាងសម្ដេចហេង សំរិន បានអះអាងថាការពិពណ៌នារបស់ ឯកឧត្តម សម រង្ស៊ីដែលបានសរសេរភ្ជាប់ជាមួយវីដេអូមួយគឺជាការបំផ្លើស ការប្រមាថ និងការបោកបញ្ឆោត។ ទាំងចុងចោទ និងមេធាវីរបស់លោកមិនបានចូលរួមក្នុងសវនាការនោះទេ។
ក្រោយពីការពិភាក្សាប្រហែលជា១០នាទី លោកចៅក្រម រស់ ពិសិដ្ឋ បានចូលមកបន្ទប់សវនាការវិញជាមួយនឹងសេចក្ដីសម្រេចដ៏វែងមួយ ដែលបង្ហាញថា ឯកឧត្តម សម រង្ស៊ី បានប្រព្រឹត្តបទបរិហារកេរ្តិ៍យោងតាមមាត្រា៣០៥ នៃក្រមព្រហ្មទណ្ឌ។ ឯកឧត្តម ត្រូវបានតម្រូវឲ្យពិន័យជាប្រាក់ ១០ លានរៀល (ប្រហែល២៥០០ដុល្លារ) និងសងសំណងជម្ងឺចិត្តដល់សម្ដេចហេង សំរិន ១៥០ លានរៀល (ប្រហែល៣៧៥០០ដុល្លារ) ។
ឯកឧត្តម សម រង្ស៊ីបានចាកចេញទៅរស់នៅក្រៅប្រទេសតាំងពីចុងឆ្នាំមុន ដោយសារតែលោកនឹងប្រឈមនឹងការជាប់ពន្ធនាគារប្រសិនបើត្រឡប់មកវិញ។ ការចាកចេញនេះ បានធ្វើឡើង ក្រោយពីការផ្ដន្ទាទោសនៅពេលមុនដែលគេជឿជាក់ថាបានចូលជាស្ថាពររួចទៅហើយ។ ប៉ុន្តែសំណុំរឿងនេះ ត្រូវបានសើរើឡើងវិញតាមបណ្ដឹងរបស់មេធាវីឯកឧត្តមហោ ណាំហុង ដែលជាអតីតរដ្ឋមន្រ្តីក្រសួងការបរទេស។
- ឯកសារទាក់ទង
- ចំណងជើង & មូលបទ
- តុលាការ និងនីតិរដ្ឋ សិទិ្ធបញ្ចេញមតិ និងចូលរួម