ប្រជាពលរដ្ឋជាច្រើននាក់បានជួបជុំគ្នាដើម្បីគាំទ្រអ្នកការពារសិទ្ធិមនុស្សដែលត្រូវបានតុលាការកោះហៅទៅបំភ្លឺ
ចេញផ្សាយ ថ្ងៃទី៨ ខែកុម្ភៈ ឆ្នាំ២០១៧
នារសៀលនេះ ប្រជាពលរដ្ឋប្រមាណជា២០០នាក់ បានជួបជុំគ្នានៅខាងមុខសាលាដំបូងរាជធានីភ្នំពេញ ដើម្បីបង្ហាញការគាំទ្រដល់អ្នកការពារសិទ្ធិមនុស្ស លោក អំ សំអាត និងលោក ច័ន្ទ ពុទ្ធិស័ក្ដ ខណៈដែលអ្នកទាំងពីរកំពុងត្រូវបានព្រះរាជអាជ្ញា សាកសួរពាក់ព័ន្ធនឹងអំពើហិង្សា ដែលបានកើតឡើង កាលពីខែតុលា ឆ្នាំ២០១៦ អំឡុងពេលដែលក្រុមសន្ដិសុខខណ្ឌដូនពេញ បំបែកក្បួនដង្ហែអហិង្សានៃទិវាសិទ្ធិលំនៅដ្ឋានពិភពលោក។
លោក អំ សំអាត ប្រធានផ្នែកឃ្លាំមើលនិងការពារសិទ្ធិមនុស្សនៃសម្ព័ន្ធខ្មែរជំរឿននិងការពារសិទ្ធិមនុស្សលីកាដូ (អង្គការលីកាដូ) និងលោក ច័ន្ទ ពុទ្ធិស័ក្ដ តំណាងសហគមន៍បឹងកក់ ត្រូវបានសាកសួរអស់រយៈពេលប្រហែលជាង១ម៉ោង ខណៈដែលប្រជាពលរដ្ឋជាច្រើននាក់មកពីសហគមន៍ដីធ្លីនិងសហគមន៍មូលដ្ឋាន បុគ្គលិកអង្គការមិនមែនរដ្ឋាភិបាលនិងអ្នកសារព័ត៌មាន បានជួបជុំគ្នានៅខាងមុខតុលាការ។ អ្នកការពារសិទ្ធិមនុស្សទាំងពីរត្រូវបានតុលាការកោះហៅឲ្យចូលខ្លួនបំភ្លឺក្នុងនាមជាសាក្សីនៅចំពោះលោកព្រះរាជអាជ្ញា ងិន ពេជ ពាក់ព័ន្ធនឹងអំពើហិង្សានៅថ្ងៃប្រារព្ធទិវាសិទ្ធិលំនៅដ្ឋានពិភពលោក ដែលបណ្ដាលអោយអ្នកទាំងពីររងរបួសយ៉ាងធ្ងន់ធ្ងរដោយសារការប្រើប្រាស់អំពើហិង្សាពីសំណាក់ក្រុមសន្តិសុខ។
- ឯកសារទាក់ទង
