តុលាការចេញដីកាកោះហៅអ្នកការពារសិទ្ធិមនុស្សពីររូប ក្នុងនាមជាជនសង្ស័យ បន្ទាប់ពីអ្នកទាំងពីរត្រូវបានក្រុមសន្ដិសុខវាយដំ
ចេញផ្សាយ ថ្ងៃទី៧ ខែកុម្ភៈ ឆ្នាំ២០១៧; ក្រុមសង្គមស៊ីវិល
ប្រធានផ្នែកឃ្លាំមើលនិងការពារសិទ្ធិមនុស្ស នៃសម្ព័ន្ធខ្មែរជំរឿននិងការពារសិទ្ធិមនុស្ស លីកាដូ (អង្គការលីកាដូ) លោក អំ សំអាត បានទៅឃ្លាំមើលការដង្ហែក្បួនដោយអហិង្សា ក្នុងទិវាសិទ្ធិលំនៅដ្ឋានពិភពលោក នៅថ្ងៃទី១០ ខែតុលា ឆ្នាំ២០១៦។ លោក ច័ន្ទ ពុទ្ធិស័ក្ដ តំណាង សហគមន៍បឹងកក់ បានទៅថតសកម្មភាពនៃព្រឹត្តិការណ៍នោះដែរ។ លោក អំ សំអាត និងលោក ច័ន្ទ ពុទ្ធិស័ក្ដ ត្រូវបានទទួលរងរបូសយ៉ាងធ្ងន់ធ្ងរដោយការប្រព្រឹត្តអំពើហិង្សា ពីសំណាក់ក្រុមសន្ដិសុខខណ្ឌដូនពេញ ប៉ុន្តែត្រូវបានតុលាការចេញដីកាកោះហៅក្នុងនាមជាជនសង្ស័យ ពាក់ព័ន្ធនឹងអំពើហិង្សា ដែលបានកើតឡើងនោះទៅវិញ។
នៅថ្ងៃទី១០ ខែតុលា ឆ្នាំ២០១៦ អំឡុងពេលក្បួនដង្ហែអហិង្សាធ្វើដំណើរឆ្លងកាត់តាមផ្លូវនានាក្នុងរាជធានីភ្នំពេញឆ្ពោះទៅទីលានប្រជាធិបតេយ្យ ក្រុមសន្តិសុខ (ដឹកនាំដោយ លោក គឹម វុត្ថា ប្រធានសន្ដិសុខខណ្ឌដូនពេញ) បានបិទផ្លូវរារាំងក្បួនដង្ហែ និងបានឆក់យកស្គរឆ៉ៃយ៉ាំ និងបដាពីអ្នកដើរហែក្បួន។ នៅពេលនោះ ក្រុមសន្ដិសុខបានចាប់ផ្ដើមប្រើអំពើហិង្សាដោយគ្មានហេតុផលទៅលើ លោក ច័ន្ទ ពុទ្ធិស័ក្ដ ខណៈដែលលោកកំពុងថតសកម្មភាពក្បួនដង្ហែរបស់សហគមន៍។ លោក អំ សំអាត បានខំប្រឹងព្យាយាមដោយសន្ដិវិធី ដើម្បីបញ្ឈប់ស្ថានការណ៍តានតឹងនិង អំពើហិង្សា ក្នុងនាមលោកជាអ្នកឃ្លាំមើលសិទ្ធិមនុស្ស។ ប៉ុន្តែភ្លាមៗនោះ ក្រុមសន្ដិសុខបានចាប់ផ្ដើមវាយដំទៅលើរូបលោក ដោយបានហ៊ុមព័ទ្ធ ដាល់មុខ និងកញ្ចឹងករបស់លោកជាច្រើនដៃ ដោយគ្មានហេតុផលទាល់តែសោះ។ អ្នកទាំងពីរត្រូវបានរងរបួស និងត្រូវការសម្រាកព្យាបាល។
លោក អំ សំអាត និងលោក ច័ន្ទ ពុទ្ធិស័ក្ដ គឺជាជនរងគ្រោះនៃការវាយដំដោយគ្មានហេតុផលនោះ។ ករណីនេះគួរឲ្យហួសចិត្ត ដោយហេតុថា បណ្ដឹងលើអ្នកទាំងពីរមិនគួរត្រូវបានយកមកពិចារណា ដើម្បីធ្វើការស៊ើបអង្កេតនោះទេ។
អ្នកនាង ណាលី ពីឡូក នាយករងផ្នែកតស៊ូមតិនៃអង្គការលីកាដូ បានមានប្រសាសន៍ថា៖ “លោក អំ សំអាត និងលោក ច័ន្ទ ពុទ្ធិស័ក្ដ គឺជាជនរងគ្រោះនៃការវាយដំដោយគ្មានហេតុផលនោះ”។ អ្នកនាងបន្តថា៖ “ករណីនេះគួរឲ្យហួសចិត្ត ដោយហេតុថា បណ្ដឹងលើអ្នកទាំងពីរមិនគួរត្រូវបានយកមកពិចារណា ដើម្បីធ្វើការស៊ើបអង្កេតនោះទេ”។
លោក អំ សំអាត និងលោក ច័ន្ទ ពុទ្ធិស័ក្ដ ត្រូវបានកោះហៅឲ្យចូលខ្លួនបំភ្លឺចំពោះមុខព្រះរាជអាជ្ញា លោក ងិន ពេជ វេលាម៉ោង ២រសៀល និងម៉ោង ៣រសៀល នៅថ្ងៃទី០៨ ខែកុម្ភៈ ឆ្នាំ២០១៧។ ដើមបណ្ដឹងក្នុងសំណុំរឿងនេះមានឈ្មោះ សំ សុធារ៉ា និង តែត ចន្ធូ ជាសន្ដិសុខខណ្ឌ។
តំណាងសហគមន៍បឹងកក់ កញ្ញា សុង ស្រីលាភ បានមានប្រសាសន៍ថា៖ “ករណីនេះច្បាស់ណាស់ថា មានតែក្រុមសន្ដិសុខប៉ុណ្ណោះដែលបានប្រព្រឹត្តអំពើហិង្សានៅថ្ងៃនោះ ដោយបានវាយដំលើសកម្មជនដីធ្លី និងអ្នកឃ្លាំមើលសិទ្ធិមនុស្ស”។ កញ្ញាបន្តថា៖ “អាជ្ញាធរគួរតែជួយយើងស្វែងរកយុត្តិធម៌ ដោយត្រូវស៊ើបអង្កេតលើអ្នកដែលបានវាយដំយើងនៅតាមដងផ្លូវ”។
នៅព្រឹកថ្ងៃដដែល លោក អំ សំអាត និងលោក ច័ន្ទ ពុទ្ធិស័ក្ដ បានដាក់ពាក្យបណ្ដឹងនៅប៉ុស្ដិ៏រដ្ឋបាលនគរបាលជ័យជំនះ បន្ទាប់ពីអ្នកទាំងពីរទទួលរងអំពើហិង្សា។ អង្គការលីកាដូ និងសារព័ត៌មានជាតិជាច្រើនទៀត មានទាំងរូបថត វីដេអូ និងសាក្សី ដែលបញ្ជាក់ពីការវាយដំយ៉ាងអាក្រក់នោះ ប៉ុន្តែបណ្ដឹងរបស់អ្នកទាំងពីរមិនត្រូវបានយកមកចាត់ការទេ។
លោក ថាវ គឹមសាន នាយកអង្គការលីកាដូ បានមានប្រសាសន៍ថា៖ "ការកោះហៅអ្នកការពារសិទ្ធិមនុស្ស លោក អំ សំអាត និងលោក ច័ន្ទ ពុទ្ធិស័ក្ដ ក្នុងនាមជាជនសង្ស័យ គឺបង្ហាញពីភាពលំអៀងរបស់អាជ្ញាធរប្រឆាំងទៅនឹងការជួបជុំដោយសន្ដិវិធី ដោយសារអ្នកទាំងពីរត្រូវបានក្រុមសន្ដិសុខវាយដំ ក្នុងខណៈពេលដែលអ្នកទាំងពីរព្យាយាមបញ្ចៀសកុំឲ្យអំពើហិង្សានេះបន្តទៀតនិងកំពុងថតសកម្មភាព”។ លោកបន្ដទៀតថា៖ “នេះគឺជានិទ្ទណ្ឌភាពរបស់ក្រុមសន្ដិសុខដែលបានប្រព្រឹត្តអំពើហិង្សា”។
តាមរយៈភ័ស្ដុតាងយ៉ាងច្បាស់លាស់ទាំងនេះ អ្នកទាំងពីរគឺជាជនរងគ្រោះនិងមិនមែនជាជនដែលបានប្រព្រឹត្តអំពើហិង្សានោះទេ។ អង្គការលីកាដូនិងសហគមន៍បឹងកក់សង្ឃឹមថា លោកព្រះរាជអាជ្ញាអាចបញ្ចប់ការស៊ើបអង្កេតបឋមទៅលើ លោក អំ សំអាត និង លោក ច័ន្ទពុទ្ធិស័ក្ដ ហើយពិចារណាដំណើរការបណ្ដឹងប្រឆាំងនឹងជនដៃដល់ពិតប្រាកដ ដែលបានប្រព្រឹត្តអំពើហិង្សានៅថ្ងៃនោះ។
សម្រាប់ព័ត៌មានបន្ថែម សូមទាក់ទង៖
▪ លោក ថាវ គឹមសាន នាយកអង្គការលីកាដូ, ០១២ ៨០៧ ៧៦៣ (ភាសាខ្មែរ)
▪ អ្នកនាង ណាលី ពីឡូក នាយករងផ្នែកតស៊ូមតិនៃអង្គការលីកាដូ, ០១២ ៨០៣ ៦៥០ (ភាសាអង់គ្លេសនិងបារាំង)
▪ កញ្ញា សុង ស្រីលាភ តំណាងសហគមន៍បឹងកក់, ០១២ ៨១១ ០៩៣ (ភាសាខ្មែរ)
PDF៖ ទាញយកសេចក្តីថ្លែងការណ៍ជាភាសាអង់គ្លេស - ទាញយកសេចក្តីថ្លែងការណ៍ជាភាសាខ្មែរ
MP3៖ ស្តាប់សំឡេងជាភាសាខ្មែរ
- ឯកសារទាក់ទង
- ចំណងជើង & មូលបទ
- សិទិ្ធបញ្ចេញមតិ និងចូលរួម សិទ្ធិដីធ្លី
