កសិករអំពាវនាវរកដំណោះស្រាយលើជម្លោះដីធ្លីដ៏រ៉ាំរ៉ៃ
ចេញផ្សាយ ថ្ងៃទី១២ ខែមីនា ឆ្នាំ២០១៨នៅថ្ងៃនេះ កសិករប្រហែលជា៣០០នាក់ មកពីខេត្តចំនួន៤ផ្សេងគ្នា ដែលរងផលប៉ះពាល់ដោយសារជម្លោះដីធ្លីជាយូរមកហើយនោះ បានដើរដង្ហែក្បួននិងដាក់ញត្តិទៅស្ថាប័នរដ្ឋាភិបាលមួយចំនួន នៅក្នុងរាជធានីភ្នំពេញ។
កសិករដែលមកពី ខេត្តត្បូងឃ្មុំ ស្វាយរៀង ព្រះសីហនុ និងកណ្ដាល បានធ្វើដំណើរទៅ ទីស្ដីការគណៈរដ្ឋមន្រ្តី ក្រសួងរៀបចំដែនដី នគរូបនីយកម្ម និងសំណង់ និងរដ្ឋសភា ដើម្បីស្វែងរកអន្តរាគមន៍ក្នុងការដោះស្រាយជម្លោះដីធ្លីរបស់ប្រជាពលរដ្ឋរាប់ពាន់គ្រួសារ ដែលអ្នកទាំងនោះបានចោទប្រកាន់ថា បុគ្គលមានអំណាច និងអ្នកទទួលផលប្រយោជន៍មួយចំនួន បានទន្ទ្រានយក។
នៅក្នុងញត្តិ កសិករទាំងនោះបានលើកឡើងថា កន្លងមក អាជ្ញាធរគ្រប់ជាន់ថ្នាក់មិនទាន់អាចដោះស្រាយជម្លោះដីធ្លីនេះនៅឡើយទេ ដែលនេះនាំឱ្យប៉ះពាល់យ៉ាងធ្ងន់ធ្ងរដល់ជីវភាពរស់នៅប្រចាំថ្ងៃរបស់អ្នកទាំងនោះ។ លើសពីនេះ តំណាងសហគមន៍មួយចំនួនត្រូវបានគំរាមកំហែង សម្លុត និងចោទប្រកាន់ពីបទញុះញង់ ដោយគ្រាន់តែអ្នកទាំងនោះធ្វើការតស៊ូមតិរកយុត្តិធម៌។
ការដង្ហែក្បួននេះត្រូវបានធ្វើឡើងត្រឹមតែបួនថ្ងៃប៉ុណ្ណោះ បន្ទាប់ពីមានការប៉ះទង្គិចគ្នាដោយហិង្សា រវាងកងកម្លាំងសមត្ថកិច្ច និងកសិករដែលកំពុងតវ៉ាប្រឆាំងនឹងការបណ្ដេញចេញដោយបង្ខំ នៅក្នុងតំបន់ដីសម្បទានសេដ្ឋកិច្ចមួយកន្លែងក្នុងខេត្តក្រចេះ ដែលនាំឱ្យមនុស្សមួយចំនួនរងរបួសពីការប្រើអំពើហិង្សានោះ។ ក្រោយមក កសិករចំនួន៨នាក់ ត្រូវបានចាប់ខ្លួន។
- ចំណងជើង & មូលបទ
- សិទ្ធិដីធ្លី