ការចងចាំដីក្រហម៖ ប្រាំឆ្នាំ ចាប់តាំងពីមានការបណ្តេញចេញដោយហិង្សា
ចេញផ្សាយ ថ្ងៃទី២៤ ខែមករា ឆ្នាំ២០១៤កាលពីថ្ងៃទី ២៤ ខែមករា ឆ្នាំ២០០៩៖ សហគមន៍ដីក្រហមត្រូវបានគេលុបបំបាត់ចោលតាមរយៈការប្រើអំពើហិង្សាក្នុងការបណ្តេញប្រជាពលរដ្ឋទាំងអស់នោះចេញ ហើយការបណ្តេញចេញនេះត្រូវបានធ្វើឡើងពីសំណាក់អាជ្ញាធររដ្ឋ និងក្រុមហ៊ុន 7NG។ ប្រជាពលរដ្ឋចំនួន ១០០គ្រួសារត្រូវបានបាត់បង់លំនៅឋានផ្ទាល់ខ្លួន។ ប្រជាពលរដ្ឋមួយចំនួនត្រូវបានអាជ្ញាធរបញ្ជូនឲ្យទៅតាំងទីលំនៅថ្មី ដែលមានចម្ងាយ ៤៥គីឡូម៉ែត ពីរាជធានីភំ្នពេញ។ នៅព្រឹកនេះ សហគមន៍មួយចំនួនរួមមាន សហគមន៍បឹងកក់ សហគមន៍បុរីកីឡា សហគមន៍ថ្មគោល សហជីព និងក្រុមអង្គការសង្គមស៊ីវិលជាច្រើនរួមជាមួយនឹងអតីតប្រជាពលរដ្ឋសហគមន៍ដីក្រហម បានចូលរួមសាមគ្គីគ្នាក្នុងការរៀបចំពិធីរំឮកខួប៥ឆ្នាំនៃការបណ្តេញចេញដោយហិង្សាទៅលើប្រជាពលរដ្ឋសហគមន៍ដីក្រហម។ នៅខាងក្រៅតំបន់ដីក្រហម ដែលមានអាគារជាច្រើនកំពុងត្រូវបានគេសាងសង់ឡើង ប្រជាពលរដ្ឋសហគមន៍ដីក្រហមបានធ្វើការរៀបរាប់ពីប្រវត្តិទាក់ទងនឹងការបណ្តេញពួកគេចេញ និងការបេ្តជ្ញាចិត្តរបស់ពួកគេក្នុងការតស៊ូប្រយុទ្ធប្រឆាំងជាមួយនឹងការបង្ខំឲ្យពួកគេទៅតាំងទីលំនៅថ្មី ។ ប្រជាពលរដ្ឋសហគមន៍ដីក្រហមក៏បានធ្វើការអំពាវនាវសុំឲ្យមានការដោះលែងកម្មករ និងអ្នកការពារសិទ្ធិមនុស្សទាំង២៣នាក់ឲ្យមានសេរីភាពឡើងវិញ នៅក្នុងអំឡុងពេលដែលពួកគេត្រូវបានអាជ្ញាធរឃុំខ្លួនកាលពីដើមខែមករានេះ។ ក្នុងចំណោមអ្នកដែលត្រូវបានអាជ្ញាធរឃុំខ្លួននោះ រួមមានទាំងលោក ច័ន្ទ ពុទ្ធិសក័ ដែលជាអ្នកដឹកនាំសហគមន៍បឹងកក់ផងដែរ។
- ឯកសារទាក់ទង
- ចំណងជើង & មូលបទ
- សិទ្ធិដីធ្លី