សវនាការលើបណ្ដឹងបរិហារកេរ្តិ៍ប្រឆាំងនឹងម្ចាស់កាសែតខេមបូឌា ដេលី ត្រូវបានផ្អាក
ចេញផ្សាយ ថ្ងៃទី២២ ខែមីនា ឆ្នាំ២០១៨នាថ្ងៃនេះ សាលាដំបូងរាជធានីភ្នំពេញ បានបើកសវនាការលើ “បទបរិហារកេរ្តិ៍ ជាសាធារណៈ” ជុំវិញបណ្ដឹងប្រឆាំងនឹងអ្នកស្រី Deborah Krisher-Steel ម្ចាស់កាសែតខេមបូឌា ដេលី ដែលត្រូវបានបិទដំណើរការ។ ប៉ុន្តែសវនាការនេះ ត្រូវបានផ្អាក បន្ទាប់ពីសវនាការចាប់ផ្ដើមបានរយៈពេលជាងមួយម៉ោង។
បទចោទនេះត្រូវបានប្ដឹងដោយអគ្គនាយកដ្ឋានពន្ធដារ យោងតាមលិខិតចំហរមួយដែលចោទប្រកាន់នាយកដ្ឋានពន្ធដារថា បានទម្លាយព័ត៌មានសម្ងាត់អំពីបញ្ជីជាប់ជំពាក់ពន្ធដ៏ច្រើនមហាសាល ទៅកាន់សាធារណជន។
កាសែតនេះបានបិទដំណើរការការិយាល័យនៅកម្ពុជា និងបញ្ឈប់បុគ្គលិក កាលពីថ្ងៃទី០៤ ខែកញ្ញា ឆ្នាំ២០១៧ បន្ទាប់ពីត្រូវបានចោទប្រកាន់លើការជាប់ជំពាក់ពន្ធដែលមានទឹកប្រាក់ប្រមាណជាង ៦,៣ លានដុល្លារ។
អ្នកស្រី Krisher-Steel មិនបានបង្ហាញវត្តមាននៅក្នុងសវនាការទេ ប៉ុន្តែមេធាវីការពារក្ដីរបស់អ្នកស្រីបានចូលរួមសវនាការនេះ ខណៈដែលតំណាងមកពីអគ្គនាយកដ្ឋានពន្ធដារបានផ្ដល់ភ័ស្ដុតាង ក្នុងនាមជាភាគីដើមបណ្ដឹងរដ្ឋប្បវេណី។ លោកចៅក្រម សេង នាង បានសម្រេចផ្អាកសវនាការ ដើម្បីអនុញ្ញាតឱ្យមានការបកប្រែនូវភ័ស្ដុតាងសំខាន់ៗ ទៅជាភាសាខ្មែរ។
សវនាការនឹងប្រព្រឹត្តទៅបន្តទៀត នៅថ្ងៃទី១២ ខែមេសា ឆ្នាំ២០១៨។
- ចំណងជើង & មូលបទ
- សិទិ្ធបញ្ចេញមតិ និងចូលរួម